Улон зарезь — чуръёс пушкын

Удмурт Дунне
By Удмурт Дунне 8 августа, 2012 16:20

Улон зарезь — чуръёс пушкын

«Удмуртия» издательствоын арлы быдэ трос книгаос вордӥсько. Туэ пал аре потэмъёссэ лыдэ басьтоно ке, соос пӧлысь уноез сӥземын республикалы, гуртъёслы но районъёслы. Поттэмын кыллюкамъёс, пӧртэм пуштросо бичетъёс.
«Улон зарезе» кылбур бичетсэ лыдӟись доры вуттӥз кылбурчи Семён Карпов. Авторлэн таяз книгаяз пыртэмын пӧртэм аръёсы гожъям чуръёсыз. Кылбуръёсты лыдӟыса, шедьтӥськод юанъёсын пачылмем сюлмаськонъёсты, шумпотонъёсты, пальпотонъёсты но ӝоже усёнъёсты. Соос ваньзы ик артэ вамышъяло. Лирической герой асьмемыз но, лыдӟисьёсты, асэныз ӵош малпаськыны ӧте.
Нырысетӥ люкетсэ автор «Эн дырты, кылбуре» нимам. Кыкетӥзэ — «Дэлет сётӥсь кужым». Вордӥськем палъёсызлы сӥземезлы — «Тылое — тон улон зарезе» бадӟым саклык висъя. «Мон уг ышы — тон эн ышы» но «Тонэ ӧти мон кылбурам» люкетъёсысь шедьтоды гажан но яратон, инкуазь но адями кусыпъёс сярысь чуръёсты. Кинлэсь ке поэмаос но мылкыдзэ ӝутозы. Отӥяз автор пӧртэм кылъёсысь удмуртэ берыктэм кылбуръёсын тодматэ.
Узыр пуштросо «Старые Зятцы» книга Якшур-Бӧдья ёросын но со котырысь гуртъёсын улӥсьёсты шумпоттоз. Бичетэ пыртэмын черкогуртлэн историез, сям-йылолъёсыз, вашкала но туала улонысь туспуктэмъёс. Книгаез чебермало на пӧртэм удысъёсысь азьмынӥсьёслэн, Быдӟым оже ветлэмъёслэн но отчы быремъёслэн, «Ижевск-Балезино» но «Ува-Кильмезь» чугун сюрес лэсьтӥсьёслэн тусбуйёссы. Уно саклык висъямын «Старозятцинский» СПК-ын ужам калыклы но али отын тыршисьёслы, данэ потэм улосчиослы. Тыло (Старые Зятцы) шор ёзо школаез йылпумъямын медицина удысысь профессоръёс  Михаил Муравьёв но Анатолий Корепанов. Та музъемысь данэ потэмын кызё пала эмчиос но куамынлэсь уно дышетӥсьёс. Соослэн вань Совето Союзысь Геройзы — запасысь майор — Иван Репин, Ужысь Геройзы — Василий Муравьёв. Уноез нулло Ленин, Ужысь Горд Знамя, «Знак Почёта» орденъёс но трос медальёсты.
Нырысетӥ бамын ик — Тыло черкогуртлы сӥзем кылбур. Сое гожтӥз Маргарита Шкляева. Книгаез поттыны дасям Галина Василькова. Галина Харитоновналэн трос авторъёсын но архивъёсын ужамез шӧдӥське. Котыр ласянь гуртсэ но отысь потэм калыксэ возьматэ. Книгае пыртэмын арлыдоослэн тодэ ваёнъёссы, нылпиослэн ужъёссы.
Тыло куке-соку нимаз район вал, нош 1963-тӥ арын сое Якшур-Бӧдья борды юнматӥллям. Черкогурт 250 ар ӵоже йыг-йыг пыд йылаз сылэ ни. Со дыр куспын 3 черк лэсьтэмын. Туннэ нуналэ нош ик вылез ӝутӥське.
Кылбурчи Ольга Ведрова лыдӟисьсэ шумпоттӥз «Усьты ӧстэ» книгаеныз. Бичетэ  пыртэмын 77 кылбур. Со чуръёс пӧлысь шедьтыны луэ лушкем ӧпкелёнэз но тэльмыронэз, мӧзмыса возьмаськонэз но пыкылонэз. Нылкышно сюлэмлэн шуныт сиосыз, биниськемын ӟугырес малпанъёсыныз. Бичетлы аспӧртэмлыко суред лэсьтэм Юрий Лобанов.
Та нуналъёсы Дэри ёросысь Вуколудын улӥсьёс кие тунсыко книга вуиз — «Мынам Вуколудэ». Гуртлэсь историзэ тыро-пыдо люкан бордын тыршем та гуртын ик вордскем но быдэ вуэм Маргарита Малышева. Книгаез узырмыто вашкала но туала туспуктэмъёс. Гуртысь кылбурчиос Нина Малышева, Маргарита Малышева но Светлана Зайцева, вордӥськем гуртсылы сӥзьыса, чебересь чуръёссэс гожтӥллям.
— Гуртлэсь историзэ, отын улэм-вылэм калык сярысь утчаськыса, трос бугыръяськоно луиз архивъёсын, — шуэ Маргарита Николаевна. —  Туспуктэмъёс бичаса, коркась коркаетӥ ветлӥ пересьёс но улонэз адњем адямиос дортӥ. Книга поттэмме тодӥзы но, ваньмыз синкылияськыса тодэ ваёнъёссэс верало. Тау шуэме потэ вань гурт калыкелы, та ужез ӧз палэнтэ шуыса.

Любовь Тихонова.

Удмурт Дунне
By Удмурт Дунне 8 августа, 2012 16:20