Малы висиськом? Мыдлань сиськиськом!

Удмурт Дунне
By Удмурт Дунне 5 сентября, 2012 10:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Малы висиськом? Мыдлань сиськиськом!

Ӝуклэсь ческыт но пайдаё номыр ӧвӧл.

Шонер сиськон сярысь пӧртэм визь-кенеш сёто диетологъёс. Кин со диетолог: восьмыны-кӧёмыны юрттӥсь специалист яке висёнъёсты эмъясь?  Та но мукет юанъёслы валэктон сётэ Россиысь Нутрициологъёслэн но диетологъёслэн ассоциацизылэн ёзчиез, Ижысь валтӥсь диетолог Ирина Белокрылова.
— Диетолог — со одно ик врач, кудӥз пӧртэм висёнъёс дыръя адямилы  валэктэ, кызьы шонер сиськоно, — шуэ Ирина Белокрылова. — Диетологилэн валтӥсь ужпумез — висисез эмъюмен ӧвӧл,  сиёнэн йӧнатыны. Мудрон кылӥське-а? Но мон оскымон вераны быгатӥсько: 80 процентэз висёнъёс кылдо мыдлань сиськемысь. Юнме-а али трос верасько нылпи садын, школаын пиналъёсты шонер сюдон сярысь. Россиысь Тазалыкез утёнъя министерство тае валаз ини. Соин ик 2010-тӥ арын гужем приказ поттӥз, диетологъёс котькуд поликлинникаын луыны кулэ шуыса, азьвыл соос стационаръёсын гинэ вал.

— Кызьы шонер сиськоно?
— Сиськоно озьы,  адямилэн мугораз кужымез мед тырмоз быдэс нуналлы но кӧня ке мед кылёз на ӵуказе ӵукналы. Одно ик сиськоно ӵукна, нуназе но ӝыт, ваньмыз пӧсь сиёнэн, нош соос вискын куинь пол куртчоно. Адӟиськоды, номыр секытэз но вылез ӧвӧл. Сиськоно ӧжытэн, умой кушаса, котькуд куинь часлы быдэ. Валамон ини, тӥляд тэркыяды мед луоз белокъёс, углеводъёс но жиръёс. Умой луоз, сиськыны пуксён азяды одӥг стакан ву юиды ке. Кин ке ӵукна одӥг чаша кофе гинэ юэ, мукетыз сое вӧен нянен куртче. Кытысь сыӵе адямилэн  ӟигарыз луоз ужаны! Тӥ асьтэлэсь мугордэс коскатӥськоды. Собере, кофеез буш кӧтэ ӟузьылыны уг яра, со ӝуштылы курадӟон. Умой луоз, ӵукна султэмды бере, шуом, ог 100 грамм кубиста салат сузямтэ семавӧйын, сииды ке. Собере ӟеч мынэ пӧсь сиён, кылсярысь, 3-5 пуньы сезьы яке тари ӝук. Бӧрысь ини юэ яратоно кофедэс. Кинлэн ке вазь ик сӥль сиемез потӥз ке, пожалуйста, 100 грамм пӧзьтэм яке пыжем курег, кунян сӥль уз люкетэ. Но тодады возе: сӥлез одно ик кушано бакча сиёнъёсын ӵош (кияр, помидор, ческыт пӧсьтурын), соку со секыт сиён уг луы ни.

— Тросэз диетологъёс ӝыт куать час бере сиськыны уг ни лэзё.
—  Асьмелэн озьы уггес пӧрмы, кин ке ужысь бертэ ай куать час бере, собере пӧраськыны кутске. Мон шуисько: самой берзэ  ӝыт 7 часэ сиське. Яке пӧсь сиён кушалэ 5 часъёсы, нош 7 котырын ини бакча емышъёсын, кузятэмен, йогуртэн коттэс тыре. Ӝыт сиськыку, одно ик йӧл, кефир юоно, малы ке шуоно кальций уйин умойгес мугоре пыӵа.

— Кыӵе бакча сиёнъёс но емышъёс уката пайдаё луо?
— Котькудӥз ас сяменыз пайдаё. Кылсярысь, дыня витаминъёсын узыргес, арбузэн ӵошатыса. Дыняын  С витаминэз апельсинынлэсь но тросгес, со пуштӥрлыкез умой сузя. Но арбузын уно В группае пырись витаминъёс. Та емыш, пушкысь  урод холестеринэз, нумыръёсты поттэм сяна, мугорлэсь висёнъёсын нюръяськон кужымзэ ӝутэ. Помидор — туж тунсыко бакча сиён. Макем со ӵыжытгес, сокем отын уногес пӧртэм витаминъёсыз. Кылсярысь, горд-горд буёлоез узыр калиен, сьӧд куоез — антиоксидант шуонъёсын. Нимысьтыз пусйысал улмоез. Мон ваньмызлы шуисько: сие нуналаз кык яблок ке но. Гужем эн басьялэ кыдёкысь ваем бананъёсты, миське но кузэ палатэк ик, куртчелэ асьме дорын будэм улмоосты. Озьы ик помидорлэсь но «дӥсьсэ» эн сузялэ. Яблокын сямен ик, таяз но туж трос пектинэз, со сюлэз сузя. Улмоез куасьтоно но кынтоно. Толалтэ солэсь компот пӧзьтэ. Тросэз вузэ юо, нош пӧзем емышъёсты кушто. Юнме. Компотысь яблокъёсты одно ик сиёно, бен, отын С витаминэз уз луы ни, нош пектинэз нокытчы уз пегӟы.

— Зэмзэ-а манной ӝуклэн пайдаез ӧвӧл, нош тӧдьы нянь тазалыклы изъян вае?
— Бен, со озьы. Куд-ог висёнъёс дыръя та ӝукез чик но сиыны уг яра. Малы ке шуоно отын мыдлань углеводъёсыз вань, медицинаын соосты рафинированной углеводъёс шуиськом, соос трос газировкаосын, кампетъёсын, пыжиськемъёсын, тӧдьы няньын. Та углеводъёс бушесь, отын нокыӵе витаминъёсыз, минералъёсыз ӧвӧл. Соин ик трос тӧдьы нянез, пыжиськемез, ческытэз, газ вуосты яратӥсь муртъёслэн виразы сакырзы будэ,  соос диабет кырмыны быгато.
Кеньыръёс пӧлысь пайдаё луэмзыя нырысь радын сыло: йыды, сезьы но сьӧдчабей. Рис ӝукез яратӥсьёслы дэмласал котырес рисэз яке куреньзэ, угось кузялэсэзлэн пайдаез, изъянэз сямен ик, ӧвӧл. Озьы ик тӧдьы нянез воштыны ӵектысал ӟег нянен.

— Нош кыӵе сиёнъёс тужгес но кышкыт луо асьмелы?
— Гольтрес газировкаос. Отын одӥг стаканлы ог 5 пичи пуньы сакыр усе. Кыкетӥ интыын чипсы шуонъёс, собере — шоколад батончикъёс, отын сакыр но химия суретъёсыз сяна номыриз ӧвӧл. Майонез тазалыкмес зол быдтэ. Ӝог вуись лапшаос, пюреос — кышкыт макеос. Эн басьялэ нылпиостылы жвачкаос. Эсьма сётэ солы яблок яке ӵужкушман. Жвачка басьтыны ёртэ ке, сир мед сыскоз.
Сылал но сакыр мултэссэ эн сие. Сакырез воштэ яблок пюреен, емышъёсын. Газировкаосты — компотъёсын. Пайдазэ асьтэос адӟоды.

— Сиён-юонэн мугорамы тырмыт витаминъёс шедё-а яке соосты нимысьтыз юоно на?
— Жаляса верано, берло дыре бакча сиёнъёсын но емышъёсын азьвыл мында витаминъёсыз ӧвӧл ни. Кылсярысь, али будэтэм кубистаын С витаминэз 7 поллы ӧжытгес, 1952-тӥ арысеныз ӵошатыса. Бакча сиёнлэн быдӟалаез но чеберез уг возьматы на солэсь ӟечлыксэ. Соин ик одно юоно витаминъёсты. Соос асьмелы гужем-сӥзьыл но уг тырмо, куке бакчаямы кисьмало емышъёс, мар веранэз ини толалтэ но тулыс сярысь.
Юоно белокъёсын узырмытэм коктейльёсты, кисельёсты, витаминъёсты. Нимысьтыз верасал бад-ёс сярысь. Асьме калык солэсь кышкагес. Юнме. Дуннеысь тазалыкез утёнъя огазеяськонлэн эскеронъёсыз возьмато: БАД-ёсты юо 90 процентэз японецъёс, 70 процентэз Америкаын улӥсьёс, 50 процентэз Европаысь калык но 8 процент —  асьмеос — Россиысь адямиос. Мар со сыӵе БАД? Туж огшоры верано ке, со сиён-юон борды ватсэт, отын мугормылы кулэ микроэлементъёсыз, минералъёсыз, витаминъёсыз вань. Соос одно ик инкуазьысь басьтэмын луыны кулэ, шуом зарезь будосъёсысь, легезьпуысь, курегпузысь но мукет. Тани вож нунылы смесьёсын ваньмыз чакламын, одӥг сиемаз кыӵе но кӧня витаминъёс шедьыны кулэ мугоре. БАД-ёсын но озьы ик: одӥгаз «кӧжыын» нуналлы чаклам норма. Валасько, адямиослэсь кышкамзэс, но витаминъёс организмлы туж кулэ. Нимысьтыз пусйысал нылпиосты. Тэшкылиды чаляк жаде, начар сиське, керӟегъяське, дышетсконын бере кыле. Юрттэ ук солы, быръе кулэ витаминъёс. Кылсярысь, пинал таза но визьмо мед будоз шуыса, солэн мугораз одно ик тырмыт луыны кулэ омега-3 элемент. Со трос чорыгын, пушмульыын, етӥн вӧйын, тыква семаын.

— Кызьы шонер быръёно витаминъёсты?
— Сиёнлы ватсэтъёсты но минералъёсты бырйыкуды, одно ик куре кун регистрация сярысь свидетельствоез. Витаминлэн сыӵе документэз вань ке, со эскеронъёс пыр ортчемын но адямилэн тазалыкезлы пайда вае шуыса возьматэ. Сое кышкатэк юыны луэ.  Эшшо умой, витаминъёс, БАД-ёс «улэ» гожтӥське ке Россиысь Медицина наукаосъя академиысь сиён-юонъя институт.
Шаерысьтымы аптекаосын вань сыӵе витаминъёс, сиёнлы ватсэтъёс, но мон дэмласал нырысь ик диетолог доры лыктыны. Со, котыр ласянь тазалыктэс эскерыса, кызьы но маин сиськемдэс тодыса, валэктоз шонер витаминъёсты бырйыны.

Галина Семёнова.

Удмурт Дунне
By Удмурт Дунне 5 сентября, 2012 10:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<