Кин жадиз, кин куаразэ жаляз

Удмурт Дунне
By Удмурт Дунне 16 октября, 2012 09:42

Кин жадиз, кин куаразэ жаляз

Дэри ёросысь Пероггуртысь быръёнъёсъя участокын

Сӥзьыл нунал чебер тупаз, ӧз зоры ке но, быръён участокъёсы калык котькытын огкадь мыло-кыдо ӧз мыны — 10 часозь 5,84 процентэз гинэ куара сётӥзы.

5 ар талэсь азьло быръёнъёсын ӵошатыса, та лыдпус быдэс процентлы ӧжытомиз. Со понна шаплы кариськиллям алнашъёс.

— Алнаш районысь 12,5 процентэз бырйисьёс куара сётӥзы ни. Соос сьӧры уйисько балезиноос но киясаос, — ивортӥз 11 часын брифингын Удмуртиысь Быръёнъя валтӥсь комиссилэн тӧроез Виктор Кушко.
Участокъёсы мылкыдтэк мынӥзы Ижын (3,4 процент) но Сарапулын (4,3 процент).

Быръёнъёсы шаплы пыриськеменызы ӧз висъяське Дэри ёросысь Пероггуртын улӥсьёс но. 10 часозь куара сётыны вуиз 62 мурт гинэ. Нош УИК-лэн тӧроез Мария Поздеева верамъя, участоке пыре 2 сюрс 383 бырйись. 8 часын ӵукна но черод ӧз кылды. Пероггуртъёс кылем быръёнъёсы ӟеч вуизы вал — 63 процентэз сюлмаськиз Россилы Президент понна куаразэ сётыны.

— Котькудаз быръёнэ пыриськисько. Мон кыкетӥ группаен инвалид, гурт пумын улӥсько, бодыен ке но — лыктӥ. Куараме юнме мурт понна уг сётӥськы, кельшись кандидатэз умой тодӥсько, — шуэ 78 аресъем Алексей Васильевич Иванов.

Депутатлэн мандатэз понна Дэри ёросын 7 одномандатникъёс вожвылъяськизы. Улӥсьёс таос пӧлысь ӝынызэ но уг тодо. Андрей Осколков, Николай Суворов соослы тодмо, нош мукет нимтулъёс номыр но уг верало, вылаз ик, куд-ог кандидатъёслэн туспуктэмъёссы но стенд вылын ӧвӧл.

Бадӟым вожвылъяськон тупаз партиослэн списокъёссыя мынӥсь кандидатъёс вискын. Кылсярысь, «Огъя Россилэн» списоказ пыриз «Айкай» театрлэн кивалтӥсез Пётр Данилов. Нош коммунистъёслэн радазы — Василий Афанасьев, таиз берло 5 арзэ Кун Кенешын депутат вал.

— Быръён нунал дорозь берпуметӥ арня кылемын на вал. Малпай, кандидатъёс асьсэды туж чебер возё шуыса, — вера Пётр Данилов. — Нош берло нуналъёсы мылкыды воштӥськиз, пумит мынӥсь адямиос паймытӥзы асьсэлэн выросъёсынызы, верамъёсынызы. Депутат луыса, малпасько, быгатысал уже кутыны аслэсьтым улон-вылонэз, культураез тодэмме. Удмурт Республикаын одӥг ветлымтэ интые но кылемын ӧвӧл. Лыдъясько, депутат тодыны кулэ аслэсьтыз шаерзэ, калыкез, солэсь сюлмаськонзэ.

Быръён участоке вуэм Ижболдин егит кузпалъёс но куаразэс сётон пумысен ӟудыса ӧз улэ.
— 2-3 кужмо кандидатъёсты висъясал, — шуэ Александр. — Зэм, огезлэн но пумиськоназ тупаны ӧй быгаты. Со понна почта ящикъёс тырмемын вал газетъёсын, листовкаосын. Кандидатъёсты тодытэк, бырйыны ӧй мыны.
Нош Ижысь Первомай ёросысь 11-тӥ округысь бырйисьёс депутатэ мынӥсьёсты уггес тодо вылэм. Уго быдэс час ӵоже соос куаразэс сётӥзы мурт участокысь бюллетеньёсъя.

— Таӵе суро-пожо югдур Удмуртиын нырысьсэ тупаз, — шуиз ЦИК-лэн тӧроез Виктор Кушко. — Первомай ёросысь 11-тӥ участоке вуиллям 13-тӥ участокысь бюллетеньёс. Янгыш шараяськиз 9 часын ӵукна. 958 бюллетенез берен басьтоно луиз. Зэм, 42 мурт куара сётыса вуэм ни вылэм. Озьыен, соослэн кыӵе ке кандидат понна дурбасьтэмзы пайдатэм луиз.

Но участокысь комиссия понна таӵе янгышан буш уз кыльы — кинлы ке выговор лякозы, кинлы ке премия уз тыре, пусйиз ЦИК-лэн тӧроез.
Ӵошатоно ке, ёросъёс куара сётонэ мыло-кыдогес пыриськизы, тросаз азьпала потӥз «Огъя Россия». Кылем арын кадь ик партилы синмаськемзэс веразы юкаменскъёс — 81,7 процентэз дурбасьтӥзы властьлэн партиезлы. «Огъя Россилы» 70 процентлэсь ятыргес оскемзэс веразы Яр, Красногорск, Сьӧлта, Кизнер, Эгра но Алнаш округъёс.

КПРФ кужмо луэмзэ возьматӥз Глазовын — 41,88 процент люказ. Озьы со азьпалтӥз «Огъя Россиез» — таиз партия уйпал шоркарын 34 процент бичаз.

ЛДПР-ез ке верано, солы тужгес зол синмаськиллям можгаос — 22 процент куаразэс сётӥллям. 10 процентлэсь ятыргес — Ижын улӥсьёс.

ЦИК-лэн лыдпусъёсызъя, одӥг мандатъем округъёсысь кандидатъёс пӧлын 38-эз — «Огъя Россилэн» ӵектэм муртъёсыз. Пӧлысьтызы удмурт выжыысь адямиосты чаклано ке, Ижын потӥз Павел Титов, Можгаын — Алексей Вершинин, Пичи Пурга районын — Бронислав Ясонов, Ярын — Владимир Невоструев. Партиослэн списокъёссыя потэм кандидатъёслэн нимтулъёссы тодмо луозы матысь дыре.

Елена Скворцова

Удмурт Дунне
By Удмурт Дунне 16 октября, 2012 09:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<