Ньыль сэрегысь поттоз спорт

Удмурт Дунне
By Удмурт Дунне 11 сентября, 2012 13:46

Ньыль сэрегысь поттоз спорт

Республикаямы пӧртэм арлыдо, пӧртэм категориосы пырись 116 сюрс инвалидъёс уло. Улонэн мултэс эркиямын ӧвӧл соос. Озьы ке но таӵе адямиос уката сэзь карисько, нуналмысь пичи вормонъёссы понна шумпото. Сӧсыр адямиос понна нырысь интыын — тазалык. Соин берло дыре шаерамы зол азинске инвалидъёслэн спортсы.
Тани Лондонын ортчись Паралимпиадае Удмуртиысь кык спортсмен кошкемын: ӝӧк выл теннисэн шудӥсь Надежда Пушпашева но пауэрлифтингын вожвылъяськись Николай Марфин.
Олимпиада йылпумъяськоз ни таяз арнянуналэ. Нош Россиысь спортсменъёс 28 зарни медаль басьтӥзы ни. Огъя зачётын соос 2-тӥ интыын мыно. Жаль, но Вотка городысь Надежда Пушпашева 4-тӥ интые кылиз. Вераны кулэ: теннисэн шудӥсь кышномуртъёс коляскаын пуко — соослэн пыдъёссы уг ветло. Толон травмаезлы луыса медаль понна нюръяськыны ӧз быгаты Николай Марфин.
Пусъёно созэ но: Паралимпиадаын вормисьёсты Россия дунъялоз Олимпиадаын вожвылъяськем спортсменъёсты кадь ик.
— Кылсярысь, США-ын 1-тӥ инты понна 25 сюрс доллар сётозы. Нош асьмелэн — 100 сюрс евро яке 4 миллион манет. Соин спортсменъёс сярысь таӵе бадӟым сюлмаськон туж дуно потэ, — вера Удмуртиысь ампутантъёслэн футбол клубзылэн президентэз, футболъя калыккуспо классъем спортъя мастер Виктор Кузнецов.
Паралимпиадае мынӥсьёс уз луэ, инвалидъёслэн спортсы ӧз ке азинскы улосъёсын. Ум янгышалэ, асьме республикамы та удысъя азьмынӥсьёс радын луэ шуим ке. Кылсярысь, Удмуртиын нырысь ик люкаськизы следж-хоккеистъёс — 2008-тӥ арын гинэ кылдэм команда, ар но ӝыны ортчыса, Сочиысь Паралимпиадаын вожвылъяськоз.
Вуоно арын март толэзе Удмуртиын радъяськоз инвалидъёс пӧлын нырысетӥ тол спартакиада. Республикаысьтымы спорт удысысь специалистъёс, Башкортостан но Ханты-Манси улосъёсты азьпалтыса, та ужрадэз асьме доры вайизы.
Уго инвалидъёс пӧлын спортэз азинтон понна тужгес устоез реклама — бадӟым спартакиада. Вань улосъёсысь сюрслэсь трос вожвылъяськисьёс вуозы. Соос шоры учкыса, спортэ пыриськемзы потоз вырӟисьтэмъёсызлэн но.
— Сӧсыр муртлы трос удысын ассэ эскероно луэ тупасьсэ шедьтон понна, — шуэ ӝӧк выл теннисъя спортъя мастер Виталий Карпов. — Озьы ке но ваньмыз быгато капчи атлетикаен вырыны, уяны. Кин ке быгатэ ӝӧк выл теннисэн, шахматэн, шашкиен шудыны. Пыдтэм муртъёс но футбол ӵыжало. Аслыд кельшись удыс шедьтон понна дорысь гинэ потыны кулэ.
Россиысь Инвалидъёслэн огазеяськонзылэн Удмуртиысь ёзэныз кивалтӥсь Максим Воробьёв верамъя, сӧсыръёс уг витё соосты жалямез. Соосты валано но кулэ дыръя юрттоно. Тани республикаямы ужа «Доступная среда» программа. Табере пӧртэм учреждениос, культурая юртъёс но вуз карон центръёс сюлмасько, соос доры сӧсыр муртъёс бадӟым шуг-секытъёстэк пырыны мед быгатозы шуыса.
— 28 объектъёсты эскерыса потӥм. Пӧламы ӧтимы сукыръёсты но, ляб кылӥсьёсты но, пыдтэмъёсты но, коляскаын пукисьёсты но. Котькудӥз вераны быгатӥз, ма лэсьтоно, сӧсыръёс медаз ӵемтэ, пырыны-потыны мед быгатозы шуыса, — шуэ Максим Воробьёв.
Сӧсыръёс адӟо: шоркар син куспын воштӥське. Кылдо аптекае, банке, магазинэ  пырыны-потыны юрттӥсь пандусъёс. Ижын ветлэ лазег пыдэсо 2 выль автобус — табере отчы коляскаын пукись мурт но пырыны быгатэ. Зэм, ужъёс туж трос на, но таӵе пичи воштӥськонъёс но сӧсыръёслэсь осконзэс юнмато, мылкыдзэс вошто. Озьыен, выльдӥськонъёс куке но вуозы ёросъёсы. Тужгес валтӥсез — котырысь адямиослэн сӧсыръёс шоры учконзы но пумен воштӥськоз. Инвалидъёс ньыль сэреге гинэ ворсамын уз луэ, дышетскозы огъя университетъёсын, вырозы наукаен, улонын таза муртъёсын оградын луозы.

Елена Скворцова
Удмурт Дунне
By Удмурт Дунне 11 сентября, 2012 13:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<