Кыӵе мылкыд кельтӥз куатетӥ конгресс?

Удмурт Дунне
By Удмурт Дунне Сентябрь 12, 2012 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кыӵе мылкыд кельтӥз куатетӥ конгресс?

Азьпалан — Пётр Тултаев, Саранск карлэн мэрез.

Кыӵе мылкыд кельтӥз куатетӥ конгресс? Маин со азьвылъёсызлэсь висъяськиз? Пуктэм ужпумъёсты быдэсъян понна ма кароно на? Та юанъёсын вазиським куд-ог делегатъёслы.

Александр Соловьёв — парламентлэн Тӧроез (Удмуртия):
— Монэ паймытӥз но шум-поттӥз фин-угор калыкъёслэн шаплы луэмзы. Данъяськи соин но: удмуртъёс котькуд секциын вераськизы, ужамзы сярысь гинэ ӧз ивортэ, шугъяськытӥсь ужпумъёсты ӝутӥзы. Адӟиське: фин-угор дуннеын удмуртъёслэн данзы бадӟым. Таяз конгрессын кутэм резолюцие туж трос дэмланъёс, ватсанъёс пыртыны чакламын. Ваньзэ соосты ми туэ ноябрь толэзе эскером.
Мон туж юн оскисько: фин-угор дуннелэн азинлыкез бадӟым. Ӵыжы-выжы калыкъёсмы пӧртэм кунъёсын уло, лыдзыя но туж зол висъясько. Азьланяз но, али сямен, ог-огзэс валаны мед быгатозы.

Пётр Тултаев — Саранск городлэн мэрез (Мордовия):
— Талэсь азьвыл Ханты-Мансийскын ортчем конгрессэн ӵошатоно ке, Россиысь фин-угоръёс асьсэды ӟеченгес возьматӥзы: малпанъёссэс рос-прос вераллязы, мултэс керӟегъяськонъёстэк, урттылӥськонъёстэк. Соос возьматыны тыршизы: фин-угор калыкъёс пӧлы пыро ке но, огъя кунзэс — Россиез — гажало.
Вал сыӵе вакытъёс: Россиысь фин-угоръёс таӵе конгрессъёсын асьсэ сярысь мадьыны возьдаськылӥзы. Нош али меӵак, пӧяськытэк иворто шугъяськонъёссы сярысь но, шумпотонъёссы пумысь но. Соос али ӟеч валало ни:  сюлмаськонъёссы, азязы сылӥсь ужпумъёссы бордын асьсэос ик ужано луозы.

Янош Пустаи — Сомбатхей университетысь профессор (Венгрия):
— Таяз конгрессын вераськонъёсты чакласа, мон одӥг малпанэ вуисько: калыкъёслы али югдурзы оглом кельше. Соос асьсэос но пумозяз уг валало, лэся, кылзы но культуразы бырон калэ вуэмын ни шуыса. Зэм, чебер калык проектъёслы коньдон висъяське, но ваньмыз со вуоно поколениослы музеез возьматон выллем луэ. Сыӵе югдур Россиын гинэ ӧвӧл, Западын, мукет трос калыко кунъёсын, ма, Венгриын но. Паймоно кадь, калык культура улэп кылёз шуыса оскон вань ке, солы уг юртто, нош воксё быронэ вуэ ни ке – яркыт книгаос потто. Отын та калык сярысь чебер гожъяло, но… мукет кылын. Но калык улэп на ук! Умойгес ӧвӧл шат солэсь кылзэ школаосын дышетыны?
Валасько: пыкылыны котьку капчи. Мукет ласянь, малы монэ сюлмаськытыны кулэ вань фин-угоръёс? Мынам ӵуказе нуналы — венгер калык. Со дыре ик сюлмы шуг, фин-угор калыкъёслы вераме, вазиськеме потэ: утелэ кылдэс зэмос ужъёс пыр.

Нина Афанасьева — Саам парламентлэн Тӧроезлэн воштӥсез (Кольской шор-муӵ):
— Та конгрессэ нырысьсэ пыриськыкум, туж шурдыса ветлӥ, ялан аслэсьтым юасько вал: нош тон маке лэсьтӥд-а калыкед понна? Али данъяськыны быгатӥсько: лэсьтӥ но лэсьтӥсько. Мыным 73 арес ни, но пыриськисько саам учебникъёс, пособиос дасянэ.
Мурманск областьысь 12 городын но ёросын саам кылъя курсъёс радъясько. Тани мынам ёзэ ик, мӧйы кышномурт, со курсъёсы ветлыны кутскиз. Паймыса вера: йырам, пе, кыӵе ке кылъёс улӟизы кадь, асьсэос пото. Тӥни озьы туж пичи дыръяз тодэмзэ но вунэтэмзэ со выльысь улӟытӥз. Али саам кылэз одӥг школаын но нылпи садын дышето ни. Нош азьвыл та сярысь малпаны ик ӧз луылы.

Ахто Каасик — Тарту университетысь тодосчи (Эстония):
— Мон нырысьсэ таӵе конгрессэ пыриськисько. Сомында фин-угор калыкъёсты одӥг интыысь ноку ӧй адӟылы на вал. Туж жаль: конгресс куинь нунал гинэ кыстӥське. Трос шугъяськытӥсь ужпумъёсъя вераськыны, ог-огеныд матэгес тодматскыны, огъя проектъёс ласянь кенешыны вуттоно ӧвӧл. Тани мон эскерисько фин-угор калыкъёслэсь осконэн герӟаськем интыоссэс. Малпасько, со интыос туж кулэ луо асьсэлы калыкъёслы. Нош сыӵе интыос вунэмын ни ке, соосты утчано, выльысь кылдытоно, утёно.
Эстониын 2 сюрс 500 сыӵе инты! Соос калыклы кужым сёто, асваланзэ ӝутыны, кылзэ утьыны юртто. Сыӵе интыос трос Марий Элын, вань соос Удмуртиын но.

Еремей Айпин — писатель (Ханты-Манси округ):
— Мон куинетӥ конгресслэн ужаз пыриськи ни. Котькудӥз таӵе пумиськон — ӵуказе нуналлы кужым. Чакламея калыкъёслэн асваланзы ӝутске. Малы кулэ фин-угор калыкъёслэсь конгрессъёссэс ортчытъяны? Нырысь ик, фин-угоръёс асьсэ сярысь дунне тыр мед вералозы, соос шоры мед учкозы, мед адӟозы шуыса. Кыкетӥез, ӵош люкаськиськом ке, шаплыгес ужаны кутско фин-угор кунъёсысь, улосъёсысь правительствоос но. Потэ-а соослэн, уг-а, но ӵыжы-выжы калыкъёслы саклык висъятэк кельтэмзы уг луы ни. Нош куинетӥез,  конгресс — со ог-огеныд вераськон, кенешон праздник. Калыкъёс ог-огенызы верасько ке, соос асьсэос но узыргес луо, мукетъёссэ но, быдэс кунэз но узырмыто.

Фото: news.uralistica.com

Удмурт Дунне
By Удмурт Дунне Сентябрь 12, 2012 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<