Шарканъёс шумпотто коньыгубиен

Удмурт Дунне
By Удмурт Дунне Сентябрь 24, 2012 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шарканъёс шумпотто коньыгубиен

Сылалтэм коньыгуби

Шаерысьтымы кооператоръёс ужазы арысь аре выль амалъёсты куто но быдэс Россиын вормисьёс пӧлын ветло. Кызьы ке вуз каронын, озьы ик асьсэ кужымен сиён-юон поттонын. Тани туэ Шарканысь райпо кабзэ выль удыс мытӥз — коньыгуби сылалтыны ӧдъяз. Консервазылы «Шарканские рыжики» ним сётӥзы.
Шарканысь кооператоръёс кемалась умой ужало. Райпоен быгатыса но валаса кивалтэ йӧно, дӥсьтӥсь кышномурт Алевтина Загуляева. Вылез, ӟечез борды со кышкатэк басьтӥське но ваньзэ йылаз-пумаз вуттэ. Со понна ик Алевтина Изосимовнаез гажало ёросын но, Удмуртпотребсоюзын но.

— Та уж борды ми кутским кылем арын, — маде Алевтина Загуляева. — Эскерон вылысь кӧня ке сю банка коньыгуби сылалтӥм. Асьмелы но, калыклы но кельшиз выль сиёнмы. Нош туэ ужмес паськытатыны документъёс басьтӥм. Пайдаез кык полэс. Райпо кемалась поттэ юзматӥсь юонъёс. Но таиз вузмы огдыре, гужем гинэ, умой кошке. Нош губи быдэс ар ӵоже ӟеч вузаське. Ужасьёсмылы тросгес уждун басьтыны луонлык кылдэ.  Райпо выль ужез радъянлы ичизэ 600 сюрс манет висъяз. Нырысь басьтӥм банкаосты пытсан агрегат но стерилизатор, нош туэ — тефлер, пичи кран. Соин банкаосты ӝутъяло стерилизаторе.

Губи сылалтыны бадӟым инты кулэ ӧвӧл. Татын синмаськымон тыршо Татьяна Корепанова но Людмила Перевозчикова. Ужзэс капчи уд шуы, но эшъёс уг ӝожтӥсько. Басьтэм губизэс чылк-чылк мисько, ӝыны литръем банкаосы тыро, пытсало но стерилизаторын 115 градус пӧсен 20 минут пӧзьто. Консерва дась, но сое кӧня ке пукетыса возёно на, собере гинэ сиыны но вузаны луоз.

Шаркан — коньыгубиен узыр ёрос. Татчы нуналаз 200-250 килограмм но губи вутто. Кооператоръёс одӥг килограммзэ 70 манетэн басьто но смена ӵоже 150 банка лэсьто. Шарканъёслэсь ӟеч ужзэс тодыса, бускель Пермь улосысь но татчы губи вайылӥзы.

— Нош азьланезлы кыӵе малпанъёсты? — юатэк ӧй чида Алевтина Изосимовналэсь.
— Ма, та уже сомында коньдон токма ӧм куштэ ук, — шуэ А. Загуляева. — Губи консерваос лэсьтэммы бере кутскомы сӥлен йыды, рис но сьӧдчабей кеньыръёсын консерваос поттон борды. Таиз но сиёнмы басьяськисьёслы яраны кулэ. Ӝоген Ижын ортчоно «Зарни сӥзьыл» ярмаркаын «Шарканские рыжики» консерваосты веръяны быгатоды.

 Геннадий Романов

Удмурт Дунне
By Удмурт Дунне Сентябрь 24, 2012 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<