Кыӵе кӧмыз — сыӵе тысез?

Удмурт Дунне
By Удмурт Дунне 12 сентября, 2012 15:23

Кыӵе кӧмыз — сыӵе тысез?

Н. Кондратьева

Удмурт кун университетысь огъя но фин-угор кылтодонъя кафедраен кивалтӥсьлэн Наталья Кондратьевалэн фин-угор конгрессын докладэз

Кылэз быронлэсь утён, азинтон понна пӧртэм кунъёсын пӧртэм амалъёс кутӥсько.  Куд-ог дыръя бадӟым пытьы кельто нимаз адямиос, кылсярысь, ӟуч кыл понна трос лэсьтӥзы Н. Карамзин, А. Пушкин, удмурт кыл понна — 30-тӥ аръёсысь югдытӥсьёс, тужгес но Кузебай Герд. Кыллэсь кабъёссэ, терминологизэ кылдытонэ пырисько кун учреждениос но.

Данэз ӝуто законъёс
Кылэз азинтонын огез пайдаё сюрес — кыллэсь данзэ (статуссэ) ӝутон, сое кун кыл карыса. Государствоын одӥг  яке кӧня ке кылъёслы  луонлык сётӥське кун кыл нимаськыны, соку вань документъёс со кылъёсын лэсьтӥсько.
Удмурт кыл пӧртэм удысъёсын мед кутӥськоз шуыса, нормативно-правовой документъёс тырмыт. Но соосты улонэ пыӵатонлы пыд пуктэ калыклэн законъёсты тодымтэез. Соин ик бадӟым саклык висъяно удмуртъёс пӧлысь азьветлӥсьёсты будэтонлы, тужгес но экономикаез но политикаез валасьёссэ. Соос асьсэлэсь гинэ быгатонлыкъёссэс медаз шӧдэ, асьсэ понна гинэ медаз сюлмаське, мед быгатозы калыкен ужаны, пӧртэм выжыысь адямиосты валаны.

Кабъёсты кылдытон
Озьы ик ӧвӧл вунэтоно  кыллэсь нормаоссэ кылдытон сярысь. Макем ӟечгес эскеремын кыл — сокем капчигес сое дышетыны. Таиз ӧр азинске Удмурт Республикаын кун кылъёс сярысь законэз быдэсъян улсын Нациосын ужан политикая министерство кивалтэмъя. Со борды итӥсько Историяя, кылъя, литературая Удмурт институт, Удмурт кун университет, Глазовысь дышетӥсьёсты  дасясь институт но мукет учреждениос. Соос тыршо литературной кыллэсь кабъёссэ кылдытон, грамматикаосты, кыллюкамъёсты гожтон бордын.
Кылсярысь, удмурт кылэз узырмытон вылысь, шонер гожъяськонэз но инты нимъёслэсь кутӥськемзэс, ӟуч кылысь удмурт кылэ берыктонэз радъян понна 2005-тӥ арын декабре кылдытэмын Нимкылъёсъя но шонер гожъяськонъя комиссия. Та дыр ӵоже юнматэмын но вераськонэ пыӵатэмын ог 600 выль кылъёс. Комиссия сюлмаськемъя Удмуртилэн Конституциез берыктэмын но печатламын.
Кылэз валаны тыршон мылкыд мед пуромоз шуыса, сое кылоно гинэ ӧвӧл —  адӟоно но. Озьы 2005-тӥ-2008-тӥ аръёсы шаерамы кивалтон ёзъёслэн, пӧртэм учреждениослэн нимъёсынызы вывескаос кык кылын луизы. Куинь ар ӵоже 2 сюрс 300 организацилэн  нимыз берыктэмын. Гуртъёслэн, городъёслэн, шуръёслэн нимъёссы сюрес дуръёсын кык кылын гожтэмын. Али 60 процентысьтыз сюрес пусъёсысь удмурт кылэз пумиталод.
Вормонъёс пӧлын — 2010-тӥ арын удмурт-ӟуч кыллюкамез но 2011-тӥ арын удмурт кылын удмурт грамматикаез поттон.
Озьы элькунамы кыл ласянь политика удмурт кылэз азинтыны юрттэ кадь. Но пӧртэм мугъёсъя таиз ӧр улонлэсь бере кыле. Соин валче нырысетӥ интые потэ удмурт кылчиосты дасян, удмурт кылын научной литература поттон сярысь сюлмаськон. Татын пусйыны кулэ: удмурт языкознанилы кадръёсты дасян ужпум туж зол герӟаськемын экономикаен. Данакез удмуртъёс гуртын вордскемын, быдэ вуэмын бере, городэ лыктэм интеллигенция нырысь ик курадӟе улон инты ӧвӧлысь. Соин ик улон интыя программаос лыдэ мед басьтысалзы национальной кадръёсын герӟаськем юанэз.

Куинь пӧртэм дышетон
Кыллэн вуоноез нырысь ик герӟаськемын пиналъёсын. Удмуртиын удмурт кылэз куинь пӧртэм сёто: удмурт кылын вераськись нылпиослы, ӟучомем пиналъёслы но кылэз чик тодӥсьтэмъёслы. Жаляса верано, 28 процентэз гинэ удмурт нылпиос дышето анай кылзэс. Со вакытэ ик шуиськом: кыл медаз куасьмы шуыса, 30 процентлэсь тросгес пиналъёс сое дышетыны кулэ. Малы пиналъёслэн анай кылзэс тодэмзы уг поты? Тросэз уг адӟо солэсь уж быръёнын, карьера лэсьтонын кулэлыксэ. Семьяын но данзэ ӝутон сярысь уг сюлмасько.
Ӟуч кылъя ЕГЭ югдурез эшшо но уродмытӥз, малы ке шуоно со лыдэ уг басьты нылпилэсь кыџе выжыысь луэмзэ, анай кылъя экзамен сётыны мылкыдзэ. Нылпиослы но быдэ вуымтэослы ичи газет-журналъёс, теле- но радиопередачос. Соос кылдӥзы ке но, югдурез шуак воштыны уз луы: пиналъёс ӧвӧл дышемын иворъёсты анай кылынызы кылзыны-адӟыны.
Удмурт классын дышетскон нокыџе капчиятонъёс уг сёты. Уже куриськыку но, адямилэсь кӧня кыл тодэмзэ уг юало. Соин ик удмурт кылэз выль амалъёсын дышетоно. Пичи дырысен удмурт кылэз но культураез гажан мылкыд пыӵатон  — пиналъёсты будэтонлэн инъетэз луыны кулэ. Дышетон удысын берло воштӥськонъёс  анай кылъёслы  азинскыны уг сёто. Соин ик элькун кивалтӥсьёс та ужпумез ялан син азязы возьыны кулэ. Озьы ик сюлмаськоно вузъёсысь национальной факультетъёсты утён сярысь.

Туала технологиосын герӟет
Берло дыре кыл сярысь наука юнгес но юнгес герӟаське туала технологиосын. Кызьы ке нуналмысь улонын (компьютер программаос, мобильной телефонлэн куараез, банкоматъёс но мукет), озьы ик вылӥ технологиен кыл программаосты но интерфейсъёсты кутонын. Жаляса верано, та удысын лэсьтӥсько ай нырысетӥ вамышъёс гинэ. Кылсярысь,  удмурт шрифтъёсын огъя программа кылдытэмын, «Удмурт шрифтъёс» диск поттэмын.
Мультимедийной вузъёс  поттон удмурт кылэз азинтонлы выль кужым сётысал. Но та дырлы компьютерной технологиосын ӟечгес эшъясько ай литература но кыллы дышетон  гинэ: дасямын удмурт писательёслэн произведениосынызы аудио-диск, удмурт кылъя «Быдӟым лыдӟет дауре» мультимедийной курс, дуннеысь калыкъёслэн удмурт кылэ берыктэм выжыкылъёсынызы аудио-книгаос. Туж дуно луэ «Послание Тангыры» электрон энциклопедия, отчы пыртэмын ӟуч писательёслэн Удмуртия сярысь гожъямъёссы, батыръёс сярысь легендаос, 20-тӥ даурысь удмурт писательёслэн улон сюрессы. Оскиськом, удмурт кыл вылӥ технологиосын эшшо золгес эшъяськоз, поттэм вузъёсты магазинъёсысь капчиен шедьтыны луоз.
Вераны уг луы: удмурт кылэз шаерамы тодазы вайыло дырын-дырын гинэ. Сое азинтон сярысь сюлмаськон шӧдӥське нуналмысь. Но ӟучомон сое азьпалтэ. Соин валче будӥсь пиналъёс ӵемгес но ӵемгес выжо ӟуч кылэ.
Кылэз утён понна луонлыкъёс кылдытэ, ужрадъёс кутэ государство. Кыллэн кутӥськемезлы со вылтус шедьтэ, аспӧртэм кӧм пушкы бинялтэ кадь. Нош кыллэн зэмос кужымез, кидыс кадь, ватӥськемын пыдло  кӧм улэ.
Психологъёс верамъя, шко­лае мынӥсь пинал уг вала на бырйыны, ма солы матын, кыӵе кылын вераськоно. Кызьы косозы, кыӵе визь-кенеш сётозы анай-атаез та вакытэ, озьы ик со учкоз анай кылыз, выжыосыз шоры.

 

Удмурт Дунне
By Удмурт Дунне 12 сентября, 2012 15:23