Луэме потэ… огшоры!

Удмурт Дунне
By Удмурт Дунне 26 сентября, 2012 11:16

Улӥськомы киноын кадь! Таӵе малпан кылдэ выль дышетскон ар кутсконын луэм учырен сэрен. Кытысь кылод вал ай, 14 аресъем нылаш банке лушкаськыны мед пыроз шуыса! Эрико Америкаысь ке шат таӵе ивор вуысал… Нош ӵапак таӵе учыр Ижез «данъяз» быдэс кунмылы.

Ижысь Ленин ёросын улӥсь нылаш, ымныраз сьӧд маска, киосаз перчаткиос дӥсяса но пурт кутыса, вамыштӥз одӥгаз банке. «Вае мыным 200 сюрс манет!» кесяськыса, пуртэныз шонаськыны кутскиз. Но банкын ужасьёс кемалась зӥбиллям ни вылэм тревога сётӥсь кнопкаез. Соин ик дыдылы гань-гань валэктӥзы: курондэ нокин быдэстыны уз быгаты.

— Банкын тыршисьёс нылашез буйгатӥллям: тани-тани вуоз уксё понна кыл кутӥсь специалист — со ик кассаез усьтоз, — шуэ шаерысьтымы Следствиея комитетлэн Ижысь Ленин ёросъя ёзысьтыз следователь Родион Зайнуллин. — Кык минут ортчыса, вуиз охрана. Йыртэмасьлэсь масказэ куштыса, соос чылкак абдразы — лушкаськыны пырем егит ныл!

Следовательёслы нылаш валэктӥз: уксё лушкаса, пе, анаелэсь пегӟыны, мукет улосэ кошкыны но асме быдтыны малпасько вал. Анаелэн, пе, монэ отличницаен гинэ адӟемез потэ. Нош мынам огшоры, ваньзы кадь ик луэме потэ. Вылаз ик, апок огкыл шедьтыны ӧз быгаты сюратаеныз. Таиз сое вордэм нылзэ кадь яратэ ке но. Школаысь дышетӥсьёс али ке но уг оско, «витьёслы» гинэ дышетскись нылаш йыртэмаз шуыса. Семьяяз угось со номырлы уг кулэяськы.

«Вконтакте» сайтысь сэрегез пыр валаны луэ нылашлэсь пуш дуннезэ. Отын пуктэмын статус — «Бесите».
Тямысэтӥ классын дышетскись дыды али палэнэ потанлэсь алэмын. Сое та нуналъёсы эскеро эмъясьёс. Таӵе йыружез понна нылаш тямыс арлы пытсэт сьӧры шедьыны быгатоз.

Та учыр пумысен валэктон сётэ «Психолог плюс» центрысь специалист Наталья Тугашова:
— Нылпилэн быдэ вуон вакытыз — анай-атайёс понна секыт дыр. Соос ог-огзэс валамысь дугдо. Пиналлэн бадӟым кариськемез потэ, нош мумы-бубыез сое весь пичи каро. Ӵапак таӵе дыръя нылпиен, мултэс дышетытэк, одӥг радын вераськыны быгатоно. Со кунэрес тусо ветлэ? Юалляське, тодэ, мар солы ӧз кельшы. Секыт учырысь потон амал дэмен утчалэ. Со мед тодоз, котькыӵе учырын солы нырысетӥ юрттӥсь — тӥ.

Со сяна, пиналды азе эн пуктэ быдэстонтэм ужпумъёсты! Эн турттэ солэсь гений кылдытыны. Будэмезъя со ачиз валалоз, кыӵе удыс солы тужгес но матын. Нош вань предметъёсъя визьмо луыны курыса, со кытчы кариськыны уз вала ни.

Вунэтоно ӧвӧл нылпилэсь социальной сайтъёсы пырамзэ чакланы но. Но татын пинал медаз малпа, тӥ солы пумит мынӥськоды шуыса.

  Ольга Николаева

Удмурт Дунне
By Удмурт Дунне 26 сентября, 2012 11:16