Азинлык луоз-а?

Удмурт Дунне
By Удмурт Дунне Сентябрь 17, 2012 16:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Азинлык луоз-а?

Удмуртилэн делегациез.

 Быдэс дуннеысь фин-угор калыкъёслэн Венгриын ортчем конгрессы (та сярысь гожъямы 12-тӥ сентябре потэм номерамы) бӧрсьы трос юанъёс, сюлмаськонъёс кылизы на. Тужгес лэчытэз: вань-а азинлыксы таӵе ужрадъёслэн? Вань ке, малы фин-угор калыкъёслэн лыдзы ялан кулэсме?
Историяя, кылъя но литературая Удмурт институтысь профессор Галина Никитина   конгресслэн ужаз ньылетӥзэ пыриськиз ни. Со пусъе:
— Таӵе конгрессъёс ӧй ке ортчылысалзы, калыкъёс ас куспазы гинэ улысалзы. Нош бадӟым форумъёсын соос ог-огенызы ӟечгес тодматско, выль малпанъёссы вордӥсько. Соин воксё азинлыксы ӧвӧл шуыны уг луы. Но куд-ог тырмымтэос син шоры йӧто ик. Шуом, конгресс ньыль арлы одӥг пол люкаське бере, Фин-угор калыкъёслэн Консультативной комитетсы со ортчем аръёслы рос-прос йылпумъянъёс лэсьтыны кулэ. Пусйыса, кызьы быдэсъяськизы тужгес но шугъяськытӥсь ужпумъёс. Тани, шуом, конгрессысь конгрессэ вераськон мынэ, калыкъёслэн лыдзы кулэсме шуыса. Но огазе кариськыса, талы пумит ӝот-ӝот ужрадъёс кутыны малы ке ум пӧрмытӥське. Со дыре ик вань фин-угоръёслэн сюлэмзы висе  калыклэн тазалыкез, анай кыл понна.
Фин-угоръёс пӧлын ханты, манси калыкъёслэн гинэ лыдзы будэ. Но малызэ ваньмы валаськом ук. Али соослэн егитъёссы шӧдӥзы, асьсэды выжы калык пӧлы пыртон пайдаё луэ, пӧртэм капчиятонъёс сётэ. Но со егитъёс ваньзы-а анай кылзэс тодо? Данъясько-а ханты, манси луэменызы? Мар ке лэсьто-а калыксэс ӝутон понна?
Галина Аркадьевналэн выллем шугъяськонъёссы кылизы мукетъёсызлэн но делегатъёслэн. Конгрессэз валтӥсь кивалтӥсьёс, Консультативной комитет сое шӧдыны, кылыны кулэ вал. Но яке дыр ӧз тырмы, яке отчы-татчы пазяськоно луиз. Угось конгрессын укыр трос докладъёс лэсьтэмын вал, котькуд улослэн, кунлэн  ужамзэ возьматэмез потӥз. Та син шораз йӧтэм «Айкай» театрлэн кивалтӥсезлы Пётр Даниловлы но:
— Секциосын тросэз доклад лыдӟисьёс ӧзгес валалэ кадь, кинлы вазиськыса, соос верасько. Зэм, котькудӥз ас улосаз маке лэсьтэ. Но со сярысь пыр-поч мадем интые, тросгес саклык висъяно вал шугъяськонъёслы. Юрттэт куроно вал форумлэсь, секыт югдуре мед дурбасьтоз шуыса.
— Туж трос отчёт выллем докладъёс лыдӟемын, соосты эскерыса, юанъёс сётъяса но ќм вуттэ, — шуэ Галина Никитина. — Малпасько, азьланяз докладъёс ичигес, но мур-мур дасямын, пӧртэм эскеронъёс вылэ пыкиськемын луыны кулэ. Конгрессын кутэм резолюция но огъя кылъёсынгес гожтэмын, азьланяз ньыль арлы пуктэм ужпумъёс рос-прос уг адӟисько. Но со дыре ик валаськиз: вань фин-угор калыкъёсты огазеясь бадӟым сюлмаськонъёсмы вань. Шу­ом, Венгрия,  Эстония кадь нимаз кунъёсысь но егитъёс палэнэ кошко, анай кылзэс вунэто. Асьмелэн визьмо удмурт егитъёсмылэн шудзэс, улонын ас интызэс палэнысь утчамзы уг паймыты ни, лэся, шаерамы будыны луонлыкез соос уг адӟо.
Нош мар малпало асьсэос егитъёс? Конгресс дыръя фин-угор егитъёслэн ассоциацизылэн котрес ӝӧкез но ортчиз ук. Меӵак вераса, солэн ужаз пыриськемъёс сокем бурдъяськемын ӧвӧл.
— Конгресс бере туж пӧртэм мылкыды кылиз, — шуэ «Шунды» огазеяськонлэн кивалтӥсез Ольга Тронина. — Огласянь, шумпотӥ выль егитъёсын, соослэн огазеяськонъёссылэн уженызы тодматскемелы. Трос вераським выль проектъёс борды дэмен басьтӥськон сярысь. Фин-угор егитъёслэн ассоциацизы конгресслэн резолюцияз ог 30 дэмлан дасяз, куиньмосэз соос вазиськонэ пыризы. Егитъёслы сӥзем котырес ӝӧк оглом мӧзмыт но ляб ортчиз. Огъя сюлэмшугъяськонъёсты сэрттон-пертчон интые,  со пӧрмиз ужан амалъёсмес возьматонлы. Солэн пайдаез бадӟым меда?
Пусъёно, дыр, созэ но: Венгриын ужрад капчиен ӧз сётӥськы. Кризисэн сэрен бадӟым шугъяськонъёс кылдылӥзы.
— Ас поннам шуисько: пыкылыны эн дыртэ. Конгресслэн трос ӟечез вал, — шуэ тодосчи Галина Никитина. — Нырысь ик, удмуртъёс асьсэды яркыт но лад-лад калыкен возьматыны быгатӥзы, конгрессын нырысьсэ вань калыкъёс анай кылын вераськизы. 650 муртэ интыяны, ужзэс радъяны  венгеръёс шугъяськизы ке но, оглом пӧрмытӥзы.
Дуннеысь фин-угор калыкъёслэсь нырысетӥ конгрессэс ортчытэм дырысен туэ 20 ар тырме. Куд-ог эскерисьёс пусъё: куатетӥ конгресс аспӧртэм гож выллем луиз. Со фин-угор движенилэсь ляб но кужмо интыоссэ ӟеч возьматӥз. Озьыен, бадӟым воштӥськонъёс витё азьланяз.

Елена Миннигараева
Удмурт Дунне
By Удмурт Дунне Сентябрь 17, 2012 16:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<