Бретон кыл вуттӥз Удмуртие

Удмурт Дунне
By Удмурт Дунне Сентябрь 26, 2012 17:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Бретон кыл вуттӥз Удмуртие

Гвен

Кемалась ик ӧвӧл Иже кык нуналлы гинэ вуылӥз Франциысь Гвен нимо пияш.
Та куно вордӥськем шаераз кивалтэ бретон кылэз дышетонъя центрен, вань сюлмыныз-мылкыдыныз тырше та кылэз азинтыны. Со сяна, Гвен тодон-валан люка аспирантураын, диссертациез сӥземын Россиысь пичи калыкъёслэн кылъёссылы, странамылэн кылъёс ласянь политиказэ радъямезлы.

— Гвен, ма пумысен диссертациедлы та удысэз бырйид?
— Россиын уло-выло ог 200-лэсь ятыр калыкъёс. Котькудӥзлэн аслыз гинэ тупась аспӧртэмлыкез вань. Мон тодӥ: Россилэн валтӥсь законаз — Конституциын — пусъемын странаысьтыды вань кылъёсты утён сярысь куронъёс-катъёс.  Нош Франциын таӵеез ӧвӧл, соин ик мылкыды ӝутскиз Россиысь калыкъёслэсь улэм-вылэмзэс эскерыны, кылзэс азинтонъя амалъёсынызы тодматскыны. Ми, Европаын улӥсьёс, тодӥськом бигеръёсты, Кавказ палъёсын улӥсь калыкъёсты, нош  фин-угоръёс сярысь ивор паськыт вӧлмемын ӧвӧл, соос палэнэ кылё. Уг янгыша, дыр, шуи ке: Брангуртысь песянайёслэн «Евровидение» ӵошатсконэ пыриськемзылэсь азьло  удмуртъёсты дуннеын ӧз ик тодылэ.

Соин ик мыным туж тунсыко потӥз Россилэсь кылъёсты утёнъя политиказэ эскерыны. Диссертациелы бырйи удмурт, пор но мокша кылъёсты. Соосты куспазы эскерисько. Валай: бретон но удмурт кылъёслэн кылдон но юнман сюресазы туж трос огкадез. Али но кылэз утёнъя ужпумъёсмы ог-огзылы тупасесь: бретон кыл француз кыллы сётӥське, нош удмурт кыл — ӟучлы.
Малпасько, мынам лэсьтэм уже юнме уз луы — Франциын тодозы фин-угор выжыысь та 3 кылъёс сярысь. Кин тодэ, азьланяз, оло, удмурт кылэз дышето (Гвен кияз бергатэ  «Удмурт грамматика француз кылын» книгаез).

— Кытын тон дышид ӟуч кылын сокем ӟеч вераськыны?
— Школаын дышетскыкум, мон ветлӥ ӟуч кылъя курсъёсы. Матысь адямиосы, ӵыжы-выжыосы пӧлысь нокин но сое уг тоды. Нош мынам туж бадӟым мылкыды вал. Ӝыны ар Самараын улӥ, отын стажировка пыр потӥ. Собере тырши Москваын — Францилэн Россиысь посольствояз. Вуылӥ ни Россилэн пӧртэм улосъёсаз, ӟуч калыкен вераськыса, кӧты тыриз ни. Табере фин-угор выжыысь адямиосын матысьгес тодматскеме потэ.

— Тон Иже нырысьсэ вуид. Кыӵе малпанэд кылдӥз шоркармы пумысен?
— Киям карта кутыса, городэтӥ быдэс нунал поръяй. Соку ик син шорам йӧтӥз, Ижын ваньмыз ӟуч кылын гожъямын шуыса. Йошкар-Олаен ӵошатыса, со паймымонгес вал. Угось соослэн урамъёсысьтызы пумитаны луэ ӟуч но пор кылъёсын гожъямъёсты. Нош Ижын урамъёсысь «дугдыллонни» кылэз гинэ синйылтӥ. Ижысь черкъёсы, музейёсы вуылӥ. Удмуртъёсын но тодматскыны-кенешыны вуи. Пайдаё пӧрмиз Удмурт шаере вуылэме.

Мария Золотарёва

Удмурт Дунне
By Удмурт Дунне Сентябрь 26, 2012 17:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<