Ӵашетон мӧзмыны уг сёты

Удмурт Дунне
By Удмурт Дунне 31 октября, 2012 06:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӵашетон мӧзмыны уг сёты

Нациосын ужан политикая, кышкытлыклэсь утиськонъя, регламентъя но Кун Кенешлэсь ужзэ радъянъя комиссилы тӧрое быръемын Энвиль Касимов

Арня вис карыса, азинскиз Кун Кенешлэн нырысетӥ сессиез. Таяз радэ депутатъёс бырйизы ялан ужась комиссиослы тӧроосты.

Парламентлэн кылемаз ӧтчамаз сямен ик ялан ужась комиссиос 8 кылизы. Зэм, ӝыныезлы кивалтӥсе выль адямиос пуксизы. Но пусъёно созэ: 5 комиссилы тӧро луизы нылкышноос — нош парламентын кенакъёс ваньмыз 12 гинэ. 3-яз комиссиосын кивалтозы воргоронъёс. Верано на: вань та адямиосты ӵектӥз «Огъя Россия» фракция. Кун Кенешысь мукет фракциос — «КПРФ» но «ЛДПР» — асьсэлэсь кандидатъёссэс ӧз дэмлалэ.

Вань тӧроос — 50 арессэс вамыштэмъёс. Кылсярысь, Энвиль Касимовлы но Софья Широбоковалы 51 арес. Комиссиен кивалтӥсьёс пӧлысь мӧйыэз — Наталья Кузнецова — 59 арес.
Таяз парламентын Тӧролэн кык воштӥсез — Светлана Кривилёва но Владимир Невоструев. Озьы ке но та кык мурт кивалтоз на нимаз комиссиосын но. Тазьы ужез радъян туж шонер — уго Кун Кенешын коньдонэз чотаны быгато, озьыен, мултэс мурттэк но ужзэс нуыны вормозы.

Интыяз кылиз Наукая, дышетонъя, культурая но егитъёсын ужан политикая комиссилэн тӧроез Наталья Сударикова. Сессие вуэм 75 депутат пӧлысь 64-ез со понна куаразэс сётӥзы. Судариковалэн комиссияз ужаны мылкыд каремзэс веразы Удмурт депутатъёсмы — Андрей Ураськин, Пётр Данилов, Эдуард Петров.

Озьы ик трос куара — 62 мурт — люкаса, комиссилы йыр луиз Софья Широбокова. Табере со 4-тӥ созывзэ кивалтоз Бюджетъя, вытъя но коньдон ужпумъёсъя ялан ужась комиссиен.

Экономикаысь политикая, промышленностья но инвестициосъя ялан ужась комиссиез валтоз Владимир Варламов. Со понна 50 депутат куаразэ сётӥз. Азьвыл та комиссиен кивалтӥз Андрей Гальцин. Со таяз радэ но депутат луиз, озьы ке но «Огъя Россия» фракция сое комиссилы тӧрое ӧз ӵекты.

Социальной политикая ялан ужась комиссилы тӧрое быръемын Ольга Казанцева. Таиз нылкышно берло ӧтчамын ужаз Наукая, дышетонъя, культурая но егитъёсын ужан политикая комиссилэн тӧроезлэн воштӥсез луыса. Казанцевалы оскемзэс депутатъёс 61 куараен юнматӥзы.

Витьымтэ луизы мукетъёсыз кандидатъёс. Кылсярысь, Нациосын ужан политикая, кышкытлыклэсь утиськонъя, регламентъя но Кун Кенешлэсь ужзэ радъянъя комиссилы тӧрое быръемын Энвиль Касимов. Кылемаз созывын со «ЛДПР»-лэн фракцияз пыриз, таяз радэ «Огъя Россилэн» списокезъя депутатэ потӥз. Соин парламентын пукисьёс таӵе кандидатлы огкадь ӧз шумпотэ — 17 мурт пумит луэмзэ вераз, 52 депутат ӟечен лыдъяз.

Йыр висёнэн берытскиз мукетыз ӵектон. «Огъя Россия» дэмлаз Кун лэсьтӥськонъя но интыысь аскивалтонъя комиссилы тӧрое Наталья Кузнецоваез. Нырысь-валысь со понна 43 мурт гинэ куаразэ сётӥз. Комиссиен кивалтыны та луонлык уг сёты — регламентъя ӝыныезлэсь тросэз депутатъёс кандидат понна дурбасьтыны кулэ. «Огъя Россия» фракциысь куд-огез депутатъёс ӧз танӥське — ӧм быръе, малы ке шуоно кылемаз ӧтчамын Кузнецова мукет партилэн адямиез вал, мылкыдъёсыз воксё мукет ӧретӥ мынӥзы. Озьы ке но кыкетӥ ползэ куара сётон радъяськиз на. Татын Наталья Кузнецова понна 45 мурт дурбасьтӥз ни — 89 депутатъёс пӧлысь ӝыныезлэсь тросэз (нялтас вераса, парламентысь кошкон сярысь куриськон кытћ-мар гожтӥз ни депутат Алексей Фарафонтов).

— Туннэ тросэз выль депутатъёсмы парламентын ужзэс мыто. Соин куддыръя мае ке пумозяз уг на валало. Зэм, таӵе ӵашетон мӧзмыны уг сёты. Адямиос Кун Кенешын пӧртэмесь, соин дышомы вожвылъяськонлы, — вераз парламентлэн Тӧроез Александр Соловьёв.

Та сессиын ик депутатъёс бырйизы, кыӵе комиссилэн ужаз пыриськозы. Тужгес трос — 15 мурт — куриське Владимир Невоструевлэн Гурт удысъя, музъем кусыпъёсъя но инкуазез утёнъя ялан ужась комиссияз. Соос пӧлын ик удмуртъёс но — Бронислав Ясонов, Владимир Красильников, Елена Чиркова.

Паймымон кылиз мукетыз: одӥг удмурт депутат но куриськон ӧз гожты Нациосын ужан политикая, кышкытлыклэсь утиськонъя, регламентъя но Кун Кенешлэсь ужзэ радъянъя комиссие. Татчы али 5 мурт пыре — ӟучъёс но бигеръёс.

Елена Скворцова

 

Удмурт Дунне
By Удмурт Дунне 31 октября, 2012 06:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<