Кинлы кенеш, кинлы шоу…

Удмурт Дунне
By Удмурт Дунне Сентябрь 17, 2012 16:42

Фин-угор конгрессэ удмурт делегацилэн ветлэмезлы йылпумъянъёс лэсьтӥзы Кун Кенешлэн Тӧроез Александр  Соловьёв но  «Удмурт кенешлэн» президентэз Николай Мусалимов.
— Удмуртиысь делегация огмылкыдын, эшъяськыса ветлӥз та бадӟым ужрадэ. Асьмелэн эшъёсмы мыло-кыдо пыриськизы пӧртэм секциосы. Мон ачим но «Демография, экология, тазалык» секциын доклад лыдӟи, уго республикаямы калык йылэ, нылпиос трос вордско — асьмеос быдэс Приволжск федерал округлы адӟем карымонэсь. Вераськеме пумысен секциын пукисьёслэн трос юанъёссы кылдӥзы, валэктонъёс сётъяй, — шуэ Александр Соловьёв.
Нялтас вераса, делегациос куспазы шара уг вожвылъясько, но чакланы выро ик,  фин-угор улосъёсысь кыӵе кивалтӥсьёс делегацилы йыр луо шуыса. Кылсярысь, Коми Республикаез валтӥз йырзы Вячеслав Гайзер. Асьмелэн — республикаысь кыкетӥ вылӥ чиновник — Кун Кенешлэн Тӧроез. Мукет делегациослэн йыръёссы такем вылӥ интыосысь ӧй вал.
Зэм, конгресслэн кутсконаз Интернетын вылысьтыз вылаз иворъёс сётъязы, Россилэн Президентэз Владимир Путин Венгрие ӧз мыны шуыса. Кунмылэн делегациезлэн йырыз луиз культурая министр Владимир Мединский, озьы ик ужрадэ пыриськизы улосъёсты азинтонъя министрлэн воштӥсез Максим Травников, та министерствоысь ик Калык кусыпъёсты радъянъя департаментлэн кивалтӥсез Александр Журавский. Мукет кунъёслэсь делегациоссэс валтӥзы президентъёссы.
Россиысь фин-угоръёс ужрадэ ветлэмзэс ӟечен пусъё ке но, фин но эстон делегатъёслэн ортчем конгресс пумысен мылкыдъёссы пӧртэмесь. Финляндиысь Сампса Холопайнен «Уралистика» сайтлы ивортӥз, та ужрад Балатон ты дуре ваем пичи Россилы кельшиз шуыса. Оглом конгресс шоу кадь ортчиз, секциосын сюлэмшугъяськытӥсь юанъёсъя ӟырдыт вераськон ӧз пӧрмы.
23 выжыысь фин-угоръёс конгрессэ вуизы бере, ваньмызлэн ик потӥз вераськемзы. Соин секциосын кенешонъёс кузь кыстӥськизы, тазэ ваньмыз сямен люкаськемъёс шӧдӥзы. Вуоно конгресслэн ужан радлыкез мукетгес луыны кулэ — адямиослэн вераськемзы отчёт выллем гинэ медаз луы, кенешон, сюлэмшугъяськытӥсь югдурысь потыны ӵектонъёс кадь мед луысал, вераз Николай Мусалимов.
Ивор вӧлмытӥсь агентствоослэн Европаысь корреспондентъёссы пыкылӥзы Венгриез фин-угоръёслы туж пичи саклык висъямез понна. Кылсярысь, нырысьсэ конгресслэн бюджетэз такем шымыртэмын вал — 150 миллион форинт (ӝыны миллион евро мында). Табыдӟа ужрадлы со, валамон, укыр ӧжыт. Соин наблюдательёслы конгрессэ шедён понна коньдон тыроно луиз, нош делегатъёс асьсэос уксё утчазы мыныны-бертыны. Таин йырин куд-огез Венгрие шедьыны ӧз быгатэ.
— Удмуртиысь делегация та пумысен ӧз сюлмаськы. Тау Правительстволэн Президиумезлы 30 муртлы конгрессэ ветлыны 1 миллион 800 сюрс манет висъямзы понна, — пусйиз Николай Мусалимов. — Озьы делегатъёс но наблюдательёс поездын куинь сутка мыноно ӧз луэ. Россиысь ньыль делегация, валче кариськыса, Казаньысен Венгрие самолётэн лобиз.
Ужрадэз радъянлэн тырмымтэосыз вал зэмзэ ик. Ӧз тырме кылысь кылэ берыктӥсьёс  но. Кылсярысь, Николай Мусалимовлэн удмурт кылын докладэзлы ӟуч кылын синхрон лэсьтӥз удмурт пияш Николай Анисимов. Со дыре ик ӧз удалты Эстонилэн Президентэзлы Тоомас Хендрик Ильвеслы — эстон кылын вераськемезлэсь ӟуче берыктэмзэ дыраз лэзьыны ӧз вуттэ. Зэм, таяз радэ эстон кивалтӥсь Ханты-Мансийскысь конгрессын кадь ӟырдыт ӧз вераськы, пе.
Конгресслэн йылпумъянэз — резолюция. Татчы пыртэм ужпумъёс юнматэмын луозы Фин-угор калыкъёслэн Консультативной комитетсылэн кенешоназ ноябре. Озьы ке но нокыӵе бадӟым ужрадъёс фин-угор калыкъёслэсь улонзэс умой пала чутрак уз воштэ.
— Котькуд семья, бадӟым адями сюлмаськиз ке анай кылзэ дышетон  но азинтон понна, соку луоз калыкмылэн ӵуказе нуналыз но, — шуэ Николай Мусалимов.
Соин соглаш кариське Александр Соловьёв:
— Кун кылъёс сярысь закон  республикаямы кутэмын. Зэм, сюлмаськонъёс трос. Но  выжы калыклэн кылыз бырыны кулэ ӧвӧл.
Соку быгатоз-а вуоно конгрессын удмурт делегацилэн йырыз мукет люкаськемъёс азьын удмурт кылын рос-прос вераськыны? Одно ик, оскытэ Николай Мусалимов.

Алёна Ионина
Удмурт Дунне
By Удмурт Дунне Сентябрь 17, 2012 16:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<