Выль вакыт

Удмурт Дунне
By Удмурт Дунне 18 сентября, 2012 15:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Выль вакыт

Предприятиын та вакытэ бичало «Лада Гранта» машинаез.

Ижысь автозаводын дугдӥзы «ВАЗ» поттэмысь.  Озьы Россиын йылпумъяськиз та машинаослэн  вакытсы. Калык пӧлын вакчияк нимаськись «шестёркаос» но «четвёркаос», соослэн инъетсы вылын потӥсь «Иж» фургонъёс историе кылёзы.

Бен, сюресъёс вылысь соосты кема адӟомы на: вуж автоосты утиле келянъя программая уно калык машинаоссэ воштӥз Ижысь автозаводын бичам классикаосын. Конвейерысь али гинэ потэм машинаосты басьтӥсьёс та вакытэ йыло. Кызьы иворто автозаводысь продукциез интыянъя ёзысь специалистъёс, калык дыртэ кисыезлы тупась машинаез басьтыны.

Котьма ке но автозаводысь цехъёсын али юр-яр вазе — предприятиын тыршисьёс та вакытэ бичало «Лада Гранта» машинаез. Сое поттонэз Иже выжтон сярысь огкыл кутэмын вал кылем арын сентябре — Владимир Путин Удмуртие вуылыку.

Автозаводлэн цехъёсаз пыриськод гинэ, соку ик син шоры йӧто егитъёс.  Соослы ужаны юртто роботъёс — «корт валъёс» син куспын пӧрмо. Кызьы ивортӥз валтӥсь инженер Николай Краснопёров, час куспын егит специалистъёс дасяло «Лада Гранталэсь» 25 кузовзэ. Бен, вань цехъёсын роботъёс ӧвӧл на, но матысь дыре соос ваньмаз ик пуктылэмын луозы. Ку вуоз со дыр? Таиз герӟаськемын Лада Гранталэсь «хэтчбек» модельзэ (вить ӧсэн бадӟымгес машина) поттонэн. Тазэ производствоез усьтыны чакламын,  одӥг но ӝыны ар ортчыса. Али «Лада Гранталэсь» «седан» модельзэ бичало.

Автозаводын тыршисьёслэн шоро-куспо уждунзы 15 сюрс манет пала. Бадӟым ӧвӧл. Но та ласянь шумпоттытэ тани ма: калык оскыны кутскиз предприятилэн азьланезлы. Соос тодо: автозавод кризисысь потэмын, табере вань лыдпусъёс-вормонъёс выллань тубозы. Тани та толэзьысен шоро-куспо уждун борды ватсаськоз 20 процентъем премия. Нимаз коньдонэн пусйиськозы производствоысь азьмынӥсьёс.

Юан кылдэ: Ижысь автозавод матысь аре «Лада Грантаез» гинэ поттоз бере, озьыен, ужасьёслэсь лыдзэс кулэстоно уз луы-а? Предприятилэн валтӥсь директорез Алексей Алексеев валэктӥз:
— Заводын тыршисьёслэн лыдзы та вакытэ 4 сюрс 300 адями пала. «Лада Грантаез» кык сменаен поттыны кутскимы ке но, ужась киос уз тырме на. Завод кулэяське эшшо ог 200 адямилы. Радъямын ӟеч специалистъёсты утчан.

Экономистъёс пусъё: Ижысь автозавод депрессия вакытысьтыз потыны ӧдъяз. Заказъёс тырмыт, производство ӟеч радъямын, быдэстоно проектъёс ог 4 ар азьланезлы чакламын. Кыӵе машинаос вордскозы матысь аръёсы?
— Одӥг ласянь, мӧзмыт мылкыд кылдэ, «ВАЗ» сериысь классика модельёс уз потэ ни шуыса. Та производство угось заводын радъяськиз 1970-тӥ арысен, — мылкыдзэ шарая Алексей Алексеев. — Но мукет ласянь, таин герӟаны луоз предприятилэсь выль азинскон сюрес вылэ султэмзэ. «Лада Гранталэсь» «хэтчбек» модельзэ поттон радъямын луоз асьме дорын гинэ. Чакламын вал та производствоез вазьгес усьтыны — вуоно ар куспын. Но ум вуттэ, басьтӥськоно угось мукетыз проект борды но: пуктыны кутсконо «Рено-Ниссан» альянслэсь иномаркаоссэ поттонъя конвейерез. Та пумысен огкыл гожтэмын вал кылем арын октябрь толэзе. Озьы 2016-тӥ арын автозаводын ар куспын ваньзэ-ӧвӧлзэ бичаськоз 300 сюрс пала машина.

«Рено» но «Ниссан» машинаослэн кыӵе модельёссы бичаськозы Ижысь автозаводын? Предприятилэн кивалтӥсез та юанлы валэктон сётыны ӧз дырты. Проект быдэсъяське «Рено-Ниссан» альянс но «АвтоВАЗ» огазеяськон куспын юнматэм огкылъя. Соин ик та пумысен соос решение кутыны кулэ. Нош Ижысь автозавод сое улонэ пыӵатоз. Алексей Алексеев ватсаз на: Ижысь автозаводэн продукциеныз тунсыкъяськисьёс нуналлы быдэ йыло. «Рено-Ниссан» альянслэн проектэз улонэ пыӵаны ӧз кутскы ай ке но, Иже вуылыны ӧдъязы ини соослэн поставщикъёссы. Соос али ик дась автозаводын бичам иномаркаосты асьсэлэн ёзъёссы пыр вузаны. Озьы предприятиын кылдоз поставщикъёслэн кластерзы (огазеяськонзы). Азьвыл вакытэ сямен ик, Ижысь автозавод шаермылэн гинэ ӧвӧл, Россиысь экономикалэн, автопромлэн одӥгез  валтӥсез ёзэз луоз.

Елена Никитина
Удмурт Дунне
By Удмурт Дунне 18 сентября, 2012 15:46