Данэз басьтоно пӧсям вуэн но визьмын

Удмурт Дунне
By Удмурт Дунне 9 октября, 2012 12:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Данэз басьтоно пӧсям вуэн но визьмын

Н. Максимова

Дэбес ёросысь Сюрногурт шор ёзо школаысь удмурт кылъя но литературая вылӥ категориен визьнодась Надежда Максимова котькыӵе уж борды ӝабыр-ӝабыр басьтӥське, мытэм удыссэ пумозяз, тыро-пыдо быдэстэ. Удмурт Республикаысь дано дышетӥсьлы Сюрногурт калык куинетӥ созывзэ ини ёрос кенешлэн депутатэз луыны оскиз.

— Надежда Петровна, кинлэсь адӟем карыса, визьнодась луиды меда?
— Школаын умой дышетски. Котькыӵе предмет капчиен сётӥськиз. Дышетӥсьёсме но яратӥ. Соос ик мыным визьнодан удысэз гажан мылкыд пыӵатӥзы, луоз. Вордӥськем Сенькагуртам али кык-куинь корка сяна ӧвӧл ни. Покчи классъёсын милемыз кирос атае Александр Горнев визьнодалляз. Сыӵе мон сое яратӥсько вал. Пичиысен со кадь дышетӥсь луэме потылӥз. Монэ, пичи муртэ, ачиз роное кошкылыкуз, интыяз кельтылӥз.

Покчи классъёсты пыр потыса, дышетскыны мынӥ Аргуртэ. Татын удмурт кылъя но литературая дышетӥсьлы Ангелина Спиридоновалы синмаськи. Урокъёссэ Ангелина Николаевна туж ӟеч нуылӥз. Удмуртлыкез гажаны милемыз дышетӥз. Нылпиослы чурытэсь куронъёс пуктылӥз. Солэсь адӟем карыса ик, дыр, нылпиосты яратӥсько, одӥг нунал но соостэк улэме уг луы. Каникулъёс дыръя но пинал куараослэсь мӧзмисько, сюлэм школае кыстӥське. Школае ужаны лыктыкум, Ангелина Николаевна шутэтскыны кошкемын ни вал. Но со мыным вань методичкаоссэ сётӥз, мытэм ужам вормонъёс сӥзиз. Та кылъёсыз ик, оло, юрттӥзы азинсконъёс басьтыны.

— Вормонъёсты пӧлын Удмурт Республикаысь Президентлэн грамотаез но вань. Та тубатъёсы ӝутскон понна кытын тодон-валан люкады?
— Аргуртысь шор ёзо школаез йылпумъяса, пыри Удмурт кун университетысь удмурт филология факультетэ. Дышетскон туж кельшиз. Группамы кужмо вал. Визьмо нылъёсмы но пиосмы бӧрысь шаерамы тодмо адямиос луизы: Владимир Михайлов, Анастасия Гребина, Тамара Пояркова, Иван Аркашев.

Университет бере вордӥськем палъёсам ужаны бертӥ. Гуртэ соку бырон калэ вуэмын ни вал. Ӵапак со вакытэ Сюрногурт школаысь Мария Байметоваез Дэбес педучилищее басьтӥзы. Интыез буш кылиз. Монэ отчы ужаны лэзизы. Тӥни озьы 1978-тӥ арысен улон сюресэ Сюрногурт школаен герӟаськемын. Удмурт кылэз но литератураез нуэм сяна, дас куинь ар завуч луыса тырши.

— 2007-тӥ арын тӥледыз школалы кивалтӥсе пуктӥзы. Кудӥз ужды сюлэмдылы матынгес потэ?
—  Сюлэмыя мон завуч, дыр, малы ке шуоно кытысь ке мар ке выльзэ тодӥсько ке, ӝоггес дышетӥсьёслы вераме потэ ини. Соос но выль амалъёсты ужазы мед кутозы кадь. Дышетӥсьёслэсь мылкыдзэс ӝутыны тыршисько — пӧртэм ӵошатсконъёсы пыриськыны мед быгатозы. Урокъёсын пукыкум, визьнодасьёслэсь ужаны быгатэмзэс адӟыса, куддыръя синвуосы ик бам кузям васько. Сыӵе мон соос понна шумпотӥсько!

— Асьтэлэн но ӵошатсконъёсы пыриськылыны мылкыдды вань кадь?
— Мылкыд вань, дыр уг тырмы. Кивалтон удысын лачак ужъёс люкасько. Шумпотӥсько, аслам визьнодам нылы ик Оксана Калинина, со милям школаямы удмурт кыллы но литературалы дышетэ, алигес 50 сюрс манет утыны быгатӥз.

— Кин тӥледыз калыкен ужаны дышетӥз?
— Таиз ласянь бабаелы Калиста Матвеевна Калинаналы тау шуисько. Дышетскымтэ нылкышноез визьмо луэмез но визь-нод сётыны быгатэмез понна гурт калык гажа вал. Ми но сое юн яратылӥмы. Со котькинэн одӥг кыл шедьтылӥз, нокинэ вӧсь каремез ӧй вал, дыр. Бабамы инкуазез яратылӥз, милемлы но сыӵе сям пыӵатыны тыршылӥз. Пичи дырысеным нюлэскы огнам эмезяны ветлӥсько. Тылобурдоослэсь кырӟамзэс кылӥд ке, уд кӧшкема, шуэ вал со. Визьмо верамъёссэ али ке но йырам возисько. Тросэз соос зэмало. Табере ачим песянай ини. Бабае кадь лякыт луэме потэ.
Мон калыкез тоно-моно шуыса уг люкиськы. Котькуд адями ас сяменыз тунсыко. Сое кылзыны но валаны тыршисько. Уг яратӥськы пыриськисьёсты, адямиез урод карисьёсты. Удмурт калыклэн таӵе визьмо веранэз вань: «Улон даурлэсь одӥг куиньмоссэ ортчытэк, адямиосты эн курла».

— Тӥлесьтыд ужъёстэс ӵемысь адӟыны луэ «Вордскем кыл» журналлэн бамъёсысьтыз. Кызьы ваньмаз вутскиськоды?
— Мон вань удысъёсме ӵош лэсьтыны тыршисько. Ог-огзылы соос юртто гинэ кадь потэ. Ёрос кенеше вуыса, депутат ужъёсыным ӵош школаен герӟаськемъёссэ но быдэсъясько. Нош мумы-бубыосын но пиналъёсын вераськонъёс юртто ёрос кенеше дэмланъёс пыртыны. Мыным котьку но ӟеч адямиосын ужаны шуд усьылӥз. Ог-огедлы юрттыса, одӥг-огдэ валаса, тыршыны капчи ук. Уг яратӥськы коньдон курыса ветлыны. Озьы ке но кивалтон удысын котькыӵе югдурен пумиськоно луэ. Школаез тупатъян-выльдон понна вылӥ кивалтӥсьёслы ӵем вазиськылоно луылэ.
«Вордскем кыл» журналын методикая статьяосме печатласько. Мукет дышетӥсьёслэсь но ужъёссэс урокъёсам мыло-кыдо кутылӥсько. Яратӥсько лыдӟиськыны. Соку мон котьку но киям ручка яке карандаш возисько. Тунсыко чуръёсты блокнотам гожтӥсько.

Яратӥсько визьмо адямиосын вераськыны. Соосын кенешыса, выль малпанъёс вордӥсько. Урокъёсам ӵемысь ӧтчасько удмурт писательёсты но артистъёсты, ёросысьтымы но гуртысьтымы данэ потэм адямиосты, гурт удысын тыршисьёсты.

Мар ке малпасько ке, одно ик сое йылаз-пумаз вуттыны тыршисько. Уг ке вуиськы, мукетъёслэсь юрттэт курисько. Коллективенымы тупаса улӥськомы, котькыӵе ужмес ӵош быдэсъяськомы. Дышетӥсьёсмы ас удыссэс ӟеч тодо, соин ик огъя ужмы интыысьтыз котьку но вырӟе.  Кылем арын коллективмы ёросысь данъян пул вылэ но шедьылӥз, республиканской экспериментальной площадка усьтэмын выль стандартъёсты пыӵатон вылысь. Ёрос семинаръёсмы но ми дорын ӵемысь гинэ ужало. Мынам бур киы — завуче — Зинаида Королёва. Физикаен дышетэ со, визьмо, егит, котькыӵе уж борды валаса но быгатыса басьтӥське.

Школаямы 16 пала кружокъёс ужало. Туж бадӟым но узыр музеймы вань. Шумпотӥсько, туэ 47-зэ укноосмес воштыны быгатӥмы, 39-эз кылиз на. Выж-вӧлдэтъёсмес, спортзалмес выльдӥмы. Азьланьын малпаськомы чагыр эстӥськон пыртыны.

Тупаса улӥськомы «Мир» СПК-ысь кивалтӥсьёсын, котьма ласянь ог-огмылы юрттӥськом. Поселенимылэн йырыз Олег Байдалин но милемыз уг вунэты.

— Удмурт кылэз но литератураез дышетӥськоды бере, тӥ тодӥськоды, дыр, кыӵе луыны кулэ анай кылэз дышетӥсь?
— Шаертодонъя урокъёсты но нуисько на. Удмурт кылъя урокъёс огшоры грамматикаез дышетон понна гинэ медаз луэ вылэм. Анай кыл пыр пиналъёсмес визьнодано калыкмылэсь лулчеберлыксэ валаны, соин данъяськыны. Нылпиослы вашкалаосмылэсь сям-йылолъёссэс пыӵатон бордын ужано. Син азям пуктыны ик уг быгатӥськы, удмурт кылын дышетӥсь лек сямо, керӟегъяськись мед луоз шуыса. Со лякыт луыны кулэ.

— Надежда Петровна, ялан уж сярысь гинэ вераськиськомы. Кузпалдылы кельше-а уж пӧлы выем адямиен улыны?
— Ӵош улыны кутскыкумы, Геннадийлы секыт вал мыным дышыны. Солы но, нылпиосылы но ӧжыт саклык висъялляй. Нырысетӥ интыын уж вал. Егит дыръям Аргурт школаын комсомол организацилэн секретарез вал. Котькуд толэзь, ог кызь копейка пала взнос бичаса, Дэбесэ нуисько вал. Райкомын ужасьёс кин ке сьӧры гинэ келяса лэзь, шуылӥзы. Но мон оскем ужез пумозяз ачим ик быдэстылӥ. Али ке но сыӵе сямылэсь ӧй куштӥськы.

Отӥяз кузпалы ужме валаны кутскиз, воштӥськиз. Геннадий колхозын тракторист луыса ужа. Трактореныз я мотоциклэныз сьӧрлось гуртъёстӥ монэ нылпиослэн анай-атайёссы дортӥ нуллылӥз. Кенешыса, ог-огенымы тупаса улӥськомы. Гуртын пудотэк улыны уг луы. Соос котырын но Гена ачиз ик берга. Жаляса верано, кыкез ик пиосы, Алёша но Денис, шудтэм учыре шедьыса, улонысь кошкизы. Со кайгулы медам сётскы шуыса ик, лэся, эшшо но золгес уж пӧлы выйыны тыршисько. Милемыз шумпоттэ но улыны кужым сётэ Настя нылмы но 5 нуныкайёсмы.

Любовь Тихонова

Туспуктӥз Владимир Беломорских

Удмурт Дунне
By Удмурт Дунне 9 октября, 2012 12:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<