Ошмесаз верос пӧзьтэ

Удмурт Дунне
By Удмурт Дунне 14 сентября, 2012 15:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ошмесаз верос  пӧзьтэ

С. Широбоков

Эгра ёрослэн кылдэмез дырысен 75 ар тырмонлы сӥзьыса, улосчизы, Удмуртиысь дано журналист Сергей Широбоков улонысь учыръёсын но серемес веросъёсын «Киренен сюкась» книга поттӥз.

Сергей Васильевич серем пыр учке Россиын 1912-тӥ-2012-тӥ аръёсы кылдэм югдур шоры. Серекъян-маскаръяськон пыр ӵушка улонысь тырмымтэосты но адямиослэсь урод сямъёссэс.
Сергей Широбоков улэ Эгра ёросысь Чутыр черкогуртын. Ассэ ачиз Паськыт Кӧтурдэсов шуэ ке но, гуртоосыз сое Журналист яке Писатель гинэ нимало: тӥни, пе, Писатель нош ик чорыганы кошке — чорыг сюре-а, уг-а, вылды, но визнаназ ӵемысь серемес верос кугӟа.
Нош пичи дыръяз Сергей борды лякиськиз Гудрон кушем ним. Олокыӵе но юанъёсын адямиос борды тэбинемысьтыз, вылды. Ма, али но журналист музэн юалляськыны яратэ. Кудзэ-огзэ юмоке но шедьытэ.

Юон пӧлы выйыны кутскем тодмоезлы алигесэн ӧз-а вера: гурт администрациын, пе, бумага дасяло. Списоке пыртозы вань ужасьтэмъёслэсь но юон пӧлы выемъёслэсь нимъёссэс. Собере ваньзэс огинэ люкалозы но ЛТП-е — Лечебно-трудовой профилакторие — нуозы. Тон но соос пӧлын. Совето аръёсты тодэ вайыса, выльысь, пе, сыӵе учреждениосты усьтыны малпало. Таиз оскем верамезлы, юэмысь дугдэм.

Ма, оскод но. Сергей Васильевич серекъяса уг вераськы, туж йӧно возиське. Собере шораз учкыса но уд малпа, йыраз маскара веранъёсын ошмес пӧзе шуыса. Тазэ со ќръя бумага вылэ. Атаезлэн Василий Владимировичлэн кылыз туж етӥз вылэм. Малпамтэ шорысь мар ке тамашазэ вераса куштоз но тӥни. Кытчы мынӥськод шуэмысьтызы вазёз вал: Америкае, нызьыли копаны.
Сергей Широбоков вор-дӥськемын Эгра ёросысь пичи гинэ Деревозь гуртын, али со быремын ни. Собере улыны выжиллям Кураше. Татын ик йылпумъям ньыль классэз. Чутыре выжытозь, ӟуч кылэз воксё, пе, уг валаськы вал. Нош отчы вуыса, удмуртсэ вунэтоно луэм. Школа бере дышетскыны пыриз Удмурт кун университетысь ӟуч филология факультетэ.

Широбоковлэн сочинениосыз туж ӟеч пӧрмо вылэм, ӟуч кылъя но литературая дышетӥсьсы Нина Ивановна Иванова соосты класс азьын шара лыдӟылэм. Сергей туж яратылӥз лыдӟиськыны, но удмурт книгаосты киям но, пе, кутылэме ӧй вал. Кыл шӧдонэз зол вылэм. Радиожурналистын ужакуз, удмурт передачаос дасян борды басьтӥськиз, собере «Советской Удмуртия» газетлэн собкорез луиз. Отӥяз ужаз «Иднакар» но «Мой город» газетъёсын.
Котьма ке но Сергей Васильевичез бордаз золгес кыско серемес гожъянъёс. Котырак учкы, Педунь агайлэсь огпаръёссэ пумиталод, пе. Гожъямъёсызлы адямиос дышемын ни. Серемес веранъёсысь кытӥяз асьсэды тодмало, но уг йыркуръясько. Сямзэ тодыса, шуо: ниммес гинэ, пе, эн гожты. Озьы олокыӵе но йӧспӧртэм нимъёс кылдо, адямиослэн гинэ уг — гуртъёслэн, колхозъёслэн.

Удмурт кылэз дышетымтэез пумысен шугъяськонъёсыз кылдо ик, но таяз учыре асьсэос геройёсыз юртто аспӧртэмлыко вераськон манеренызы. Нырысетӥ юморескаез потэм «Молот» журналын. Нимаськиз «Ческыт чорыг иваси». Со вакытэ та журналын ужась Семён Перевощиков гожъямезлы ӟеч дунъет сётэм. Кылбурчилэн ушъямез Широбоковез бурдъям, кылбур гожтоно кожам. Таяз учыре ини Перевощиков шуэм: юморед, пе, пӧрме, нош кылбур борды эн ик ерсаськы.

Ньыль арес котырын Сергей ӝужыт полатьысь гулбеч пасе усем. Йырыныз тубатъёсты лыдъяса, картошка вылэ салиськем. Мумиз куалектэменыз бӧрдэ, нош пияшлы номыр кадь ӧвӧл, чик вӧсь луымтэ. Солы шулдыр. Гожъямъёсыз но Сергей Широбоковлэн бӧрдонэн, серекъянэн суро.

Лия Малых
Удмурт Дунне
By Удмурт Дунне 14 сентября, 2012 15:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<