Ческыт шӧмо вышкы

Удмурт Дунне
By Удмурт Дунне 3 октября, 2012 17:20

Пу вышкы, бекче лэсья Кизнерысь киужъёсъя центрын ужась Николай Устюгов.
Вордскемын со 1970-тӥ арын та ёросысь ик Асинер гуртын. Ёрос центрысь школаез йылпумъяса, дышетскыны пыриз Ижысь гурт хозяйствоя институтэ.

— Маке но ӧз кельшы отын мыным, кык курсэз йылпумъяса, куинетӥяз ӧй мыны ни, — шуэ Николай Анатольевич. — Ужаны интыяськи «Удмуртмелиорацилэн» ёросысьтымы ёзаз. Отын ик механизаторе дышетски но кӧня ке арзэ тракторен ужай, гур эстћсь луыса но тырши. Собере ма но со лэсьтылыны кутски. Нош бӧрысьгес юрттыны ветлӥсько вал ни кибашлыослэн юртазы. Отысь мастер кошкиз но монэ ужаны ӧтизы. Озьы татын тыршемелы туэ 16 ар тырмоз ини.

— Нырысь ик мар бордысен кутскиды?
— Нылкышноос куремъя рамаос лэсьтыны кутски. Нырысь кык нуналскын одӥг рама лэсьтӥсько вал, нош али нуналаз 4-5 пӧрмытӥсько ни. Та вакытэ секытгес ужъёс борды басьтӥськи. Туйлэсь сарбаослы пыдэсъёс, ворсэтъёс, кутонъёс лэсьтӥсько. Нимысьтыз ветлӥ вышкы ужлы дышетскыны, озьы кутски пичиесь но бадӟымесь бекчеос, кружкаос лэсьтыны. Центрамы токарной станок басьтэммы бере сусыпулэсь шкатулкаос дасяны кутски.

— Нош кызьы сусыпулэсь пӧрмытӥськоды? Та писпу зӧк ӧвӧл ук?
— Мон пичиесьгес шыкысъёс лэсьтӥсько, кылсярысь, зундэсъёслы но мукет векчи арбериослы. Нош бадӟымзэгес курисьёс луо ке, лякылыса пќрмытӥсько. Сусыпулэсь чебересь арбериос пӧрмо, буятэк но яра — аслаз  аспӧртэмлыко суредъёсыз  вань. Нош ческыт зыныз быдэс корка лӧсъяське, омыр ик воштӥське.

— Мукет арбериослы кыӵе писпуосты уже кутӥськоды?
— Тани укно рамаослы мыно лысо писпуос: кыз, пужым, ньылпу. Токарной станокен ужакум, кутӥсько чурыт писпуосты. Шуом, наличникъёслы умойгес тупа беризь.

— Нош вышкыослы?
— Соослы но беризь. Мукет писпуослэсь вышкыосын сылалтэм сиёнъёс но, чечы но шӧмзэс ышто. Кызьпу, пипу вышкыын вань сиёнъёс  кузял луо, нош беризь ачиз ческыт шӧм сётэ.

— Ма кулэ вышкы лэсьтон понна?
— Вашкалаос кӧто вышкы лэсьто вал, пулъёссэ куасалтыса. Мон озьы одӥгзэ лэсьтӥ. Но со туж кема но секыт. Капчигес дасяны шонер пулъёсын. Со понна нимысьтыз станок бичай. Нырысь пулъёс поттӥсько, собере дуръёссэ лусйисько, пыдэс лэсьтӥсько. Со понна паськыт пул кулэ.

— Нош кесэгъёслы ма мынэ?
— Бадьпу ньӧр. Сое куасалтыны но, керттыны но луэ. Вышкые быдэсак дась ке, мон сое сюсен маяллясько. Озьы вышкыысь номыр уз вия ни.

— Лэсьтэм ужъёстэс кытчы кариськоды?
— Куд-огъёссэ адӟытонъ-ёсы поттылӥськом, куд-огъёссэ калыклы вузаськом. Мынам дорам но мастерское вань. Отын тросгес вышкыос лэсьтӥсько. Сое уноез куро чечы возьыны.

— Пуэн ужан понна писпуэз ку дасяно?
— Нюлэс предприятилэсь пу басьтӥськомы бере, соосъя ик кариськиськомы ни. Кыӵе дыре материалзы луэ, соку ик басьтӥськомы.

— Пиналъёсты тӥлесь-тыд адӟем каро-а?
— Бадӟымез пие Сергей, армиысь бертыса, ИжГТУ-е дышетскыны пыриз, пичиез Владислав училище бӧрсьы армие мыныны дасяське. Отысь бертыса, дышетсконзэ азьланьтыны медэ. Соос тунсыкъясько ужъёсыным, но асьсэлэн выремзы уг поты. Оло, азьланяз адӟем карозы ай.

Иван Аркашев

Удмурт Дунне
By Удмурт Дунне 3 октября, 2012 17:20