Ӟеч эмъясез будэтоно аръёсын

Удмурт Дунне
By Удмурт Дунне 18 сентября, 2012 14:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӟеч эмъясез будэтоно аръёсын

 

В. Музлов

Шаерамы берло дыре трос лэсьтӥське калыклэсь тазалыксэ дыраз но валаса йӧнатон понна. Та сярысь мадиз тазалыкез утёнъя министр Владимир Музлов.

— Туэ кыкетӥ арзэ быдэсъяське эмъян удысэз юнматонлы — модернизацилы — сӥзем программа, — шуэ министр. — Со чотын Россилэн бюджетысьтыз шаермылы 6 но ӝыны миллион манет вуиз. Асьтэос адӟиськоды, тросаз эмъян учреждениосын тупатъян-выльдон ужъёс ортчизы но ортчо на. Соос тодмантэм воштӥсько!
Таин ӵош вуэ эмъян тӥрлык но. Озьы берло аръёсы гинэ больницаосы туала куронъёслы тупась томографъёс но мукет та выллем 1 сюрс 500 пала оборудование басьтэмын. Отын эскериськон понна черодъёс кулэсмизы. Ӟечоме ӝог юрттэт сётон — та удыслы висъясько туала куронъёслы тупась машинаос. Эмъянэ чырмыт пыӵа Интернет — 50 учреждениосысь врачъёс доры гожтӥськыны луэ ни, дорысь потатэк.

Берло аръёсы шаерамы кылдӥзы кӧня ке бадӟым эмъян центръёс. Эшшо одӥг центр — сэр висёнъёсъя — матысь дыре усьтӥськоз Сарапулын. Солы луыса лымшор городысь но талы матысь гуртъёсысь инфаркт, инсульт шуккыса шуге-леке вуэмъёслы дыраз юрттэт сётыны луонлык кылдоз. Озьыен, отын ӧжытгес луозы инвалид кылисьёс.

— Владимир Михайлович, ӟеч эмъюрттэт сётон понна кулэ на усто специалистъёс…
— Зэмен но, эмъян тӥрлык басьтод, нош ӟеч специалистэз дасяны аръёс кулэ. Со сяна, нокыӵе томограф но адямиез ас понназ уз йӧнаты. Соин ик ӟеч кадръёсты дасян вылысь ӧжыт уг лэсьтӥськы. Али улонэ пыӵатӥське туж умой проект — «Гуртысь эмчи». Гуртын ужаны дась луись котькуд специалистлы Россилэн бюджетысьтыз быдэн 1 миллион манет висъяське. Шаерысьтымы 103 егитъёс та программае пыриськизы ни, эшшо 35-езъя документъёс дасясько. Специалистъёс котькуд ёросэ сямен ик кошкизы. Нялтас вераса, асьме республикаысь егитъёс, мукет улосъёсын ӵошатыса, мыло-кыдогес мыно гуртэ.
Ӧжытак сюлмаськытэ соиз: республикаямы медициная вуз вань вылысь асьме специалистъёсты тырмыт дасяны ум быгатӥське. Угось медакадемиысь  унозэ интыосты басьто палэнысь лыктэм егитъёс.
Больницаосамы та вакытэ 800 пала вакансиос вань. Уката уг тырмо лаборантъёс, анестезиологъёс. Но эмъясьёслы воксё ёрмиськом шуыны уг луы. Республикамы эмъясьёслэн тырмемзыя 5-тӥ интыын.

— Кылӥськиз: шаерысьтымы куд-ог нылпи хирургъёс уже потаны пумит луо. Зэм ик-а?
— Таослэн кӧтсы ӝож вал, уй смена понна пичи дун тупатэмын шуыса. Но та ужпум сэрттэмын-пертчемын — Медицина страхованиея фонд пыр со тыриськонъёсты бадӟымгес карыны луонлык шедиз. Уй сменаос сентябре ик дуногес луизы ни.
Но таин буйгатскыны уг яра. Угось хирургъёс сяна, мукет специалистъёс но уйин ужано луо, кылсярысь, акушер-гинекологъёс, анестезиологъёс, травматологъёс но мукетъёсыз. Малпасько, таослэсь но уждунзэс будэтыны кулэ.
Бен, Россилэн Президентэз В. Путин шуэ: бюджет удысын тыршисьёслэн уждунзы 2018-тӥ арын 200 процентлы йылыны кулэ. Та малпан мылкыдмес ӧжытак бурдъя ик. Бен тамында коньдон казнаысь шуак уз сюры, соин ик врачъёслэн но эмъясь сузэръёслэн уждунзы пичиен-пичиен будоз.

— Тросэз эмъясьёс асьсэлэсь кабинетъёссэс усьто. Калыклы дунын эмъюрттэт сётыса, вӧйын нянь сиыны быгато…
— Республикаямы 200-лэсь ятыр нимаз адямиослэн клиникаоссы-кабинетъёссы усьтэмын ни. Соослы мон чик пумит ӧвӧл. Сюлмаськытэ мукетыз: сыӵе ужбергатӥсьёслэсь ужзэс чаклась-эскерись ёз кунамы ӧвӧл. Соин ик калыкез кызьы йӧнатэмзы понна соос кыл уг куто, шуыны луоз. Нош коньдон басьто!
Вань на соиз но: сыӵе клиникаос нимысьтыз саклык висъяло висёнэз шараянлы-тодманлы. Нош йӧнатыны уг дырто ни — стационаръёссы ӧвӧл. Соин ик быдэс керттэт висёнъёсын но бушам кисыен адямиос бӧрысь вазисько  кун больницаосы. Ми таослы юрттыны пумит ӧвӧл! Жаль, отӥ-татӥ ветлонъязы, висёнзы куддыр туж муре пыӵаса вуттэ.

— Берло аръёсы республикаямы нуныос трос вордскыны кутскизы. Нош нуны ваён юртъёсын интыос азьло но уг тырмо вал. Азьланьын нылкышноослы уката ӟоскыт уз луы-а?
— Модернизация чотын оглюкетаз нылпи ваён юртъёсын тупатъян-выльдон ужъёс ортчизы — соос огдырлы ужзэс уретылӥзы. Нош шоркарын одӥгез ке но нылпи ваён юрт пытсаське ни ке, мукетъёсыз зэмен но тымисько — нылкышноосты коридоре но интыятэк уг луы. Соин ик городын эшшо одӥг нылпи ваён юрт пуктон сярысь малпанъёс вань — тае умоен лыдъя Президент А. Волков но. Выль корка пырон луоз, вылды, ог ньыль-вить ар ортчыса. Нош отчыозь паськыталоз 3 номеро нылпи ваён юрт.
Ватсасал на гуртоослы юрттэт сярысь. Нылпи ваён юртъёс вазен котькуд ёросын вал, куд-огаз араз 20-25 нуны но ӧз вордскылы. Отысь специалистъёс мӧзмыса пукылӥзы. Нош соос, тодон-валанъёссэс, быгатонлыкъёссэс медаз ыштэ шуыса, ялан та ужын пӧзьыны кулэ ук. Соин ик огкылэ вуэмын вал: куд-ог нылпи ваён юртъёсты огазеяно — районъёс куспын ужась центръёс усьтоно. Та вамышлэн пайдаез соку ик шӧдӥськиз: нылкышноослы табере ӟечгес эмъюрттэт сётӥське, нуныос тазагес вордско.

— Пичи гуртъёсын кылдӥллям, шуо, аспӧртэмлыко йӧна-тӥсьёс. Соос уколъёс уг пуктыло ке но, нырысетӥ юрттэт сётыны котьку дасесь…
— Зэмен но, туж пайдаё проект улонэ пыӵаны кутскиз. Солы кутскон сётэмын кылем арын гинэ Алнаш, Пичи Пурга но Красногорск ёросъёсын.
Пичи гуртъёсын фельдшер-акушер пунктъёс ӧвӧл, матысьёсыз кӧня ке иськеме палэнын интыяськемын. Нош марысь мар ке, кытчы калыклы вазиськоно? Табере гуртоослы йырзэс сокем тӥяно уз луы. Гуртын 100-лэсь ичи улӥсез ке, отын ужаны кутскемын… доразы йӧнатӥсьёс. Пӧлысьтызы тросэз — азьвыл фельдшеръёс, эмъясь сузэръёс. Нош куд-огез эмъян удысэн чик но герӟаськемын ӧй вал. Но калыклы юрттыны мылкыдзы бадӟым. Таӵе адямиос нимысьтыз дышетско нырысетӥ юрттэт сётыны, соос киын эмъюмъёс вань, вирзӥбетэз мертаны быгато. Бен, уколъёс пуктылыны   лэземын ӧвӧл. Но марысь мар ке, таӵе йӧнатӥсьёс тодо, кытчы вазиськыны, кытчы ыстыны шугектэм муртэ — нимысьтыз телефонъёссы ки улазы.

Уждун та эмъясьёслы чакламын ӧвӧл. Но тросэз гурт администрациос соосты бурд улазы басьто. Озьы дунтэм пу висъяло, коньдон премиен шумпотто. Та вакытэ шаерамы 235 таӵе эмъясьёс ужало ни, вуоно арын 495-ёзь йылэтыны чакламын.

Элина Кумачёва

Та темалы тупась материалъёс:

Нылпиос вошто мумы-бубызэс гинэ

Емыш вулэсь ӟечгес… дун ву?

 

Удмурт Дунне
By Удмурт Дунне 18 сентября, 2012 14:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<