Нуналлэн кыӵе луэмез ӵукна адӟиське

Удмурт Дунне
By Удмурт Дунне 28 сентября, 2012 15:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

В. Маштаков

Берло дыре Якшур-Бӧдья ёросысь гурт хозяйствоосын но воштӥськонъёс шӧдӥсько: вуэ туала техника, выльдӥсько фермаос, складъёс. Со луонлык сётэ музъем уже но пудо вордонэ ӟеч амалъёсты кутыны, ужазинлыкез ӝутыны но ваньбур поттонэз будэтыны.

Озьы шуыны луоз «Рассвет» ООО огазеяськон сярысь но. Со кылдӥз «Рассвет» СПК интые 2005-тӥ арын. Но татын туэозь ужъёссы ушъяськымон ӧз мынэ. Югдур умой пала берытске ни эштослэн кивалтӥсез воштӥськем бере. Хозяйствоез, кужымезлы но ӟеглуд калыклэн тыршемезлы оскыса, ас вылаз кышкатэк басьтӥз йӧно удмурт пи Виктор Маштаков.

— Виктор Владимирович, ёросысь кивалтӥсьёсын но калыкен ньыль ар ӵоже ӟеч тодматскиды. Нош Ӟеглудын ужъёстэс кызьы мытӥды? Мар тужгес секытэз вал?
— Ужаны кутски тулыс кысык бусы ужъёс азьын. Тол куазен шуре зымем кадь луи. Но ӟеглудъёслы оскиськи, кышканэ ӧй вал. Юосмес дыраз, агротехникалэн куронъёсызъя небыт муэ согим. 10 тонна элита сезьы кидыс басьтыса вуим Вавож ёросысь Мичурин нимо эштосысь, 70 гектар кизим, котькудысьтыз 19,5 центнер ю тысь кутсам. Йыдымы 293 гектар вал, 14 центнер котыр урожаез шедиз, нош «Раушан» сезьымы 17,5 центнер сётӥз. 240 гектар ӟегмы но урод ӧй вал, 12,3 центнер басьтӥм. Котькытын сямен ик милям но ю шепъёсмы туэ тын-тын ӧз юнмалэ, бушесьгес вал.
Но шумпотыса вераме потэ: тырмымон кидыс кисьтэмын, сезьымы вузаны но шедёз. Соин ӵош ик толлы дасямы тырмыт но ӟеч пудо сиён — турын, силос, сенаж но фураж. Вӧзаз кыд но музон ватсэтъёс гинэ басьтылом на. Туэ пудо сюдыны 8 гектар кушман будэтӥм.

— Пудо вордон сярысь кызьы сюлмаськиськоды?
— Та секыт удыслы нимысьтыз саклык висъяськом. Туннэ улонамы уго пудо вордон валтӥсь инты басьтэ. Сотэк одӥг хозяйство но уг азинскы. Тани туэ ми басьтӥм ни КТУ-10 кормораздатчик, миксер, нош али скал гидлэсь липетсэ выльдӥськом, югыт мед пыроз шуыса. Специалистъёс сое «Световой конёк» шуо.

Али милям 590 йыр сюро таза пудомы, со пӧлысь 240-эз — скалъёс. Туэ со лыдпусэз 300-озь вуттыны малпаськом. Со понна луонлыкъёсмы вань.
Пудо утисьёслэн тыршемзы шумпоттэ. Туэ 8 толэзьскын котькуд скаллэсь 2 сюрс 980 килограмм йӧл кыским ни, яке, миым та дырен ӵошатыса, 380 килограммлы трос. Котькуд скаллэсь нуналаз 13-14 килограмм йӧл кыскиськом. Туэ скаллы быдэ 4 сюрс 400 килограмм йӧл люканы быгатом шуыса, чакласьком.

Пудомы но, миым сярысь, ӝог тэлеӟе, шорлыдын нуналаз 600 граммлы будэ, нош кылем арын ӝыны килограмм гинэ вал. Сю скаллэсь кунян но туэ, ортчем арын сярысь, 5-лы уногес басьтӥм.
Тӥни сыӵе нырысетӥ азинсконъёсмы. Отчы пыре ваньмызлэн 70 ужасьёсмылэн тыршемзы. Со бордысь ик потэ калыклэн улэм-вылэмез. Туэ уждунмес 20 процентлы йылэтыса, толэзяз 7-8 сюрс манетозь вуттыны малпаськом.

— Виктор Владимирович, гурт удысын тӥ егит кивалтӥсь. Туннэ тӥледды мар сюлэмшугъяськытэ?
— Нырысь ик, дунъёслэн будэмзы — техникалы, эстӥськонлы, минерал сылалъёслы. Тани ми вакчи дыр куспын басьтӥм ОВС-25  ю тысь куасьтон-чылкытатон агрегат, УАЗ автомашина, легковой «Сузуки» машина. Азьланьын одно ик вуттоно пудо сиён дасян комбайн, фермае — выль молокопровод, вужез мырдэм ужа ни. Ми йӧлмес вузаськом Уваысь но Ижысь заводъёсы, литрзэ шорлыдын 11,5-12 манетэн. Нош магазинъёсы со 2-3 пол дунояса вуэ. Элькунысьтымы кивалтӥсь ёзъёс йӧллэсь но сӥльлэсь дунзэ малы меда син азязы уг возё?

Ваньзэ тае лыдэ басьтыса, Гурт удысъя но сиён-юонъя министерстволы дэмлам потэ: азьло сямен ик трактор, молокопровод, миксер но музонзэ басьтэм понна субсидия чаклано вылэм туэ арысен ик. Гурт хозяйствоосты азинтонын но юнматонын со юн шӧдӥськысал.

Котькыӵе шуг-секытъёс мед луозы, азьланезлы осконмы бадӟым. Калык юнме уг шуы: нуналлэн кыџе луэмез ӵукна адӟиське. Ми но азинскон-будон сюрес вылын.

Геннадий Романов

Удмурт Дунне
By Удмурт Дунне 28 сентября, 2012 15:37