Ӵужодӥгъёс

Удмурт Дунне
By Удмурт Дунне Сентябрь 19, 2012 22:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӵужодӥгъёс

Татышлы ёросысь Кызылъяр гуртысь «Марӟан» фольклор ансамбль.

Туспуктӥз Сергей Петров.

Верос

Небыт лаем ыльнянь кадь мыло-кыдо Гыльмолло. Ныж пуртлы пумит но сямзэ уз возьматы. Коть тыкмачлы вандылы, коть куарняньлы — пал кылзэ но пинь ыбесыз сьӧрысь кыре уз лэзьы. Соин но, лэся, Гыльмолло вылын ворттылыны яратӥсьёс уг бырыло. Куаразэ поттытэк, юрттӥськоз но, эсэпласа визь-нод но сётоз. Туж сабырлы, озёло-тазёло кариськонэз нодсасьтэм.

Нош Менмолло? Таиз но акырӟан но, сьӧд ӝуш но ӧвӧл — гарамӧля котьку усьтэмын — сюлэмзэ адœытыны кожаса, вылды. Кылыз нош ӟазег вӧйын маллям-зырам табань кадь ик: кӧялоз-вӧялоз-небӟытоз-сюдоз-секталоз…

— А-а-а, тон-а та, ӵужодӥг? Айбат гинэ вераськом-а? Озьы медло! — Гыльмоллолэн телефонысьтыз Менмоллолэн куараез азбар тыр шуккиськиз: — Озьыен, тон, Гыльмолло ӵужмурт, картоптэ муэ гопалтӥд ни.
Ог ӝытсэ ке но мон дорын но кунояськыны-эсэпласькыны дырыд шедёз, поди. Со пумысь Гыльчабей палвайыжелы но нёргетыса нерад луиськиз ни. Пипу коръёслэсь ӵыпем-инъям коркаяд ик ми шокаськомы. Бон, со самой Гыльчабееным ик. Уг, уг вала дэймон кышно… — ӟырдатэм таба вылысь кылзэ басьтыны уг ик вала Менмолло.

— Мон но номырзэ уг валаськы, — Гыльмоллолэн лаем ымыз мырдэмак вайяськыны шӧтаз, — тон, ӵужодӥг, маке пумысь айгетӥд но… отӥыз ойгетон ньӧмын ортчиз…

— То-то уго… — Менмоллолэн шонаськись капка-ымыз ворсаськыса вуттымтэ, тӧл шоры учыраса музэн ялан ӟукыртэ: — Ей -богу, кылчинэ-иськавынэ, уг тодӥськы, кызьы могейтыны… Мон, шуисько, тон доры юрттӥськыны, картофкадэ мерттыны мынысал… Но тон, пе, арня талэсь азьло согыса вуттэмед ни. Таре юрттэт сётонэз ӧвӧл, иське?..
Вис радэз учыртыса, Гыльмоллолэн но кортнам кылыз эрике куриськиз:

— О-о, Менмолло ӵужодӥг, бакча гыремен, картоп мерттэмен ужпӧр йылсаське шат? Пенси шуоназы вамыштыса вуттӥ гинэ, уж гульымозь пыкъяськиз. Тани мунчоез но выльдоно шуисько вал…

— От-то-тот! — Менмоллолэн куараез Гыльмоллолэн пель сьӧраз пу гырлы кокам музэн шуккиськиз. — Мон но мунчо пумысь кылпум пӧськытыны медӥсько вал. Гыльчабейлэн кылыз пельме вандыса онгромытэ: мунчо ултӥмы тӧл шула, париськем интые, ӟонгыраса потӥсько, пе, со мунчоысьтыд. Соин, шуисько, улӥ корзэ выльдыса басьтоно вал. Так-то мунчомес тонэныд ик кыкнамы ӵупимы вал. Ӵапак одӥг радлы тырмымон коръёсыз но кылизы.

— Мултэс ӝужыт луиз ке, вань пӧсьсэ вӧлдэт ньылоз шуид, отэ? От, самой со коръёсмы гид урдэскамы, пушнер пӧлын ик кыллё шуыса учыртӥ вал. Вай ай-ко, шуисько, Гыльмолло ӵужодӥгеным со коръёсты ултӥ радаз чуртналом. Собере, пенсие вамыштэмдэ но пусйыны сьӧлык уз луы, отэ?

— Озьы шуиськод бере, оскалтыса адӟом ик-а, мар-а… — ӵужодӥгезлэн ву-ӵыртэмезлэсь акыляк луыса соглашаськиз Гыльмолло. — Я, ӵуказе нуназе бере дорад мотоеным тургато.

…Менмоллоен Гыльчабей пушнерен, колысэн шыд ӟузьылон висказы вуиз Гыльмолло.

— От-то-тот! Туж ушъяса вуид ук, — Менмолло кизэ ӵушалтыса ӵужодӥгезлы мычиз. — Нуназе сиськон вакытэ бадӟымлэсь но бадӟым куноос гинэ вуо, шуо. Ойдо, Гыльмолло, милемын ӵош сусьнаськы.
Ӝутэм тэркыез тыро уд кельты шуыса, Гыльмолло но ӝӧк сьӧры каръяськиз. Ма но со вераськон сямен ик нуназеянзы йылсаськиз.

— От, шуисько, со мунчомес кыкнамы ик ӵупим-ӝутӥм вал ай, — Менмоллолэн азьпал ужзы пумысь кылыз пӧсьтӥз. — Только тань улӥ коръёсыз пеньӟиллям ни, пушказ тӧл шулам-вузэм ик кылӥське.

— Э, мон ӝык тон бӧрсьы куинетӥ-ньылетӥ мунчое вуи ни, дыр. Шунытсэ уг возь ке, мар отын веникен шонаськод на. Тани ортчем сӥзьылэ но выльдӥськиськиз.

— Тынад ки мынэ уго, Гыльмолло, — Гыльчабейлэн кылыз аслаз. — Менмоллолэн мыркесь будӥллям. Маке лэсьтэмъяськыны турске, сьӧраз ветлоно луэ…

— От-то-тот! — Менмоллолэн кыл дась. — Кытчы куасалтэ вайыж! Тани ӵужодӥг ать-два выльдоз ай коръёссэ. Озьы-а? — Гыльмолло шоры мырак учкалтӥз.

— Вань улонэд мурт вылэ оскиськон но чӧлскон гинэ тынад, — картэз пумитэ шоналтӥз кышномурт. — Адямиез ужаны ӧтиськод, ачид быжыныд шонтӥськод. Ӟеч мурт озьы ӧй сэмберъяськысал.

— Мон шат отын янгыш? — кышноез пумитэ ожалскон кадь луиз Менмолло. — Кинэз-маиз тодӥз, мыным путёвка донгозы шуыса.

— Кыӵе путёвка? — дэймыса ымзэ усьтӥз Гыльмолло.

— Та коскамлы толон ӝыт путёвка пыртӥзы, — картэз интые валэктыны басьтӥськиз кышноез. — Ӝуась маке, пе. Тани ӝоген кечырсконо луоз ни Муское кошкись поездэ. Мунчо сэзъялтон тон вылэ погыльске, Гыльмолло.

— Мар татын Муско но мунчо? — номыре ӧз санла куно.

— Витёйлы Муское путёвка донгиз выль кузёмы, — Менмолло сэраськиз. — Сё, шуэ, Менмолло агай, туэ пенсие кӧчод, но ӟеч карыса кельтэм потэ на. Итак, шуэ, пожарка депоын возьмаськыса гумыр-даурдэ ортчытӥд ни. Столицамес-шоркармес пал синмыныд коть мед адӟод. Тӥни озьы, кошконо луисько.

— Соку отысь берытскемед бере вуылом шат? — огшаплы ӟудӥз лыктэм мурт.

— Эн юскиськы, ӵужодӥг, — Менмоллолэн кылыз кӧ музэн берга. — Домкратэн мунчо сэрегме живо-два ӝутод тон. Тани Гыльчабей но юрттӥськыны кыткиськоз. Ужды пӧрмоз! Я, мон дырто ни, станциозь сюрес вань гинэ.

Менмоллолэн сюрес вылэ котырез тулъямын ни вылэм: мешок быдӟа сумказэ пельпумаз ошиз но урам кузя лашкинтӥз.

Гыльмолло но ӟудыса-долкаса кема ӧз ул, така йырлы укшась домкратэныз мунчо котыртӥ лёгаськиз ни.

Кема выриз со. Озь но, тазь но турттӥз, ломен пуклёкен но курадӟиз, нош сись сэрег таки ӧз сётӥськы. Жуммем бӧрсяз огшап ял карыса, мунчо котыраз выль кужымен выльысь кыткиськиз.

— Эх! — шуккиськиз провор куараез. Дымбыр-шалтыр! Бух! — вазиз мунчо пушкын, но ӝопыетӥ бугырак тузон пурӟиз.
— Э, калтак! — сялӟиськиз воргорон.
— Эке-кек! — чабкиськиз Гыльчабей, — мунчо вӧлдэтмес шальтратӥд-куашкатӥд ук, Гыльмолло!
Воргорон ӧз куареты.

— Мар каръян йыры та? — кышномуртлэн киосыз тӧл вуко манер шонало, — мар эмгеке усиськиз, кыӵе адӟонэ ӝимиськиз. Гурт калык тодӥз ке, мар шуоз ни?

— Ачид кылдэ серметад ке, тодӥсез уз лу, — ёмырам мунчо шорысь синзэ уг басьты Гыльмолло. — Куашказ бере, выльдом ни…

…Менмолло Мускоысь бертытозь, мунчо котырын вайгетӥз Гыльмолло. Быдэс мунчоез сэзъялтоно-сӧзнано луиз куанерлы. Воштос коръёс, вӧлдэт пулъёс шедьтытэк, бакча берысь сике ветлоно луиз. Ярам, липет улэ вуиз выль мунчо. Со вискын капкаетӥ пырись но луиз.

— О-о-о, учкод ке, кельыштыремед тон мон дорын! — соку ик сальтыртыны ӧдъяз.  — Оло, Гыльчабее котыре но няняськид. Марысь мар ке, ӵужодӥг шуыса уг учкы!

— Пшол тон син азьысь! — пиньёсыныз гизьыртӥз но Менмоллолэн пыд азяз жоб дыльдыен сялӟиськиз Гыльмолло. Собере ворсатэк кельтэм капка сьӧры чот-чот вамышъёсын ышиз но, мотоезлэн куараез гинэ кылӥськиз на.

Рашит Хайдар

Удмурт Дунне
By Удмурт Дунне Сентябрь 19, 2012 22:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<