Кунгожез ыштӥд ке, уд кулы, вордскем кылдэ ыштӥд ке — бырод

Удмурт Дунне
By Удмурт Дунне 17 октября, 2012 10:29
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кунгожез ыштӥд ке, уд кулы, вордскем кылдэ ыштӥд ке — бырод

Дэжё Костолани

Мадьяр литературалэн зарни вакытысьтыз писательлэн  Дэжё Костоланилэн удмурт кылэ берыктэм веросъёсыз «Инвожо» книгапоттонниын печатласькизы.  Берыктӥсез — егит тодосчи Елена Родионова.

70-тӥ аръёсы Дэжё Костоланилэн ӟуч кылэ берыктэм веросъёсыз но «Нерон, кровавый поэт» романэз поттэмын вал.
Та тунсыко автор 20-тӥ даурлэн кутсконаз, кык бадӟым дунне войнаос куспын гожъяськиз. Австро-Венгрия куашкаса, эрико мадьяр государство юнман вакытэ литература но публицистика кужмо азинскизы.

Соку венгер литературалэн улоназ «Нюгат» («Шундыпуксён») журнал бадӟым инты басьтыны кутске: 1908-тӥ арын кылдыса, аслэсьтыз лыдӟисьсэ со Европаысь литератураен тодматъяз. Редакторез Эрнё Ошват гожъяз: нокытын но, Венгриын кадь, сокем трос талантъёс уг быро, соослы юрттыны кулэ. Журналын  тыршисьёс выль, яркыт гожъясьёсты утчазы. Озьы пичи каръёсысь Будапештэ лыктэм егитъёс выль венгер литература кылдытӥзы. Соос пӧлын Дэжё Костолани но вал.

Сабатка пичи карысь вуыса, Дэжё Костолани Будапештын филологлы дышетске. Печатласькиз «Нюгатын», венгер кылэ берыктӥз  Шекспирез, Гётеез, Рилькеез, Бодлерез, Верленэз, Мопассанэз, Кэрроллэз, Киплингез но трос мукет авторъёсты.

Солэн берыктэмъёсыз туж ӟечен лыдъяськизы, венгер литератураез кужмо азинтӥзы. Писательлэн «Нерон, вир кылбурчи» немец кылэ берыктэм романэзлы ачиз Томас Манн азькыл гожтӥз. Озьы венгер литература дунне литератураосын оградэ султӥз.

Нош вакчиесь веросъёсаз Дэжё Костолани огшоры адямилэн огшоры улонэзлы саклык висъя. Таӵе темаеныз писатель ӟуч литератураысь пичи адями сярысь гожъясь Николай Гогольлы, Антон Чеховлы, Михаил Зощенколы матын луэ.

Удмурт кылэ берыктэм веросъёсаз ӵемысь нылпи но бадӟым адями куспын кылдэм тупамтэос возьматӥсько. Нунал бӧрсьы нунал мынӥсь улонын шӧдэ-вала меда адями вӧзысьтыз адямилэсь куректэмзэ. Быдэ вуэм мурт обществолэн порядокезлы дыше, изме кадь, нош али улонэ пырись пичи нылпи эриксэ ыштэмзэ туж ӟеч шӧдэ-вала, пумитъяське кулыса. Новеллаосын бадӟым инты басьтэ кулон: со адямиез воштэ, висись палъёссэ возьматыса, адямилы бурмыны юрттэ.

«Пыласькон» веросысь пичи Янчиез аслаз атаез ултӥя, пияш со понна сое адӟонтэм каре. Атаез пиезлы кузё луэмезлы шумпотэ, люкаськем сӧриськем мылкыдзэ пиез вылэ лэзе. Нош котькуд адямилэсь дунлыксэ кулон пыр валаны луэ вылэм.  Пыласькыкузы атаез — Шухайда — Янчиез шудон сяменыз вуэ тупез сямен сэрпалтэ но янгышен виыны шедьтэ. Кулон синзэ усьтэ та адямилэсь. Мукетаз веросын пичи пияш ассэ ачиз валаса быдтэ. Веросысь геройлэн кулэмез нош ик атай луись муртэн герӟаськемын. Озьы Дэжё Костолани новеллаосаз атайлэн образэз пыр возьматэ обществолэн, калыклэн нимаз адями шоры учкемзэ: Пичи мурт ултӥямын. «Веросъёс» бичетэ люкам произведениос ог-огзэсты валэкто но авторлэсь малпанзэ ӟеч возьмато: вӧзысь адями шоры сак учконо.
* * *
«Веросъёс-Novellаk» книгалы 15-тӥ коньывуонэ удмурт кылосбур факультетын презентация ортчытэмын вал. Отчы вуылӥз берыктӥсез Елена Родионова но.

Елена Родионова вор-дӥськемын Вавож ёросысь Выль Бия гуртын. Тросcэ удмурт егитъёсты сямен ик, сое будэтӥз «Дась лу!» газет, «Шундыкар» лагерь. Университетысь удмурт филология факультетын дышетскыкуз, со ветлӥз Венгрие стажировкае. Алигес Венгриысь Этвеш Лоранд нимо университетысь аспирантураез быдэстӥз.

Нырысь ик со венгер кылбурчилэсь Аттила  Йожефлэсь  кылбуръёссэ берыктыны басьтӥськиз. Студент вакытъёсаз Дэжё Костоланилэн веросэзъя «Пыласькон» фильм учкемез бере та венгер авторен тунсыкъяськыны кутскиз.

Дэжё Костоланилэн вордскем кылэз утён сярысь сӥзем ужъёсыныз но малпанъёсыныз тодматӥз Венгриысь лыктэм егит ныл Эрика Асталош. Дэжё Костолани улон вакытэ — нырысетӥ дунне ож бере — Венгрилэн музъемъёсыз мукет кунъёс пӧлы пыризы. Венгер калыкез ышонлэсь, Европаысь мукет калыкъёс пӧлы сылмонлэсь вордскем кыл гинэ утёз, малпаз писатель.  «Калык аслэсьтыз кунгожзэ ыштӥз ке, уз кулы, нош вордскем кылзэ ыштӥз ке — быроз. Кунгожъёсты берен басьтыны луэ, нош анай кылэз уз лу берыктыны». Писательлэн малпанэз туала удмурт кыл понна туж тупамон луэ, шуиз Эрика.

Лариса Дмитриева

Удмурт Дунне
By Удмурт Дунне 17 октября, 2012 10:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<