Юнман каньылэн уг сётӥськы

Удмурт Дунне
By Удмурт Дунне 28 сентября, 2012 15:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Юнман каньылэн уг сётӥськы

Русский Пычас» огазеяськонлэн кивалтӥсез А. Алексеев

Совето аръёсы шаерысьтымы котькуд бадӟым предприятилэн яке заводлэн вал аслаз сиён-юон поттон ёзэз. Сое подсобной хозяйство шуылӥзы. Сыӵе ёзэз возиз Ижысь радиозавод но. Со вакытэ «Радист» подсобной хозяйство урод ӧз возиськы. Ю-нянь, бакча сиёнъёс будэтӥз, пудо вордӥз, вал аслаз теплицаез но.

Но Россие шӧдтэк шорысь вуизы воштӥськонъёс. 90-тӥ аръёслэн кутсконазы улон йырин-чукин берытскиз. Москваысь кивалтӥсьёс шуизы: колхозъёс но совхозъёс, пе, кулэ ӧвӧл ни. Сыӵе ик учконзы вал подсобной хозяйствоос шоры но. Таин сэрен куашканы ӧдъяз «Радист» но.
Заводысь кивалтӥсьёс, гурт калыкез жаляса, хозяйстволы выль кузё утчаны кутскизы. Шедьтӥзы Пичи Пурга ёросысь Вуж Мӧнья гуртысь егит специалистэз Александр Алексеевез. Сизьым ар талэсь азьло со, огдыре ужаса, йылпумъяз Ижысь гурт удысъя кун академиез. Экономистлэн дипломез солы туж юрттӥз хозяйствоез валаса, шонер сюрестӥ нуыны.

Алигес ми вуылӥм «Русский Пычас» огазеяськонэ. Тодматским отысь ужасьёсын, кенешимы кивалтӥсьёсын но специалистъёсын. Туннэ будон сюрессы сярысь маде ООО-лэн директорез А. Алексеев.

* * *
— Александр Николаевич, кызьы таӵе секыт ныпъетэз ас вылады басьтыны дӥсьтӥды?
— Оски калыкен ужаны быгатэмелы но гурт удысъя экономикаез пыр-поч тодэмелы. Азьло Можга ёросын та хозяйствоез верась но, поттылӥсь но ӧй вал. Татын музъемъёссы угось быдэс ёросын ваньмызлэсь начаресь вал — луовыл. Удалтэм урожай ноку ӧз басьтылэ. Таӵе югдурез тупатон борды агрономен Иван Охотниковен зол-зол басьтӥським. Севооборотэз выльдыса, бусыосмес берыкъятэк но берыкъяса гырем чотын, минерал сылалъёс кутытэк, урожаймес 2-3 поллы йылэтӥм. Минерал сылалъёс шоры чылкак мукет сямен учкиськом. Соос муэз чырсато гинэ — химия бере химия ни. Озьы кылем арын котькуд гектарысь 17 центнерлэсь ятыр ю тысь люкам, туэ — 15. Куазез лыдэ басьтоно ке, со урод ӧвӧл.

Та ужъёсын ӵош ик бадӟым саклык висъяськом таза сортовой кидыс уськытонлы. Кылем арын тани бускель Пичи Пурга ёросысь «Уромское» огазеяськонысь 10 тонна «Конкур» элита сорт сезьы кидыс басьтӥм. 5 тонна «Аксайский усатый» сорт кӧжы вайим Глазов ёросысь «Чура» ООО-ысь. Таиз нырысетӥ репродукциысь вал. Озьы берло дыре ю бусыосмы тыр шепен веттасько-шумпотто.
Хозяйствомес пичи уд шуы, гыроно-кизёно муосмы 4 сюрс 400 гектарлэсь ятыр. Туэ валэс юосмы 1 сюрс 634 гектар вал, нош трос но одӥг аръем турынъёсмы — 2 сюрс 540. Таосыз но умой урожай сётӥзы. Одӥг пудо йырлы быдэ 25 центнер кормовой единица сиён дасям. Со быдэс арлы тырмымон.

Подсобной хозяйстволэсь милем номыр ӟечез ӧз кыльы, шуыны луоз. Соин ик ялан выльдӥськом музъем ужан техникамес. Ньыль ар талэсь азьло кык КЗС-7 «Палессе» комбайн басьтӥм. Соос ӵыжак-вылесь адӟисько. Кузёоссы Пётр Соловьёв но Николай Кулмаков машинаоссэс ӟеч учко, али толлы пуктӥзы ни. Нош СК-5 «Ниваен» ужа Анатолий Силкин. Комбайнъёсысь 767 тонна ю тысь ворттӥз устоез водительмы Пётр Герасимов. Со хозяйствоын 37 ар тырше ни. Эшез сьӧры уйиське шофёр Александр Игнатьев но.

Музъем ужъёсты радъянын матысь юрттӥсе луэ валтӥсь агроном Иван Охотников. Со йылпумъяз Ижысь гурт удысъя институтэз. Татын вордскем но будэм специалистэз чипыез но, курегез но ӟеч тодо, калыкен огкыл ӝог шедьтэ.
Озьы ик матысь юрттӥсе луэ экономист-бухгалтер Лариса Кулеева. Туэ октябре солы 50 арес тырмоз. Оскем ужзэ мылысь-кыдысь быдэсъя.

— Нош пудо вордон удысады пусйымонэз вань-а?
— Та удыс бордын — будонмы но юнманмы. Кылем арын ноку адӟылымтэ вормон басьтӥм — котькуд скаллэсь 5 сюрс килограммлэсь уно йӧл кыским! Пудо уллёмес но будэтӥськом. Али 660 йыр сюро таза пудомы, со пӧлысь 320-ез — скалъёс. Сьӧд-тӧдьы выжы пудомес арысь аре умоятӥськом но матысь дыре племрепродуктор луон понна ужаськом. Али но кылем арын мында ик йӧлмы потэ, нуналаз 15 килограмм пала. Тямыс толэзьскын котькуд скаллэсь 3 сюрс 440 килограмм йӧл люкам, туэ но 5 сюрс лыдпусэз ортчыны малпаськом.

Дояркаосмы пӧлысь тужгес но синмаськымон тыршо, ваньмызлэсь трос йӧл кыско Людмила Гаврилова, Ираида Шушкова, Светлана Козлова но мукетъёсыз. Берлоезлы нылыз но юрттэ. Людмила Евдокимовна туэ 6 сюрсэз ортчыны быгатоз.

— Азьланез сярысь кыӵе малпанъёсын улӥськоды?
— Азьланьын лэсьтоноез трос ай. Но туннэ бадӟым шумпотонмес вераммы потэ — гуртэ туэ газ вуиз. Озьы гурт калыклэн улон-вылонэз пумен умоя. Корка пуктӥсьёслы, юртъерзэс выльдӥсьёслы транспортэн юрттӥськом, пилорама сётӥськом. Азьло нюлэс но басьто вал, но али тэльмы ӧвӧл ни.
Пусъеме потэ созэ но: ми асьме амалэн тырмыт но ӟеч пудо сиён — силос но сенаж — дасяськом. Сое милям ёросын но умоен лыдъяло ни. Али 100 ужасьмы. Уждун — 7-7,5 сюрс котыр. Жаляса верано, егитъёслэн гуртэ кылемзы уг поты. Таин сэрен алигес Воткинск ёросысь валтӥсь зоотехникез ӧтёно луим. Дорамы ужаны мылкыдыз вань.

Оскиськом, азьланьын вамышъёсмы уката кузесь, йыг-йыгесь луозы. Будон капчиен уг сётӥськы ке но, азьмынӥсьёс радэ потыны луонлыкъёсмы вань.

Геннадий Романов

Удмурт Дунне
By Удмурт Дунне 28 сентября, 2012 15:48