Ӵукнаысен ӝытозь

Удмурт Дунне
By Удмурт Дунне 16 октября, 2012 10:09

Ӵукнаысен ӝытозь

Баграш-Бигра гурт

14-тӥ коньывуонэ мон одӥгаз участокын, Пичи Пурга ёросысь Баграш-Бигра гуртын, чакласькисьын пуки.

Быдэс республикаын сямен Пичи Пурга районын Кун Кенеше шедён понна 11 партиос вожвылъяськизы. Со сяна, 6 адями — одномандатникъёс — депутатэ мертаськизы на. Пӧлысьтызы витьсэ партиос ӵектӥзы, нош одӥгез ас мылкыдызъя пыриськиз. Пусйысал на: куинез кандидат Ижкарысь. Гурт калык соосты уг ик тоды. Трос меда куара соос понна сётозы?

Бигралась 25/23 номеро быръён комиссие пыриз 9 адями. Соос бырйисьёсты пусъё, бюллетень сёто, со сяна, доразы куаразэс сётыны мылкыд каремъёс доры потало. Участокын пукизы 4 наблюдательёс — соос споръяськон учыръёсы малпанзэс вераны быгато.

Участокъя куаразэ сётыны кулэ 752 адями. Соос пӧлысь дас куинез открепительной удостоверение басьтӥллям, кызез доразы ӧтизы, нош куатез нырысьсэ куара сётыны быгато. Соослы юромо синпель кузьымъёс дасямын: ручка, удмурт гербен магнит но кисыын нуллон календарь.

Тямыс часын быръён комиссия ӧсъёссэ усьтӥз. Соку ик бырйыны мылкыд кариз ини 3 адями. Уже дырто, вылды, куаразэс сётытэк кылемзы уг пот.

Укмыс час бере участоке семьяеныз вуиз Пичи Пурга ёрослэн йырыз Александр Ерохин. Со но татын куара сётэ — угось улэ Баграш-Бигра вӧзысь Орлой гуртын.
Нуназе котыр калык тросгес люкаськиз. Соос куаразэс гинэ сётыны уг пото, шӧдске, концерт но адӟыны мылкыд каро. Клубын ужасьёс но школаын дышетскисьёс бырйисьёсты шумпоттӥзы шулдыр удмурт кырӟанъёсын.

Куинь часын куара сётыны пыразы городысь кык кузя бертэмъёс. Таосыз открепительной удостоверениоссыя бырйыны быгато партиосты гинэ.

Куинь час дас минутлы куара сётӥз ини 393 мурт. Со 50 процентлэсь ятыр луэ. Озьыен, калык вала, куаразы мултэс уз луы шуыса.

Ньыль час котырын адями кулэсмиз. Участокын шыпытгес кариськиз. Но час ортчыса, югдур воштӥськиз. Я кык, я куинь кузя вуо. Таосыз уж бере кожало ини.

Сизьым час тырме. Ачим но куара сётоно кариськи. Нош быръёнлэн берпуметӥ часаз гуртоос выльысь лыктыны кутскизы. Вить минуттэк тямыс. Пинал пиосмурт пыре на. Комиссиын пукисьёс «чалякгес» шуыса, серемпыр дыртыто сое.

Ӧс ворсаськиз. Кутскиз нуналлэн тужгес тунсыко вакытэз — куара лыдъян. Нырысь ик кылем бюллетеньёсыз чотазы но бинялтӥзы — табере соосты пусйыны уз ни луы. Собере пичи урнаез усьтӥзы. Отын — быдэн кызь лемлет но чагыр бюллетеньёс. Таоссэ лыдъяса, участокын сылӥсь урнаез усьтӥзы. Отысь туж трос кагаз ӝӧк вылэ кисьтӥськиз. Бюллетеньёсты лыдъяны кутскизы — бумагалэн ӵаштыртэмез гинэ кылӥське на. Сюлэм золгес кокаське — кин меда кӧня куара люказ?

Бюллетеньёс чотамын — одӥг мандатъем округын мынӥсьёс пӧлын, 298 куара люкаса, вормиз Бронислав Ясонов. Ижкарысь кандидатъёс быдэн дас куара но ӧз люкалэ — кин мурт адямилы куаразэ сётоз.
Вань партиосты азьпалтӥз «Огъя Россия» — 276 куара сётӥллям бырйисьёс. Быдэн одӥг куара палдӥз «Альянс Зелёных — Народная партия» но «Города России» партиослы нокин синмаськымтэ «Яблоколы».

Озьы кылем арнянуналэ 521 адями — ог 70 процентэз калык — быръёнэ пыриськиз. Конституциен сётэм правозэс дунъязы куинез гинэ егит бырйисьёс.

Анжелика Петрова,
Удмурт кун университетын дышетскись

Туспуктэмез: avi.udm.ru

Удмурт Дунне
By Удмурт Дунне 16 октября, 2012 10:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<