27 ватсан: кулэ-а, ӧвӧл-а?

Удмурт Дунне
By Удмурт Дунне Октябрь 10, 2012 14:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

27 ватсан: кулэ-а, ӧвӧл-а?

Уставе воштонъёсъя кенешон

«Удмурт кенеш» ужа Уставаз воштонъёс пыртон бордын но дасяське Вань удмуртъёслэсь съездзэс ортчытонлы.

Трокай Борисовлы синпелетэз сӥё-дано усьтэм бере «Удмурт кенеш» огазеяськонлэн исполкомезлэн ёзчиосыз дыртӥзы асьсэ заседаниязы. Кенеш ӝутскем мылкыдын кутскиз. Зэм но, кема возьмам бадӟым уж — Трокайлы синпелетэз ӝутон — быдэсмиз. «Кенешчиос» тодо: со капчиен ӧз сётӥськы. Синпелетлэсь зэмос кулэлыксэ, дунлыксэ азьланяз, оло, золгес валалозы удмурт интеллигенция но, егитъёс но.

Исполкомын нырысь ик аспӧртэм анализ лэсьтэмын вал толэзь талэсь азьло Венгриын ортчем 6-тӥ фин-угор конгресслы. «Удмурт кенешлэн» кивалтӥсез Николай Мусалимов шумпотэмзэ вераз: нырысьсэ конгрессын вань калыкъёслэн делегациоссы докладъёссэс анай кылынызы лыдӟизы. Но со дыре ик кивалтӥсь ӧпкелиз: ми возьмамы кыӵе ке огъя лэсьтэм докладэз, мар лэсьтэмын берло ньыль ар ӵоже азьвылэз фин-угор конгресс ортчем бере? Сыӵе доклад дасяны кулэ вал Фин-угор калыкъёслэн Консультативной комитетсы. Но солэн кивалтӥсез Валерий Марков малы ке рос-прос ивортон ӧз лэсьты. Таиз ласянь Мордовиын конгресслы дасяськон конференция кужмогес вал.

Озьы ке но конгрессын Консультативной комитетлы кивалтӥсе нош ик быръемын Коми Республикаысь адями — Валерий Марков. Паймоно кадь, мукет кандидатураос сярысь вераськон ӧз ик ӝутӥськы.
Фин-угор конгрессэ удмуртъёслэн нимынызы 30 адями вуылӥз, укмысэз соос пӧлысь — «Удмурт кенешлэн» исполкомаз пырисьёс. Быдэс дуннеысь фин-угор калыкъёслэн кенешонъя ёзазы — Консультативной комитетэ — али удмуртъёслэн кык адямизы пыре: «Удмурт кенешлэн» кивалтӥсез Николай Мусалимов но Ижысь медакадемилэн ректорез Николай Стрелков. Соос комитетын ужалозы ай туэ декабре ортчоно Вань удмуртъёслэн 12-тӥ ӧтчамзы дорозь. Нош съездын соос интые выль адямиосты бырйыны быгатозы.

Исполкомлэн бадӟым люкетэз сӥземын вал «Удмурт кенешлэн» Уставаз воштонъёс пыртонэн. Улон азинскемъя соос туж кулэ луо. Уставе оглом дэмламын вал 27 ватсан но воштон пыртыны. Соосты эскериз «кенешчиослэн» нимысьтыз комиссизы. Исполком ваньмызъя мылкыдзэ вераз. Шуом, «кенешчиос» огкылысь луизы, ассоциацилэсь нимзэ гожтыку, кенеш кылзэ бадӟым букваен каронлы — «Удмурт Кенеш».  Нош Уставлэн кыкетӥ статьяяз, быдэстоно ужъёс пӧлы, дэмламын кык выль пункт пыртыны: общественной кылзонъёсты радъян, общественной экспертизаосты ортчытон.

 

Уставъя татчыозь «Удмурт кенеш» ассоциацилэн ёзчиосыз (ассоциативные члены) вал: «Дэмен», «Шунды» огазеяськонъёс, Удмурт нылкышно кенеш, Удмуртилэн палэназ улӥсь удмуртъёслэн национально-культурной огазеяськонъёссы но «Усьтэм фин-угор университет» движение. Туннэ нуналлы Усьтэм фин-угор университет ӧвӧл ни шуыны луэ, соин ик Уставысь сое поттыны чакламын. Со дыре ик «Удмурт кенешлэн» бурд улаз кӧня ке аръёс ӵоже ужа ни Камсьӧр удмуртъёслэн огазеяськонзы. Нош Уставын со пусйымтэ. Озьыен, пыртоно.

Та юанъёсъя ваньзы огкылысь луизы ке, ассоциацилэн кивалтон ёзъёсыз пӧлы кенешон (согласительной) комиссиез пыртонлы пумит кариськизы. Малы? «Удмурт кенешлэн» кивалтон ёзъёсаз, Быдӟым ӧтчам (съезд), Тӧро (ассоциацилэн кивалтӥсез), солэн воштӥсьёсыз сяна, сотэк но аспӧртэм кенешон ёзъёс пыро ни — исполком но Пичи кенеш. Кулэ на-а эшшо маке выльзэ кылдытыны? Исполкомчиос пусйизы: туж кулэ луыку, согласительной комиссия огдырлы люкалляны луоз ик. Но со понна Уставе воштонъёс пыртоно меда?
Мукетызлы ӵектонлы ваньзы сямен дурбасьтӥзы: «Удмурт кенешлэн» президентэз, та ассоциациен кивалтон вакытаз, политической партиослэн ужазы медаз пыриськы, аслаз ужаз огезлы но партилы дурбасьтэмез сярысь медаз вера.

Нош мар кароно, «Удмурт кенешлэн» ёзчиез ассоциацилэсь нимзэ юромо саптаны, солы изъян вайыны выре ке? Татчыозь Уставын гожтэмын вал: сыӵе муртлы алон, выговор сётыны луоз яке ассоциацилэн радысьтыз поттоно. Дэмланъёс вал судэ сётон но югдурез утисьёслы вазиськон ласянь. Исполком тазэ мултэсэн лыдъяз. Со понна изъян ваён пӧлы пыртыны ӵектӥз моральный вред шуонэз. Угось таиз кытӥяз тупатонтэм шугадӟон вайыны быгатэ.

Уставе воштонъёсты 16-тӥ октябре пыр-поч эскероз на Пичи кенеш. Но со бӧрсьы но ёросъёсысь, каръёсысь кенешчиослы ганяк кариськыны маза уз луы. Туэ 20-тӥ ноябрёзь соос отчётно-перевыборной конференциоссэс радъяно луозы. Соку ик быръёзы Вань удмуртъёслэн туэ декабре ортчоно ӧтчамазы делегатъёссэс. Исполкомын котькуд ёрослы квотаос юнматэмын вал. 12-тӥ съездэ вань ёросъёсысь но удмурт диаспораосысь оглом 450 адями вуыны кулэ.

Елена Миннигараева

Удмурт Дунне
By Удмурт Дунне Октябрь 10, 2012 14:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<