Эмъяло… тӧдьы тэркыос

Удмурт Дунне
By Удмурт Дунне 9 октября, 2012 09:37

Эмъяло… тӧдьы тэркыос

Тӧдьы гурезьёс. Музъемысь 1 секунд куспын ог 250 литр йӧнатӥсь ву потэ

Памуккале — Турцилэн одӥгез абдрамон чебер интыез. Тӧдьы мамык выллем гурезьёсты учкыны нуналысь нуналэ уллёен-уллёен вуыло туристъёс. Пӧлазы вал ми но.

Сюрес вылэ потӥмы 4 часын ӵукна — Аланьяысен Памуккалеозь ог 500 иськем. Чильк-вальк автобусэ пуксьыса вуим-а, ӧм-а — туристъёс пыс-пыс умме усизы. Ма, валамон — Турциын сюресъёс гочамонэсь:  вольытэсь, паськытэсь. Соин но автобусъёс уг ширто — лобо! Гурезьёсты ортчыку, кӧт шурдэ, пель пытсаське. 6 часлэсь ятыр ворттыса, пыдъёс зубекто, макесъёс тальк-тальк луо.  Мырдэм но кызьы кырымпыдэсын кадь адӟиськиз Денизли город. Ӵапак со котыре интыяськемын дано Памуккале.

Ми вуыку, кызё пала автобусъёс тӧдьы гурезьёс котыре няняськемын вал ини. Туристъёс пӧлысь ӝыныезлэсь тросэз — ӟучъёс. Куспазы ушъясько: ми, пе, татчы 5 часын ӵукна дунтэк пыримы — возьмаськисьёс кӧло на вал. Куд-огез гурезьлэн чылкак мукет палтӥз лыктэм — отын но чакласькисьёсыз ӧвӧл. Эх, малпасько, нош ми кузпалэным 6 cюрс манетмес кисьтӥмы. Но берло валамы: таӵе интыез адӟон понна 10 сюрс но жаль ӧвӧл!

Клеопатралэн бассейнэз. Дун-чылкыт ву пиналмытэ

Памуккале тӧдьы хлопоклэсь замок шуэмез возьматэ. Кылдэмын ог 4 даур талэсь азьло. Тӧдьы гурезь кыстӥське 4 иськем пала. Пушкысьтыз 17 интыетӥ пызъе ву. Огшоры ӧвӧл — кальциен, асбестэн, сылалъёсын майбыр. Шунды сиос улын вуэз сылме, нош сылалэз гурезь баме кыле, аспӧртэмлыко тэркыос — травертинаос — кылдытэ. Мурдалаез метр но ӧвӧл. Таӵе тэркыос гурезь пыдэсозь кыстӥсько: огез — бадӟым, мукетыз — пичи. Ай соос ваньзы тыроесь — висись пыдъёсты, сэръёсты йӧнатӥсь вуэз тӧдьы-чагыр адске. Тэркыысь тэркые вияса, соос люкасько улӥысь тыметэ. Выжыкылын кадь, ява — учкыса-учкыса чеберезлэсь кӧт уг тыры!

Экскурсоводмы алӥз: быдэс мугорыныды, пе, травертинаосы эн зыме — нунал ӵоже татын пыласько сюрсъёсын-сюрсъёсын туристъёс. Пӧлазы кыӵе но висисез ӧвӧл! Но такеме вуыса, та кылъёс пеле уг чукало ни. Кӧтме урдыса, лаш! пукси тэркые. Майбыр! Вуэз 36 градус котыр шуныт. Ӝутскылэ, пе, 100-озь но. Но 15 минутлэсь ятыр татын небӟытскыны уг яра — дышымтэ вылысь ку азыны быгатоз. Куд-ог травертинаос котыртӥ туристъёслы ветлыны уг яра — чурытомемын ӧвӧл на. Кыл йӧтоз, тӧдьы гурезьёсы пыдкукен лёгиськид ке. Курень дӥсен жандарм Памуккале тыр шултыса лэзе, ява.

Ватсано: азьло аръёсы татысь гурезьёс али гинэ усем лымы выллем пыр-пыр тӧдьыесь вылӥллям. Туннэ соос пурысялэс луэмын ни. Тае шӧдыса, дуннеысь Юнеско огазеяськон гурезьёсты сак утьыса возе.

Мар бен, тэркыын пыласьки, табере пуртые — Клеопатралэн бассейназ — зымылоно. Интыяськемын со тӧдьы гурезьёслэсь ог 300 метрлы палэнэ. Таяз но, пе, вуэз мудрон — егитомытӥсь: магниен, кальциен но углеводородэн узыр. Травертинаосын йӧл пушкын кадь пуки ке, таяз… шампанскойын выллем! Быдэс мугорез векчи пульыос шобырто. Киын-пыдын шонаськиськод но, соос бультырак ву вылэ лӧпто. Амалтэк шӧмзэ веръям потэ. Уката ик вуэз чильпырась — пыдэсысьтыз котькуд пыры адске. Ма, со пырыос-изъёс но огшорыесь ӧвӧл. Нырысь ик синъёс чукало колоннаос шоры. Вашкала дауръёсы бассейн вӧзысь мунчоез ӵапак соосын чеберъяллям. Но аръёсын-аръёсын сылыны колоннаослы кылдымтэ — музъем зуркамен, куашкаллям. Паймоно кадь: вылтӥзы вамышъяку, пыд чик уг ӵабъяськы. Татысь ву соосты сокем ӟеч вӧлэм, лэся.
Клеопатралэн бассейнэз шуо ке но, историкъёс туннэ ке но вераны уг быгато, зэм ик-а Египетысь царица татын пыласькылӥз. Но экскурсоводъёс туристъёслы весь нукырто: татчы зымылыса, векчи кисыриостылэсь, пе, мозмытскоды. Верамзы шонер-а, ӧвӧл-а — ӧйтӧд, но огез валамон: таосыдлэн туристъёслэсь тросгес уксё кыскемзы потэ. Бассейнын пыласькон понна угось ватсаса 15 доллар тыроно.

Памуккале тӧдьы гурезьёсын, бассейнэн гинэ узыр ӧвӧл. Татын улэм-вылэм быдэс город — Иераполис (Хиераполис). Пӧртэм висёнъёсты сылмытӥсь вуосызлы луыса Иераполис Римысь правительёслэн яратоно интызылы пӧрмем. Жаляса верано, ачиз инкуазь сётымтэ городлы пушйыны — вылысьтыз вылаз музъем зурканъёс городэз пыргытӥллям. Котьма ке но солэсь «лысьӧмъёссэ» эскерыны туж тунсыко.

Тани амфитеатр. Чакламын 13-15 сюрс учкисьлы! Сценаысен вылӥысь пукон интыос дорозь 300 тубатэз ортчоно. Амфитеатре пырон дорын, шуо, аспӧртэмлыко ватосэз вань. Одӥг изэз — кузьдалаез 1 метр, пасьталаез 40 сантиметр — интыысьтыз вырӟытод — театр син куспын кубикъёс сямен куашкалоз.

Аполлонлэн, Плутонлэн храмъёсазы ми ӧм пыралэ. Тодосчиос эскериллям: берпуметӥез храм интыяськемын кышкыт азьын — музъемысь бугыр пото пӧртэм урод газъёс. Отчы котькыӵе туала шокан тӥрлыкен пыр — улэпкын уд поты. Омырез сокем кырсь. Таин сэрен туннэ но тодмо ӧвӧл, мае пушказ ватыса возе та инты. Огзэ гинэ историкъёс вераны быгато: храмын жрецъёс тунаськылӥллям яке огшоры калыкез алданэн выриллям-а, шуод. Адямиослы асьсэлэсь кужымзэс возьматон понна жрецъёс тылобурдоез пещерае лэзьылӥллям. Со, валамон, отын соку ик кулылӥз. Озьы калык малпалляз, жрецъёслэн зэмзэ но йӧспӧртэм кужымзы вань шуыса.

Дыртыса ортчим Некрополь шайвылэтӥ но. Кыстӥське со 2 иськем пала. Иераполис йӧнатӥсь вуосын город лыдъяськылӥз бере, татчы уллёен вуылӥзы висисьёс. Одӥгъёсыз черзылэсь мозмытскылӥзы ке, мукетъёсыз курадӟыса ик улонзылэсь люкиськылӥзы. Соин Некрополь вакчи дыр куспын паськытаз.

Уг ваты: шайвылэтӥ ветлыку, мугор юзыр-кезьыр луэ. Куд-огез доры экскурсоводмы матэктыны ик ӧз лэзьылы. Малы юанмылы валэктылӥз: соос вылэ, пе, олома но гожъяса кельтэмын. Кылсярысь, кин шайвылам вужер уськытоз — улӥсь уз луы ни. Яке шайвылме эн учкы — тазалыктэ басьто… Макем вылӥе адями ватэмын, сокем со узыр но дано лыдъяськылэм. Котьма ке но Иераполисысь кошкем уг пот ни. Макем отын шулдыр. Омырез ик пушкез бугыртэ.

Гурезьёстӥ ветлыса, какалми. Но мылкыды тае ӧз шӧды кадь. Сомында тунсыкозэ кылыса-адӟыса, со лопыръяськиз. Огез гинэ Памуккалелэн но Денизли городлэн мыным валантэм кылиз. Татысь калыклы аспӧртэмлыко инкуазьзы укыр огшоры потэ, лэся. Жуг-жаглэсь утьыны сое чик уг дырто.

Ольга Корепанова

Удмурт Дунне
By Удмурт Дунне 9 октября, 2012 09:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<