Дышетӥсь луо, министре пуксё

Удмурт Дунне
By Удмурт Дунне 3 сентября, 2012 10:17

Ижевскысь Первомай ёросысь Елена но Алексей Ефимов кузпалъёслэн Дарина нылзы туэ 3-тӥ классэ мыныны дасяське. Со 31-тӥ школае ветлэ.
— Дарина каникулэзлэсь быремзэ возьмаса кемалась пуке ини, — нылыз сярысь вера Елена Леонидовна. — Школае мыныны басьтэм ӵыж-выль дӥськутсэ, сумказэ нуналлы быдэ сямен дӥсялля, синучкон азьын берга. Школалэсь но эшъёсылэсь гинэ ӧй, дышетӥселэсь но туж мӧзми ини, шуэ.
Нылмес нырысетӥ классысен ини дышетэ Надежда Шиврина. Синмаськымон, усто дышетӥсь. Нылпиос сое ярато, дораз кыстӥсько. Нырысетӥ классэ мыныкуз, нылмес удмуртаз сётӥмы вал. Ачиз но мыло-кыдо отчы вамыштӥз. Но нылпиос  классазы тырмыт ӧз люкаське. Озьы Даринаез «ӟуч» классэ выжтоно луимы.
— Дариналэн юнме шорысь сюлэмыз сокем-сокем школа пала уг кыстӥськы, — бордамы итӥське атаез Алексей Иванович. — Вераськемезлэсь азьло ик, оло, букваосты тодманы кутскиз. Асьмеос шӧдыса ик ӧм вуттэ, нылмы огдыре лыдъяськыны но лыдӟиськыны дышиз. Солы школаын дышетскон  капчиен сётӥське, «витьёс» гинэ вайылэ. Котьмаин тунсыкъяське: суреда но, эктэ но, кырӟа но, кылбур-веросъёс но пӧрмытъя.
Дарина 3 аресъем Соня сузэрзэ оломарлы но дышетэ. Соиз «дышетӥсезлэсь» куддыръя акыляк но потылэ, пичи ук ай, нылашлы бызьылон но аляктон, мунёосын шудон кулэ. Нош Дарина сузэрезлы, тетрадьёс но ручкаос сётыса, шуэ: мон тынад дышетӥсед, мынэсьтым кылзӥськыны кулэ. Школае мынӥд ке, мон соку министр луо ини. Соня «министр» кылэз уг вала на, но апаез сьӧры школае мынон понна али ик улляське ини.
Дариналэн мамаез но папаез кадь визьмо луэмез потэ. Елена Леонидовна Ижысь нылпи садын воспитатель луыса тырше. Со йылпумъяз Удмурт кун университетысь психолого-педагогической факультетэз.  Алексей Иванович Ижысь механикая заводын мастер, дышетскемын Москваысь статистикая но экономикая институтын.
— Вавож ёросысь Зямбай гуртын Нина ӵужанае улэ. Отын арня пала кунояй, — шумпотонзэ кисьтэ но кисьтэ Дарина. — Шудыса но шур дурын пыласькыса гинэ дырме ӧй ортчыты, бакча урыны юрттӥ, будосъёс вылэ ву киськай. Ми асьмеос но городын пу коркан улӥськомы. Отын но мамаелы но песянаелы трос юрттӥсько.
Дарина улон шоры бадӟымъёс сямен али ик учке ини. Нырысь ик, пе, школаын дышетско, собере тодон-валан басьтыны университетэ пыро. Кӧня ке дышетӥсьын ужаса, министре пуксё.
Ма бен, малпанэз Дариналэн мед быдэсмоз. Асьмелы кулэ оскымон кивоштӥсьёс.
Любовь Тихонова.

Удмурт Дунне
By Удмурт Дунне 3 сентября, 2012 10:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<