Чингыли улля висёнэз

Удмурт Дунне
By Удмурт Дунне 31 октября, 2012 06:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Чингыли улля висёнэз

Кужмо нюръяськон пуромиз воргоронъёс но Е. Наговицына вискын

Кылем арнянуналэ Иж город админиcтрацилэн юртэз котыре трос спортсменъёс люкаськылӥзы. Пыдын бызьылӥсьёслэн кубок понна нюръяськонзы йылпумъяськиз Удмуртилэн кунлык басьтон нуналэзлы сӥзем ӵошатсконэн.

Кубок понна бызьылон арлы быдэ радъяське. Ӵошатскон ортче тямыс люкетэн, нырысетӥез старт сётӥське апрель толэзе, берпуметӥез — октябрь толэзь пумын я ноябре. Котькинлэсь трос очко люкам спортсменъёслы удалтэ Удмуртилэсь кубоксэ басьтыны. Кызьы пусйиз шаерысьтымы Капчи атлетикая федерациен кивалтӥсь Валерий Сунцов, та ужрадэ  мыло-кыдо пырисько артысь улосъёсысь атлетъёс. Берпуметӥ люкетаз но трос спортсменъёс вуизы Чайковский, Нефтекамск но Киров городъёсысь.

Бызьылӥзы спортъя мастеръёс но спортэз яратӥсьёс. Пӧлазы 1,5 иськем бызисьёс но вал, 15 иськем но. Ӵошатсконэ пыриськизы Россилэн чемпионатаз медаль басьтэмъёс: Фёдор Шутов но Елена Наговицына. Та вакытэ кыкназы ик дуннелэн чемпионатэзлы дасясько, кудӥз ортчоз вуоно арын август толэзе Москваын. Таӵе бадӟым ужрад Россиын нырысьсэ луоз. Удмуртиысь кивалтӥсьёс оско, шаерысьтымы кык мурт ке но отчы шедёз шуыса.

Елена Наговицына Лондонын Олимпиадае пыриськем бере Удмуртиын пыдын бызьылыны мылкыд карисьёслэн лыдзы йылӥз. Таяз стартэ сюлэсь ятыр спортсменъёс люкаськизы. Кужмо нюръяськон пуромиз воргоронъёс пӧлын, нырысь ик кужмо бызизы Василий Глухов но Александр Зямбеков. Финише вуон азьын соосты азьпалтӥз Фёдор Шутов. Со понна нылъёс пӧлын соку ик тодмо луиз вормисьлэн нимыз. Елена Наговицына эшъёссэ быдэс круглы азьпалтӥз. Та ӵошатсконын паймытӥз Глаз ёросысь Понино черкогуртысь 14 аресъем Настя Урсегова. 15 иськемез огшокчемен бызиз, Ижысь студентъёсты но азьпалтӥз.

— Быдэс автобусэн лыктӥмы, — шуэ Настялэн тренерез Валентина Кунаева. — Куинез пиналмы одӥг круг бызиз, нош тямысэз — 15 иськемез. Нылпиосмы туж сюлмоесь но кужмоесь, тренировкаосын мыло-кыдо бызьыло. Кылем арын та ӵошатсконын вормисе потӥз вал милям дышетскисьмы Наталья Болтачева. Ас вакытаз школаямы куасэн бызьылӥсьёсты, биатлонистъёсты дасяй. Анна Кунаева но мынам дышетэм пиналэ. Жаляса верано, инвентарь дуноямен, куасъёсмес воштоно луимы огшоры кроссовкиослы.

Пыдын бызьылӥсьёс пӧлын висъяськиз аспӧр-тэмлыко дӥськутэн спортсмен. Ижысь Андрей Игошин дасо аръёс пала «Италмас» спортклубын мугорзэ кыдатэ, нош солэсь азьло юн висем. Табере со инфарктлэсь пега. Россиын ортчылӥсь марафонъёсы пыриське, пыдъёсаз чингылиос думыса.

— Чингыли куара висёнэз улляны юрттэ, — шуэ спортсмен. — Со сяна, финише вуон азьын котьку но Удмуртилэсь флагзэ кутӥсько. Россиысь вань спортсменъёс кытысь луэмме тодо. Бызьылыны яратӥсьёс ужзы бере юри стадионэ ветло, нош мон уж дорам ик кык кечез кутӥсько. Почтаын ужасько, телеграммаос нуллон сямен ик бызьылӥсько.
Кубоклэн кузёосыз шедизы. Сое утӥзы Можгаысь Павел Титов но Уваысь Надежда Боброва. Кубок понна нюръяськонын котькуд стартэ мыло-кыдо пырисько арлыдоос. 15 иськемез пумозяз ортчизы Можга ёросысь 78 аресъем Николай Смолин но Вавожысь 76 аресъем Юрий Протопопов.

Пыдын бызьылӥсьёслэн кырын ӵошатсконъёссы йылпумъяськизы, табере соос вожвылъяськозы липет улын. Кызьы пусйиз Валерий Сунцов, ортчытоно ужрадъёс трос, нырысь ик дасяськоно, пе, дуннелэн чемпионатэзлы. Тросэз спортсменъёс вылӥ азинсконъёс басьто гурезетӥ бызьылонын. Та нуналъёсы гинэ Россилэн чемпионатысьтыз азвесь медальёсын вуизы Удмуртиысь Наталья Болтачева, Ирина Коровина но Алексей Зямбеков. Гурезетӥ бызьылонъя ӵошатсконъёс Дэбесын умой радъясько бере, Россилэсь чемпионатсэ сяна, дуннелэсь чемпионатсэ но ортчытон сярысь малпасько ни. Удмуртиысь кивалтӥсьёс та пумысен мылкыдъёссэс Россиысь но дуннеысь спортъя комитетъёсы ивортӥзы. Кылиз на соглаш кариськемзэс витьыны.

Валентина Емельянова

Туспуктӥз Владимир Беломорских

Удмурт Дунне
By Удмурт Дунне 31 октября, 2012 06:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<