Мынам ваньмыз аслам!

Удмурт Дунне
By Удмурт Дунне 17 августа, 2012 11:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем даурлэн 90-тӥ аръёсаз Совето Союз куашкамен валче бырыны кутскизы бадӟым колхозъёс, совхозъёс.  Соос интые кылдылӥзы пичи фермер хозяйствоос.
Удмуртиын 3 сюрс 500-лэсь ятыр ас понназы ужась семьяос яке ӵош кариськыса ужасьёс вал. Али соослэн лыдзы 1 сюрс 575 котырын. Малы фермеръёслэн лыдзы синӥз?
Асьме шаерысь 7 фермер-крестьян хозяйствоослэн огазеяськонзылэн тӧроез Михаил Лебедев — Дэри ёросысь «Заречное» хозяйстволэн кузёез. Туэ со вормиз «Устоез ужбергатӥсь» конкурсын, нош нырысьсэ та вожвылъяськонлэсь статуэтказэ басьтӥз ни 2006-тӥ арын. Михаил Викторовичлэн 677 гектар музъемез, со пӧлысь 640 гектарез — гыроно-кизёно муос, 37 гектарез — тыметъёс. Будэтэ ю тысь культураос, картошка, вордэ пудо но чорыг.
— Михаил Викторович, малы мукетъёсыз тӥ сямен ӟеч ужаны ӧз пӧрмытэ?
— Нырысь ик, уноез соос пӧлысь дасесь ӧй вал нимаз ужаны. Соин ик секыт потӥз. Кин ке, техниказэ вузаса, мукет удысэ кошкиз, кылсярысь, вуз каронэ, мукетъёсыз воксё палэнскизы. Кыкетӥ мугез — кулэсмиз кун ласянь юрттэт. Нырысь фермеръёс техника, кредитъёс капчиен басьяллязы, нош берло дыре кредитъёсты берыктон трослы будӥз. Вань мукетыз но: рынокын инты уг сюры, будэтэмзэ нокытын возьыны но мукет. Нош мон ӧрзэ шедьтӥ, юрттӥсьёсыным, тросэз аслам выжы-кумыосы, огкылын ужаськом. Со ик возе, дыр, милемыз.
* * *
Но ваньмызлэн М. Лебедевлэн кадь уг пӧрмы. Тани Дэри ёросысь ик Пётр Елатов кин гинэ луыса ӧз тыршы: «Завьяловский» хозяйстволэн валтӥсь агрономез вал, Гурт удысъя но сиён-юонъя министерстволэн пӧртэм ёзъёсаз тыршиз. 90-тӥ аръёсы кивалтӥз ёросысь музъем реформаосъя комитетэн.
— Мон гуртын вордскемын но будэмын. — шуэ Пётр Елатов. — Соин ик пичи дырысеным вань ужез ас вылам шӧдӥ. Соин ик колхозъёс куашканы кутскон дыръя аслэсьтым хозяйствоме кылдытыны малпай. Мыным висъязы 40 гектар музъем. Со пӧлысь 3,6 гектарез аслам, кылемзэ быгатэмея люкетэн-люкетэн басьтылӥ. Интыяськи бырем гуртэ, соку фермере потӥсьёслы музъем сётӥське вал палэнын гинэ. Со гуртын куке но 250 юртъер вылэм, нош мон лыктыку, куинь арлыдоос гинэ кылемын на вал. Зор-кот дыръя сюресъёс ветлыны луонтэмесь.
Нырысь ик пичигес гинэ, мунчо кадь, улон инты лэсьтӥ. Картошка, бакча сиёнъёс будэтӥ. Но ӧй вал соосты возён интые. Соин сэрен куд-ог аръёсы будэтэмзэ но йӧскадь пайдаен вузаны ӧй быгатылы. Соку музъемлэсь удалтонлыксэ ӝутон борды кутски. Басьтӥ трактор, кык машина. Мыным удалтӥз ай: кредит понна бадӟым процент ӧй тыры. Бӧрысь асьсэ хозяйствозэс радъясьёс кредитсэс 200 процентэн тыроно луылӥзы. Озьы тросэз куашказы. Нош ми тупатӥм юртъермес, пуктӥм корка, мунчо, гудӥм колодча, ваньзэ кенерам.
Нырысь котьмаин выри: будэтӥ турын, вордӥ сӥльлы пудо, скалъёс. Но выроно кариськи картошкаен но бакча сиёнъёсын гинэ.
Котькуд гектарысь 800 центнер кубиста, 1000 центнер ӵужкушман, 500 центнер гордкушман но 300 центнер картош люкаськылӥз. Со Совето вакыт лыдпусъёслэсь 4-5 поллы тросгес вал.
— Озьы ке но фермерысь кошкиды. Солэн бадӟым мугез вал, дыр?
— Дефолт луэм бере будэтэмме вузаны ӧй быгаты. Уно коньдон тӧлъя-буръя кошкиз. Озьы ваньзэ аналтӥ, ворсай гидме.
Али Пётр Елатов музъем ужен уг выры ни. Но сюлмыз вӧсь луыса чакла, кызьы куашкало Дэри ёросысь хозяйствоос. Ма отын гинэ шат югдур секыт. Тани кылӥське: вузаське Сарапул ёросысь фермерлэн гидэз, Кез ёросысь музъем бордын тыршисьлэн техникаез. Оло, быро ни фермеръёс?

* * *
Яр ёросысь Леонид Егоров Удмуртиын нырысьёсыз пӧлысь луиз фермер. Соос кузпалэныз Нина Арсентьевнаен колхозысь потӥзы 1992-тӥ арын. Басьтӥзы асьсэлэсь пайёссэс, бордазы ватсазы анай-атайёссылэсь музъемъёссэс. Озьы ваньмыз 39 гектар люкаськиз. Со дырысен ортчиз ни 20 ар.
— Та аръёс ӵоже воксё ӧй узырмы, шуыны луоз, — валэктэ Леонид Егоров. — Кредит огпол но басьтэме ӧвӧл. 17 ар коньдон люкаса, мырдэм но кызьы басьтыны быгатӥм МТ-82 трактор. Солы 50 процент дотация сётӥзы. Сюро таза пудое ваньмыз 50 йыр. Со пӧлысь скалъёсмы 27. Йӧлмес вузаськом «Глазов-молоко» предприятие, оглюкетсэ калык басьтэ. Кӧня ке вузаськом на сӥль но. Но кунянъёсмес асьмелы, пудо выльдонлы, кельтӥськом. Пудоез сюдыны турын но ю будэтӥськом. Вань аслам комбайнэ, киын лэсьтэм ю куасьтон но чылкытатон, изон агрегатъёсы. Ю тысь 30 бункер котырын люкаське, нош кылем арын 38 луиз.
— Уд жаляське-а фермер кариськемды пумысен?
— Уг. Котьма мед шуозы, но мынам ваньмыз аслам, мон аслым ачим кузё. Зэм, шутэтскыны дыры уг кыльы ни, но мон малпасько, уж — со шутэтскон.

* * *
Туэ июль толэзе ортчем  Правительстволэн Президиумезлэн кенешаз Гурт удысъя но сиён-юонъя министерствоез дасяны куремын республикаысь агропромышленность удысэз азинтонъя программалэсь проектсэ. Отын нимысьтыз саклык висъяськоз фермер-крестьян хозяйствоослэсь лыдзэс будэтонлы, кутскись фермеръёслы грантъёсын но субсидиосын юрттонлы. Макем ӝог та уж быдэстэмын луоз, сокем вазь пайдаен берытскоз.
Иван Аркашев.

Удмурт Дунне
By Удмурт Дунне 17 августа, 2012 11:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<