Венгер тодосчилэн удмурт яратонэз

Удмурт Дунне
By Удмурт Дунне 18 сентября, 2012 16:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Венгер тодосчилэн удмурт яратонэз

Ж. Шаланки туж мӧзме удмурт гуртлэсь.

Со улэ Удмурт шаерлэсь кӧня ке сюрс иськемын, Венгриын. Отын вордӥськиз, дышетскиз, семья кылдытӥз, куинь нылпиоссэ будэтэ. Но арлы быдэ одӥг пол ке но дыртэ бадӟым яратонэз — удмурт калык — доры. Философия наукаосъя доктор, пермь кылъёсты эскерись тодосчи Жужа Шаланки 19-тӥ сентябре пусъёз 50 арессэ.
Жужаен ми пумиським кык арня талэсь азьвыл Венгриысь Шиофок карын Фин-угор калыкъёслэн конгрессы дыръя. Меӵак верало, удмуртъёс сярысь сокем шунытэн, сокем сюлмысь мадись муртэ мон ӧй пумиталля на.
— Удмуртилэсь, отысь эшъёсылэсь, удмурт кыллэсь, удмурт пӧраськемъёслэсь туж зол мӧзмисько, — вань лулзэ усьтэ кадь венгер тодосчи. — Тросэз шуо: Ижкар — чебер город ӧвӧл. Но мон та малпанлы пумит. Малы ке шуоно отын уло мынам удмурт эшъёсы. Ижкар  но арлы быдэ чеберске. Туж мӧзмисько удмурт гуртъёслэсь, соос сыӵе мусо пото.
Жужа туж вольыт вераське удмурт сямен. Венгриын улыса но, со Интернет пыр нуналлы быдэ кылзэ «Мынам Удмуртие» радиоез, лыдӟе «Удмурт дунне» газетэз, туж ӟеч тодэ, мар тунсыкоез ортче Удмурт шаерын, кыӵе сюлмаськонъёсын, малпанъёсын уло удмуртъёс. Со гинэ ӧвӧл, компьютерез озьы тупатэмын: Ижкарысь нуналлы куазез возьматэ. Озьы Жужа ачиз но Удмуртие вуылэм кадь потэ.
Венгер тодосчи удмурт музъем вылэ нырысьсэ шедиз 1991-тӥ арын.
— Фин-угор кылъёсты эскерисько бере, со кылъёсын вераськисьёс доры ветлоно малпай, — шуэ Жужа. — Нырысь вуылӥ Марий Элэ, собере Удмуртие… Удмуртъёслы сокем синмаськи, мукет азе ветлэм ӧз ни поты. Озьы арлы быдэ удмурт гуртъёсы экспедициосы потаны тырши.
Жужа Шаланкилы бадӟым эш луиз шаерысьтымы Историяя, кылъя но литературая институтысь тодосчи Людмила Кириллова. Ӵошен соос кыӵе гинэ ёросъёсы ӧз поталэ: Сьӧлта, Якшур-Бӧдья, Алнаш, Дэри, Пичи Пурга но мукет. Вуылӥзы Татарстанысь удмуртъёс доры но. Венгер тодосчи эскериз удмурт буёл нимъёсты, удмурт но ӟуч кылъёслэсь огвакытэ кутӥськемзэс.
— Мон туж яратӥсько экспедициосы ветлыны, — шуэ Жужа Шаланки, — Учебникъёс, книгаос вылэ пыкиськыса басьтэм тодон-валан быдэс луыны уг быгаты. Туж тунсыко потэ удмурт егитъёслэсь но пересьёслэсь пӧртэм сямен вераськемзэс чакланы, ӵошатыны. Тунсыко: кызьы кылъёс воштӥсько, кызьы туала вакытэ удмуртъёс анай кылзэс куто. Удмуртъёс, ӧжытсэ кык кыл тодыса, будо. Со туж умой. Нош милям Венгриын венгер сямен гинэ вераськыны луэ.
Жужалэн малпамезъя, котькуд кыллэн улонэз турлы-турлы. Шуом, грамматика — со одӥг, газет кыл — мукет, нош огшоры вераськон кыл — воксё висъяське. Вераськон кыл — со улон.
— Удмурт но фин-угор дуннеосты усьтэмзы понна Жужа тау каре Шандор Чуч, Энико Сий, Петер Домокош тодосчиослы. Соос Жужалэн университетысь дышетӥсьёсыз вылӥллям. Нош табере, пе, ӵош ужаськомы ни.
Венгер тодосчи туж ӟеч тодэ ӟуч кылэз но. Таизъя со — зэмос профессионал. Угось нырысетӥ профессиезъя ӟуч кыллы но литературалы дышетӥсь луэ.
— Мынам анай-атае биологъёс вал. 1950-тӥ аръёслэн пумазы, 1960-тӥ аръёслэн кутсконазы соос Москваын аспирантураын дышетскизы. Отысен ик ог-огзэс синйылтӥзы, синмаськизы но семья кылдытӥзы, — аслаз выжыез сярысь маде тодосчи. — Пинал дыръям мон анай-атаеным ӵемысь ветлӥ Москвае, соин ик ӟуч кылэз умой тодӥсько.
Жужа Шаланки эшъяськонэз туж вылӥ дунъя. Тае шӧдо нылпиосыз но.
— Дорамы удмурт куноос ӵемысь вуыло. Семьяосы удмурт тодосчиосын — Галина Лесниковаен, Людмила Кирилловаен — ӟеч тодмо. Венгрие тодон-валан басьтыны лыктэм удмуртъёс ваньзы сямен ик дорамы куноясько. Соин ик нылпиосы тодо удмуртъёс сярысь, Удмурт шаере вуылэмзы но потэ. Но со ноку быдэстонтэм малпан, дыр — виза, сюрес туж дуно усё. Мукет ласянь, кышкасько: Удмуртия мыным выжыкыл дунне кадь потэ, нош соос отчы мынӥзы ке, озьы потоз-а? Ӧз ке, мар мыным шуозы?
Куддыръя Жужалэн ассэ быдэсак семьяезлы гинэ сӥзьыса улэмез потэ:
— Дорам гинэ пукысал, пӧраськысал, квартираме чебер утялтыса возьысал. Нылкышно понна со шонер, дыр. Но озьы уг быгатӥськы.
Тросэз паймо: кызьы Жужа сыӵе егит но капчи мылкыдо возиськыны быгатэ? Ачиз тодосчи пельпумъёссэ гинэ ӝутъя:
— Мон уг тодӥськы…
Собере тодаз вайыса кадь ватса:
— Картэным но пиеным ӵош спортивной ориентирование шуонэн выриськом, велосипедэн ворттылӥськом. Жаль, нылъёсы та спортэз куштӥзы… Эшшо  яратӥсько на бызьылыны, уяны. Гуртын улыкум, нуналлы быдэ вазь ӵукна Балатон тыын уясько.
Шӧдэ-а ассэ 50 ареслы?
— Конечно, шӧдӥсько! — шуэ тодосчи. — Студентъёсы шоры учкисько но, соослы вань тодон-валанме, опытме сётэме потэ. Оскисько: визьмоесь, быгатӥсесь луозы. Мыным туж кельше дышетыны!
Нош кыӵе визькыл верасал яратоно удмурт калыкезлы? Та юанлы валэктэмезлэсь азьло кема малпаське. Собере дыртытэк вазе:
— Тросгес мед луозы ӟеч малпанъёссы, шудзы, тазалыксы… Кышкасько мар ке дэмланы, мон палэнысь адями ук… Тани  фин-угор конгрессэ люкаськемъёс сюлмасько: ӧжыт лыдъем калыкъёс бырозы. Но мон ялан шуисько: мынам улонэлы удмурт кыл тырмоз, мон шедьто ай кинэн удмурт сямен вераськыны, со дыре ик ваньзэ лэсьто, кыл мед улоз на шуыса. Мар луоз 100 ар ортчыса? Соку, оло, нылпиос юалозы: малы тӥ ӧд лэсьтэ, ӧд уте? Асьме улонмес озьы радъяны кулэ, нылпиосмылы, соослэн нылпиоссылы умой мед луоз.

Людмила Кириллова — филология наукаосъя кандидат:
— Удмурт шаере Жужа 20 ар пала вуылэ ни. Тодам лыктэ на Ижкаре нырысьсэ вуэмез. Мон сое пумитаны аэропортэ мынӥ. Ассэ ноку адӟеме ӧвӧл бере, потӥсь калык шоры, туссэс чакласа, учкисько ни: таиз — уз луы, таиз — ӟуч тусо, таиз… Таиз — со! Шораз венгер кылын вази но, сыӵе шумпотӥз! Тӥни со дырысен эшъяським. Нырысь араз Жужа удмурт кылэз лябгес тодэ вал, бӧрысь умой-умой дышетӥз ни. Кӧня удмурт ёросъёсы, гуртъёсы ветлӥм! Ялан пыдын лёгаськиськом. Куспамы олома сярысь но вераськиськом. 20 иськемез ортчеммес но ум шӧдӥське, ява. Валля арын озьы вамышъяськом, огдырлы ас малпанъёсамы выйыса. Шӧдтэк шорысь кыкнамы но серекъяны кутским. Жужа тодаз ваем кылем даурлэн кутсконысьтыз тодмо венгер кылбурчилэсь Аттӥла Йожефлэсь чуръёссэ: «Мон узыр ке луысал, аслым штан басьтысал…» Та чуръёсты со ас сяменыз берыктэм: «Мон узыр ке луысал, араз куинь пол Удмурт шаере ветлысал…»
Жужалэн дораз сомында удмурт книгаос! Венгер шаере вуид ке, удмурт литература утчаса уд курадӟы, ваньмыз Жужалэн луоз. Куд-ог книгае мынам но ӧвӧл, нош солэн — вань. Со книгаосъя венгер студентъёс дышетско.

Елена Миннигараева
Удмурт Дунне
By Удмурт Дунне 18 сентября, 2012 16:51
Write a comment

1 Comment

  1. Татьяна Миннияхметова 18 сентября, 23:09

    Туж шумпотыса лыдзоно та гожтэмез. Салам но зечкыланъёс Жужалы, азьпалан Удмурт шаере тросгес ветлыны быгатонлык но зечлык.

    Reply to this comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<