Мукет дунне

Удмурт Дунне
By Удмурт Дунне 17 августа, 2012 11:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кызьы утёно матысь адямиосмес вотэсэ йыромемлэсь?

Туннэ син азе ик пуктыны уг луы ни асьме улонэз  выль технологиостэк, компьютеръёстэк, Интернеттэк. Валэктонэз ӧвӧл, макем бадӟым «визь революция» ортчиз улонамы, макем бадӟым пайдаез солэн туннэ улон-вылонамы. Но соин валче Интернет асьмеды шукке мукет боды пумыныз: калык кугӟа вотэсэ, куд-огез отысь потыны нокызьы амал уг шедьты ни, озьы компьютер, чонари музэн, сюпсе пиналъёсмес.
Кинлы ке со нокыӵе уг поты: умой ук — пинал дорын пуке, уг юы, уг кыскы, наркотикъёсын уг кушласькы, ульча кузя уг кыстаськы… Со дыре ик эмчиос но психологъёс кемалась верало ни: компьютерлы дышон (зависимость) юонлы-кысконлы укшась кышкыт висён луэ, угось со сьӧрын султылытэк пукон сӧре адямилэсь тазалыксэ, лулсэрзэ, сое «ляльчилы» пӧрмытэ. Кызьы утёно матысь адямиосмес вотэсэ йыромемлэсь? Со сярысь вераськиськом Ижысь «Психолог-плюс» центрысь специалистэн Анастасия Масловаен.  
— Валамон, туннэ пиналмес компьютер сьӧрын пуконлэсь алыны асьмеос ум пӧрмытэ ни, но юрттыны быгатом. Со понна нырысь ик тодыны кулэ мугъёссэ, малы пинал компьютере вые: анай-атаез уг вала, огъёзъёсыныз уг тупа, улонысь ассэ шедьтыны шугъяське яке со отысь пумита сое, мае артысь уд адӟы, уд тоды.
Компьютер борды бурмытэ сям но — адямиос пӧртэм луо ук: кин ке етӥзгес-шаплыгес, калык пӧлын луыны яратэ, нош мукетыз востэм, ас вактаз улӥсь — таӵеослы компьютер тужгес матысь эш луэ. Виртуальной улонэ зымо улонын, ужын асьсэды шедьтымтэос. Соос шуо: зэмос улонын монэ нокин уг вала, нош малпам улонын ваньмыз умой. Огласянь, зэм умой: Интернетын капчигес аспардэ шедьтыны, кенешыны, кызьы мылыд потэ озьы (коть жоб кылъёсын, со понна нокин уз мыжгы) малпанъёстэ кисьтыны… Озьы со нуналмысь отчы мургес но мургес вые — угось Интернет пыдэстэм: пинал я шудэ, я социальной нимаськись сетьёсын пуке, ачиз но валатэк, дышем сямъя «шырзэ» зӥбылэ…
— Кыӵе тодметъёсъя валаны луоз пиналлэсь компьютерен черламзэ?
— Нуналмысь кемагес компьютер сьӧрын пуке, отӥяз уйёссэ но уг султылы ни, дырез сураны кутске. Кытчы ке палэнэ кошконо луэ ке, компьютертэк аслыз инты уг шедьты, пӧсекъяны кутске, ӝоггес берытскыны выре. Лекоме, матысь адямиосыныз но керӟег вераське яке ас вактаз усе, мылкыдтэк ветлэ. Дышетсконзэ аналтэ, эшъёсыныз пумиськылэмысь, калыке потамысь  дугдэ, дорын пуке.
Компьютерлы дышон шӧдӥськытэк уг кыльы огъя тазалык вылын но, со соку ик адӟиське: синъёс кӧсало, адями сиськемысь дугдэ, умме усьыны курадӟе, ассэ чакламысь дугдэ.
— Тазалыклы тужгес кышкыт луо, шуо, онлайн но оффлайн шудонъёс. Таиныз пиналъёс гинэ ӧвӧл, арлыдоос но уйбытэн шудыса пукыло.
— Мон чутрак озьы ӧй шуысал. Пӧртэмез ӧвӧл, шудонэ-а выёд, соцсетьёсы-а.
Шудонъёс адямилы луонлык сёто мукетъёсын кусып тупатыны. Кудмы асьмеос  кызё ар талэсь азьло быгатылӥм кунгож сьӧрысь огъёзъёсынымы ваче вераськыны? Яке ковбой кариськыны, инсьӧре лобаны, огпол ке но герой луыны?
— Жугиськонэн-ыбы­­лӥськонэн герӟаськем видеошудонъёсын шудыса, пинал уг-а лекомы? Шӧдӥське-а со будэмзы бере: сыӵе пиналъёс тросгес  йыруж уг лэсьто-а?
— Мон учкылӥ сыӵе эскеронъёсты-исследо­ва­ни­ос­ты­, но меӵак верало: тырмымтэосыз трос. Лабораториын эскеронъёс нокызьы уг тупало зэмос улонысь учыръёслы, соин ик мукет сяменгес шуысал: жугиськыса шудо сямзыя жугиськисьёс. Бен-бен, озьы луэ — азьвыл тани компьютеръёс ӧй вал, нош азбарын пиос ӧз жугиськылэ шат? Кин ке ялан атас сямен тэтча, нош кин ке, пи луыса но, ассэ туж зӥбыт возе. Видеошудонэн йырин адями виён одӥг учырез но исследованиос ӧз шараялэ на. Но чылкак дурбасьтыны но уг луы: жугиськись, мукетъёссэ гажаны быгатӥсьтэм мурт ӟечгес луыны уз пӧрмыты ни, дыр, малы ке шуоно со озьы дышемын. Но валалэ одӥгзэ: шудон гинэ янгыш ӧвӧл, пинал шудыны кутске, ассэ кытчы донгыны валамтэысь. Озьыен, солэн пушказ вань  сюлэшугъёсыз, кудъёсыз сярысь асьмеос вераським ни. Нырысь палэнтоно соосты.
— Кызьы?
— Нырысь-валысь гань-гань кенешоно пиналэн: мар солы уг тырмы, малы со ӵогаськыса пуке, мар солы тунсыко потэ Интернетын. Но со туж секытэн сётӥське, уго быдэ вуон вакытазы пиналъёс (тужгес но пиос) анай-атайлэсь палэнскыны выро, соос лыдъяло: асьсэос бадӟымесь ни, «пересьёс» егитъёслэсь сюлмаськонъёссэс ноку уз валалэ. Соос золгес оско ас ёзъёссылы, Интернетлы. Соин ик  вераськонды ӧз ке пӧрмы, эн чигиське, пиналды шоры эн кесяське, тырше сое  психолог доры вуттыны. Тани пиналъёс доры визь-кенешен потакумы, одӥгез пияш шуэ: вералэ мынам туганэлы, секытэн-а со, ӧвӧл-а. А малы со анаезлы, врачлы уг вазиськы? Кышка, пе.
Тужгес усто луысал, конечно, компьютер сьӧрын пуконэз маин ке мукетыныз  воштыса. Шуом, тренажёр залэ, бассейнэ ветлыны, ӵемгес инкуазе потаны, ма, коть синмаськыны. Соку солэн сомында ваньмон дырыз уз луы ни, амалтэк выльысь калыке потоз, выльысь ассэ утчалоз. Куд-ог дыръя юрттэ дышем коллективез воштон но, угось выль интыын усьтӥсько выль луонлыкъёс, озьыен, со ассэ мукет сямен возьматыны быгатоз.
— Компьютерен черлан тросгес сюлмаськытэ городын улӥсьёсты. Озьыен, со «ужлы ёрмисьёслэн» висёнзы? Юрттоз-а кужмысь ужатон?
— Мон ӧй шуысал, компьютер — городъёслэн гинэ висёнзы, татын пӧртэмез ӧвӧл, зэм, гуртъёсын со котькуд коркан ӧвӧл ай, со гинэ уте, нош городын семьялы быдэ — кык-куинь.
Уж юрттэ котькинлы, со тунсыко яке коньдоно ке. Но кужмысь карыса, пайдаез уз луы. Быдэ вуымтэослы тунсыко уж шедьтыны шуг, вылаз ик, ичи уждун тыро.  Но сыӵе ӟеч учыръёс вань — куд-огез кӧня ке нунал ужамзы бере гинэ но дунъяны ӧдъяло анай-атайзылэсь тыршемзэс, уксё поттыны сюлмаськемзэс, юрттыны тыршо. Мукет анай-атайёс пиналъёссэс гуртэ юрттӥськыны келяло, шашлыкен гочатыса, сад-бакчаязы ӧтё. Озьы кык кечез куто: пинал шутэтске но, висказ маке-маке юрттӥське но.
— Но отысь бертыса, пинал нош берытске вотэс дуннеяз…
— Компьютерлэсь чылкак куштӥськыны али уз пӧрмы ни, дыр. Но кызьы ке но тыршоно отын пукон дырез кулэстыны. Эн вормытъяське пиналды азьын, Интернетэз воксё кысоды, дун уд тыре шуыса — чутрак ужрадъёс ноку но ӟече ӧз вуттылэ на. Интернетэ потон амал егит мурт мукет азьысь но шедьтоз, нош тӥледды адӟонтэм кароз, бордысьтыды воксё но палэнскоз. Эсьма, видеошудонъёсын дырзэ быдтэм интые, ӵектэ солы, компьютерысь кыӵе ке тунсыко кинофильм гожтыса (скачать карыса), валче учкыны яке литература утчаны. Озьы со пумен дышоз  компьютерез пайдаё кутыны.

Ольга Зорина.

Удмурт Дунне
By Удмурт Дунне 17 августа, 2012 11:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<