Театр возьма дасяськем учкисьёсты

Удмурт Дунне
By Удмурт Дунне 14 сентября, 2012 11:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Театр возьма дасяськем учкисьёсты

«Минотавр» эскиз-спектакльлэн репетициез. Режиссёр Александр Никаноров.

10-тӥ куарусёнэ Ижысь Ӟуч театрын йылпумъяськиз «Егит режиссёръёслэн творческой лабораторизы». Гранд-показ мынӥз лымшор бере бер ӝытозь. Калык трос люкаськиз, ог-огзылэсь туж пӧртэм луись спектакльёс зэмос фестиваль атмосфераез кылдытӥзы.

Нырысетӥез эскиз В. Сигаревлэн «Фантомные боли» пьесаезъя пуктэмын. Егит режиссёр Олег Молитвин саклык висъяз актёръёслэн шудэмзы: крезьгур ӧжыт, сцена вылын декорациос — ӝок, пукон но валес гинэ. Постановкаын Ӟуч театрысь валтӥсь актёръёс шудӥзы асьсэлэн тодмо манеренызы, соин номырин но паймытыны ӧз быгатэ.

 Мукетыз режиссёр Анфиса Иванова яркыт шоу карыса возьматӥз Ю. Клавдиевлэсь «Заполярная правда» драмазэ. Азьлогес, быдэс пьесаез калык азьын шара лыдӟем бере, учкисьёс веразы вал, пьеса ляб, ВИЧ висёнэн муртъёс шоры умоен учкыны дышетэ, огпол лыдӟыны ярамон гинэ шуыса. Спектаклез пуктыса, режиссёр возьматӥз: крезьгурез но декорациез уже кутыса, пуштроссэ символъёсын кужмоятыны луэ. Пьесаын кышкыт висисьёслэсь матысь муртъёссы куштӥсько — тае возьматон понна сценаез но залэз горд лента висъяз. Нош героиня, лентаез кесьыса, ассэ берен адямиос радэ пыртэ, калыклэн огдышем сямен малпаськонэзлы пумит султэ. Действие азьланьскемъя сцена вылысь куштӥськем коробкаос «улӟо» но, я улон карлы, я корослы, я квартираысь котырлы пӧрмо.

Ю. Клавдиевлэн «Заполярная правда» пьесаезъя постановка. Режиссёр Анфиса Иванова.

Егит актёръёс ӧжыт вераськизы, соин спектаклез валан понна текстэз тодыны кулэ вал. Соиз но зэм: туала театр дасяськем, лыдӟиськем учкисез аслыз кулэ каре.

Гранд-показын тужгес но тунсыко вал Александр Никаноровлэн «Минотавр» пластикая экспериментэз. Со пуктӥз Ф. Дюрренматтлэсь вашкала греческой мифъя кылдытэм пьесазэ. Актёръёс, одӥг кыл но вератэк, вырос но пластика пыр геройёслэсь сямзэс но пьесалэсь пуштроссэ усьтӥзы. Та ужез валан понна тодоно пьесаез но, адями психологиез но. Озьы ик та постановка кужмо шоу кадь возьматэмын вал: огшоры адями но, синзэ басьтытэк, учке, театралъёс понна но тунсыко.

Павел Зорин, Ижысь «Les Partisans» театрысь режиссёр спектакль сярысь тазьы шуэ: — Александр Никаноровлэн этюдэз вера, со зэмос художник шуыса. Одӥгез тужгес кужмо но яркыт сцена — Пасифаялэн но тӧдьы ошлэн уръяськемзы. Сыӵе аспӧртэмлыко материал туж быгатыса возьматэмын. Ижысь театр, малпасько, та эскизэз бадӟым спектакль карыса пуктысал ке, бадӟым вормон лэсьтысал.

 Гранд-показ туж удалтӥз, Удмуртилэн театр улонэзлэн выль историяз пыриз. Озьыен, элькунысьтымы театръёс дуннеысь искусстволэн выль тулкымез пала берытско ини. Гранд-показэ дасям тросэз спектакльёс Россиысь туала драматуръёслэн пьесаосызъя пуктэмын вал. Асьме вакытысь героез возьматӥсь туала театр — тужгес тунсыко но пайдаё. Показысь кык постановкаос Ӟуч театрлэн репертуараз пырозы. Возьмалом выль премьераосты.

Фото: Ӟуч театрлэн архивез, Павел Зорин

Удмурт Дунне
By Удмурт Дунне 14 сентября, 2012 11:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<