Гуртоос тыршо — муртъёс узырмо

Удмурт Дунне
By Удмурт Дунне 18 сентября, 2012 16:23

Кун Кенешысь Бюджетъя, вытъёсъя но коньдон ужпумъёсъя ялан ужась комиссия кенешиз республикамылэн туэлы чаклам бюджетаз воштонъёс пыртон пумысен.
Та нуналъёсы шаермылэн бюджетаз ватсаса вуиз 242 миллион 786 сюрс манет. Со пӧлысь 106 миллион 250 сюрсэз вуиз калыклэн доходэзлэсь бичаськись выт чотын. Та вакытэ со тросгес люкаськыны ӧдъяз — шӧдӥськиз калыклэн уждунэзлэн йылэмез. Азьвыл чакламлэсь 10 миллионлы ятыр коньдон люкаськиз тыриськонъёс-штрафъёс чотын. Со сяна, федерал центрысь уксёен юрттэт вуиз на.

Ялан ужась комиссие пырисьёс чаклазы, малы висъяно вуэм коньдонэз. 40 миллион манет пала висъяськоз гурт хозяйствоослы эстӥськон басьтыны. Депутат Юрий Кайгородов вераз: гуртоос йӧлзэс дунтэмен вузало, нош переработчикъёс басьтӥсьлы сое ӵекто, куинь поллы дуно карыса. Озьы йӧл поттӥсь хозяйствоослэн табышсы чик уг люкаськы. Оло, та 40 миллионэз соослы юрттэт чотын висъяно, тунсыкъяськиз депутат.
Переработкая огазеяськонъёс литр йӧлэз, шорлыдын вераса, 11 манетэн басьто. Нош магазинъёсы со вуэ ог 30 манетэн. Нош тужгес но секытэз уж гуртоос вылэ усе ук. Озьыен, соослэн йӧллэсь табышсы но тыршемзыя люкаськыны кулэ. Бюджетъя, вытъёсъя но коньдон ужпумъёсъя ялан ужась комиссилэн кивалтӥсез Софья Широбокова пусйиз: йӧл люканэз, солэсь барыш поттонэз сэрттоно-пертчоно дэмен. Та пумысен вазиськимы Президентлы Александр Волковлы. Со матысь дыре кенеше люканы чакла переработкая предприятиосты. Соосын огкылэ вуоно: йӧлэз укыр дунтэмен басьтыса, туж дуно карыса, медаз вузалэ. Со сяна, йӧл поттонъя хозяйствоос уз азинске кун ласянь юрттэттэк. С. Широбокова ивортӥз на: 40 миллион манет висъяськоз СПК-ослы эстӥськон басьтонлы. Йӧл поттӥсьёслы юрттэт сётонъя шаерамы угось нимысьтыз программа кылдытэмын: соя висъяське 540 миллион манет коньдон.

Ялан ужась комиссие пырисьёс ӟечен пусйизы «Ижсталь» дворецлы уксё висъянэз. Солы кошкоз 63 миллион манет. Та луонлык сётоз «Ижсталь» дворецез «Мечел» огазеяськонлэн ваньбурысьтыз поттыны, сое республикалэн бурд улаз выжтыны, юртсэ выльдыны-тупатъяны. Озьы шаерамы кылдоз спортъя бадӟым центр.

Азьвыл чакламлэсь 28 миллионлы тросгес уксё висъяськоз республикаысьтымы кун программаосты быдэстонлы, 50 миллион манет — мувӧйя но газъя М. Гуцериев нимо институтлы оборудование басьтонлы, 400 сюрс манет — Нациосын ужан политикая министерстволэн кичӧлтэмезъя ужрадъёсты ортчытонлы.

Елена Никитина

 

Удмурт Дунне
By Удмурт Дунне 18 сентября, 2012 16:23