Уждун йылоз, улон инты луоз

Удмурт Дунне
By Удмурт Дунне 11 сентября, 2012 12:57

Уждун йылоз,  улон инты луоз

Учительскойын котьку огыр-бугыр.

Урокъёсты мытэмен ӵош дышетӥсьёс чотаны кутскизы ни: кӧня уждун басьтозы соос сентябрь понна. Тодо: йылыны кулэ. Кӧнялы но кинлэн? Та сярысь ивортӥз дышетонъя но наукая министр Андрей Кузнецов.
Кунысьтымы бюджет чотын ужасьёслэн уждунзы 2018-тӥ арозь 2 поллы йылыны кулэ — таӵе ужпум пуктэ Россилэн Президентэз В. Путин. Шуак-а сое йылтоно яке пичиен-пичиен-а ӝутоно? Удмуртилэн Президентэз А. Волков чакламъя умойгес луоз, кыкетӥ сюресэз бырйыса. Озьы со решение кутӥз:  ужасьёсты шумпоттоно матысь дыре ик. Тае нырысь ас вылазы шӧдозы дышетӥсьёс — соослэсь уждунзэс сентябре ик 13,4 процентлы йылэтыны луонлык вань. Озьы али шоро-куспо уждунзы 14 сюрс 100 манет пала ке, ӝутӥськоз 15 сюрс 800 манетозь.
Кылемъёсыз бюджет чотын ужасьёс, соос пӧлын — нылпи садъёсысь воспитательёс, ватсаса тодон-валан сётон удысын, тазалыкез утён, культура, егитъёсын ужан, спорт, калыкез улон-вылонын утён удысын тыршисьёс — сентябре 7 процентлы, нош октябре 6 процентлы шумпоттэмын луозы. Талы коньдон — 323 миллион манет пала — висъяськоз республикамылэн бюджетысьтыз.
— Бен, школаысь егит специалистъёс но ог 15 сюрс манет табере басьтозы шуыса, вераны уг луы, — пусйиз министр. — Угось, котьма ке но, лыдэ басьтӥське дышетӥсьлэн опытэз, вормонъёсыз-быгатонлыкъёсыз. Уждунэзлэн быдӟалаез потэ дышетӥсьлэн кӧня час нуэмез бордысь но. Бюджетникъёслэсь уждунзэс йылэтон таин гинэ уз йылпумъяськы. Вуоно ар пумын школаын ужасьёс шорлыдын ог 17 сюрс басьтыны кулэ ни — туэ республикаямы сыӵе шоро-куспо уждун.
Воспитательёслэн уждунзы ар пумозь 12 сюрс но ӝыны манетозь вуыны кулэ.
* * *
Егит специалистъёсты школае кыскон вылысь, уждунэз будэтэм сяна, кун мукет амалъёс но утча. Кылсярысь, республикаямы огдыре кӧня ке проект улонэ пыӵатӥське. Нырысетӥез — «Егитъёслы улон инты». Та чотын 5 сюрслэсь ятыр егит семьяос корка пырон лэсьтӥзы ни, со пӧлын ог 10 процентэз — дышетӥсьёс. Кыкетӥез проект — «Дышетӥсьёслы улон юрт». Озьы Ижысь 100 дышетӥсьёс вуоно арын апреле пичиятэм дунын выль квартираосы пырыны быгатозы: рынокын туннэ одӥг квадрат метрез улон инты ог 48 сюрс манет сылэ ке, дышетӥсьёслы коркан — 32 сюрс манет.
— Бен, та корка куриськисьёс 500-лэсь ятыр люкаськемын ни, — пусйиз министр. — Соин пӧлысьтызы 100-зэ быръён вылысь нимысьтыз кылдытэм комиссилы пӧсяно луоз. Лыдэ басьтӥськоз дышетӥсьлэн стажез — 10 арлэсь ичи медаз луы, озьы ик улон интылы ёрмемез. Но оскиськом, та проект азинтэмын луоз — улон интызэс умоятыны быгатозы тросэз дышетӥсьёс.
Нош кинлэн пичиятэм кредит но тырыны луонлыкез ӧвӧл — таӵеослы квартираос арендае сётӥськозы, дун басьтытэк. Бюджетникъёслы корка пуктон озьы ик Ижын мытэмын ни, дась луоз со вуоно ар пумын.
— Эшшо одӥгезлы проектлы али гинэ кутскон сётӥське, — нимысьтыз пусйиз А. Кузнецов. — Туннэ курон пуктэмын: лыдъяно, кӧня егитъёс ужало гуртысь дышетон, тазалыкез утён, гурт хозяйство но мукет удысъёсын, тодоно, кӧняез соос кулэясько улон интылы. Президент мылкыдзэ вераз: ваньзылы соослы республика чотын улон интыос пуктоно-висъяно.
Министрлэн верамезъя, туэ дышетон удысэ 400 пала егит специалистъёс лыктӥзы. Кӧняез соос пӧлысь улон интылы кулэяське — тыро-пыдо вераны уг луы на. Чакламъя ог 100-150-эз.

Эльвина Кумачева
Удмурт Дунне
By Удмурт Дунне 11 сентября, 2012 12:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<