Кузьым — «Юлдош выжылы»

Удмурт Дунне
By Удмурт Дунне 17 октября, 2012 10:11

Кузьым — «Юлдош выжылы»

Н. Ильин

Пичи Пурга ёросысь Улӥнь Юри гуртын та нуналъёсы ортчиз Семён Самсонов нимо литературной премиез сётон.

— Та премия чакламын ёросысь литература но искусство удысын адӟем карымон тыршисьёслы, — вера Пичи Пурга ёрос библиотекаен кивалтӥсь Людмила Шумилова. — Кылем арын нырысьсэ таӵе премиез басьтӥзы Семён но Андрей Самсонов писательёслэн кузпалъёссы — Мария Михайловна но Галина Николаевна Самсоноваос. Туннэ ми калыкез юнме гинэ Улӥнь Юри гуртэ ӧм люкалэ. Туэ дано премиез басьтыны шуд усиз та гуртысь шаерчилы Никита Ильинлы. Никита Ильич, шутэтскыны потытозяз, аслаз гуртаз, «Киров» нимо колхозын, тыршемын: нырысь электрик луыса, бӧрысь профкомен кивалтӥз.

— Улӥнь Юри гурт администрацие 3 гуртъёс пыро: Улӥнь Юри, Шоринь Юри, Выль Мӧнья. Пӧртэм авторъёсын ӵош, та гуртъёслы сӥзьыса, «По соседству мы живём» книга поттӥмы. Мон аслам гуртэ сярысь гожтӥ. Со понна трос утчаськоно но бугыръяськоно луиз архивъёсын, гурт калыклэсь коркась корка юалляськыса ветлӥ. Туспуктэмъёссэс курылӥ. Котькуд выжылэсь историзэ шедьтоно-тодоно вал. Собере аслам выжые сярысь «Юлдош выжы» книга поттӥ. Тау гурт калыклы, ёрос кивалтӥсьёслы, мынэсьтым ужме синйылтӥды, таӵе бадӟым кузьым сётӥды, данъяны быгатӥды. Табере мон эшшо но ӟечгес ужаны кулэ, — шуэ Никита Ильин.

Со кадь адямиос котькуд гуртын мед луозы вылэм. Соку гуртлэн историез но, отын улэм адямиос но ноку уз вунэ. Нылпиослы адӟем карымон уж лэсьтэ со.

Гуртозэс бадӟым вормонэныз ӟечкыласа, кырӟаз-вераз Улӥнь Юриысь арлыдоослэн ансамбльзы. Лауреатэз озьы ик ӟечкылазы Пичи Пурга ёрослэн йырыз Александр Ерохин, Удмуртиысь Писательёслэн огазеяськонзылэн тӧроез Егор Загребин но мукетъёс.

Любовь Тихонова

Туспуктӥз Владимир Беломорских

Удмурт Дунне
By Удмурт Дунне 17 октября, 2012 10:11