Тӥледын данъяське шаермы!

Удмурт Дунне
By Удмурт Дунне 31 октября, 2012 07:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Тӥледын данъяське шаермы!

С. Шутов

Арлы быдэ Элькунмылэн нуналыз азьын выльдӥське Данъян пул. Отчы шедё шаермы понна тужгес азинлыко ужасьёс. Тодматонмес кутскиськом гуртоос бордысен.

Гурт предприятиен кивалтэ кандидат!
Глаз ёросысь «Чура» гурт предриятие республикаямы кемалась ини умой ужаменыз тодмо. Тани одӥг аре котькинлэсь трос сезьы басьтӥзы, мукетаз пудо сиён уно люказы, йӧл пуж-пуж кыскизы.
«Чуралэн» кузёез — экономика наукаосъя кандидат Пётр Першин — 2002-тӥ арын кивалтыны кутскем дырысеныз сюлмаське пудо вордон удысэз ӝутон сярысь. Сыӵе ик мылкыдын ужало та хозяйствоысь валтӥсь зоотехник Елена Егорова, зоотехник Любовь Первякова, фермаен кивалтӥсь Валентина Пермякова.

Чура фермаын тырше 13 скал кыскись (430 скалзы). 2007-тӥ-2011-тӥ аръёсы пудо вордонъя ёросын ортчылӥсь конкурсъёсын та коллектив вормисе потылӥз. Нош 2008-тӥ арын пыртэмын вал Глаз ёрослэн Данъян пул вылаз.
Та фермаысь специалистъёс но операторъёс арлы быдэ аттестация ортчо. Нош Ижысь гурт хозяйствоя академиысь преподавательёс соослы дышетон ортчытъяло. Татысь скал кыскисьёс юн чаклало пудо сюдонэз, вакцинацияя графикез, нимысьтыз саклык висъяське куняно скалъёслы.

Йӧл кысконэз йылэтон но йӧллэсь ӟечлыксэ ӝутон вылысь гидъёсазы туала гумыос кыскемын, танкъёс пуктэмын. Та выль тӥрлык трослы ужез капчиятэ, азинлыкез ӝутэ.
Коллективлэн ӟеч ужамез тужгес но шӧдӥськиз хозяйствое валтӥсь зоотехник Елена Егорова вуэм бере. Йӧл поттон трослы йылӥз. Тани 2010-тӥ арын котькуд скаллэсь шорлыдын 7 сюрс 592 килограмм кыскемын (ёросъя — 4 сюрс 546 килограмм), 2011-тӥ арын — 8 сюрс 335 килограмм. Та республикаын умой лыдпус. Соин ик Чура ферма миым ужамезъя шаерамы нырысетӥ инты басьтӥз. Туэ 8 толэзь ӵоже кыскемын ни 6 сюрс 226 килограмм (ёросъя 3 сюрс 645 килограмм).
Берло куинь арзэ чураослэн йӧлзы вылӥ сортэн вузаське. Йӧлэз эскерон вылысь фермалэн аслаз лабораториез вань.
Чураос мылысь-кыдысь тодмато ужан амалъёсынызы мукет хозяйствоосысь специалистъёсты. Кылсярысь, 2010-тӥ арын татын кунянъёсты будэтон ужпумъёслы сӥзем семинар ортчиз, туэ та выллем кенешон сӥземын вал ветылъёсын ужанлы. Чураысь скал кыскисьёс арлы быдэ «Йӧл кысконъя мастер» ёрос ӵошатсконъёсы пыриськыса, валтӥсь интыосты уто.

Тракторист — дышетӥсь
Можга ёросысь «Россия» гурт предприятиын Сергей Шутов ужаны кутскиз 1985-тӥ арысен Бадӟым Уча школаез йылпумъямез бере ик.

Нырысь нуналъёсысен ик ассэ умоен возьматӥз: уж борды мылысь-кыдысь басьтӥське, техникаез вала. Сергей пичи дырысеныз ялан атаез вӧзын ворттылӥз, тракторез но думет агрегатъёсты тупатъяны юрттылӥз.

— Солэсь адӟем карыса ик, механизаторлы дышетски, — вера Сергей Павлович. — Атае вӧзын ӟечгес тодӥ, тракторлэсь кыӵе ёзъёссэ утялтыса но кӧяса-вӧяса возёно.
Сергей Павлович арлы быдэ дышетске, квалификацизэ будэтэ. Со ӟеч вала: туала тодон-валанъёстэк азьпал ужан сярысь малпанэз ик ӧвӧл — машина-трактор парк ялан выльдӥське ук. Тужгес но со умой шӧдӥське Удмуртиысь бадӟым, кужмо хозяйствоын — «Россиын». С. Шутов быгатэ ужаны хозяйствоысь вань тракторъёсын но  ю утялтон комбайнъёсын.
Техникаез тодэм сяна, Сергей Павлович мыло-кыдо пыриське агрономилы сӥзем курсъёсы, дышетске  пӧртэм культураосын выль технологиосын ужаны. Люкам тодон-валанзэ сётэ практиказэс ортчылӥсь студентъёслы. Хозяйствоын со устоез дышетӥсь луэ.

Берло вить арзэ С. Шутов Можга ёросын устоез механизатор луэ, нош 2009-тӥ-2012-тӥ аръёсы ёросысь комбайнёръёс пӧлын вормисе потылӥз. Газ котельнойысь операторлы дышетскыса, толалтэзэ Сергей Павлович йӧл комплексэз шунтэ.
С. Шутовлэн усто тыршемез уно пол пусъемын Можга ёрослэн но Гурт удысъя но сиён-юонъя министерстволэн грамотаосынызы.

О. Куртеев

Нянь будэтӥсь котьку кулэ луоз
Олег Куртеевлэн ужан сюресэз кутскиз 1977-тӥ арын Яр ёросысь «Пудемский» совхозын.
Нырысь тыршиз фермаын огшоры рабочий луыса: выжъёсты сузяз-утялтӥз, пудолы сиён пыртылӥз, гидъёсты толлы тупатъяз. 90-тӥ аръёсы воштӥськонъёс кутскизы. Соку Олег Вячеславович малпаз: нянь, пудо сиён будэтӥсь котьку кулэ луозы. Озьы механизаторе дышетскиз. Ужаны ӧдъяз «Вятка» гурт предприятиын. Туэ огъя ужамезлы 35 ар тырмиз ни. Гурт предприятилэн кивалтӥсез С. Поздеев валэктэмъя, О. Куртеев вань ужъёсты дыраз быдэсъя. Умой тодэ техникаез. Туэ 8 толэзь ӵоже Т-150 трактореныз 960 гетар вылын ужъёс быдэстӥз.

Олег Вячеславович каньыл сямо, котьку юрттыны дась. Тани туэ сӥзьыл эшъёсыныз-механизаторъёсын ӵош ас мылкыдзыя Тум но Баяран гуртъёсысь урамъёсты тупатъязы. Соослэсь адӟем каризы на мукет хозяйствоосысь трактористъёс но.
О. Куртеев трос пол пусйылэмын гурт администрацизылэн данъян грамотаосыныз, 2007-тӥ арын солы сётэмын Гурт удысъя но сиён-юонъя министерстволэн данъян грамотаез.

Удмурт Дунне
By Удмурт Дунне 31 октября, 2012 07:27