Уболы быдэ — возьмаськись

Удмурт Дунне
By Удмурт Дунне Август 14, 2012 16:55

Уболы быдэ — возьмаськись

К. Вахрушевалэн виноградэз удалтэмын.

Газетмылэн эшез, ӟуч нылкышно Клавдия Вахрушева, милемды удмурт луэменыз но котькытчы вуттӥськеменыз гинэ уг паймытъя. Сад-бакчаез но солэн йӧспӧртэм, быдэсак сяська пӧлы ышемын.
Ижысь кузпалъёс Клавдия но Николай Вахрушевъёс апрельысен ноябрёзь уло Гольяные нуись сюрес вылэ интыяськем «Гремиха» бакчаязы. 6 сотка музъем кесэгзэс пенсионеръёс паськытатоно кариськизы, артысь кык участокез басьтӥзы на. Емышо писпуос, картофка, пӧртэм бакча сиёнъёс, сяськаос вӧл-вӧл будо. Теплицаосын кисьмало огреч-помидоръёс, баклажанъёс, пӧсьтурынъёс.
Синмаським нылкышнолэн кибашлы луэмезлы но бакчазэ аспӧртэмлыко чебертэмезлы. Уболы быдэ возьмаськись ватӥськемын. Ӵушъял, эбек, скал, пӧртэм бурдоос куаръёс улысь шорад палёмо. Улмопуэ ванемъёс (аистъёс) каръяськиллям, нош возъет улысь бадӟым-бадӟым бассейнын тӧдьы юсьёс уяло. Шулдыр гурзэ бакча тыр вӧлмытэ пичигес тыметысь фонтан. Уйин со котыре ӝуатско пӧртэм тылъёс.
Николай Григорьевич лэсьтӥськон ужъёсын выре. Зарни киё воргоронэз муртъёс но юрттӥськыны ӧтё. Али, вузаны шуыса, мунчо пуктэ. Нош будосъёс но бакчаез шулдыртон Клавдия Александровна вылын.
Толалтэ кузпалъёс ӵош шутэтскизы но тазалык люказы Ижысь Индустриальной ёросысь Калыклы юрттэт сётонъя центрын. Отын пӧртэм киужъёслы дышиз нылкышно. Гындэм ыж гонлэсь сяськаос, йӧспӧртэм коркакузёос кинлэсь гинэ корказэс уг шулдырто ни. Тодмоосызлы, матысь адямиосызлы но кузьма соосты.
Та центрын ик дышиз изолонлэсь пӧйшуръёсты, тылобурдоосты лэсьтыны. Табере соос корка котырез, убоосты возьмало.
— Толалтэ киужъёсын вырыны дыр тырмыт, — шуэ Клавдия Александровна.
Муш кадь ик, чик но пуксетэз уг вала. Ма, ачиз но дырын-дырын мушлы пӧрме, унябей (одуванчик) сяськаослэсь «чечы» пӧзьтэ. Артысь куштӥськем бакчаысь 400 сяська йырез ишка но 1 кило сакырын пӧзьтэ. Сяська, ческытын сылмыса, чечы кадь луэ. Маин ӟеч эмъюм ӧвӧл?
Сяськаясь пушнер но­ уг мыльы. Сюрлыен герӟаськем висёнъёссэ, остеохондрозэз, соин эмъя. Веникен сямен шуккылэ кужекъясь мугорзэ, висись интыос уг ик шӧдо, пе, куртчылӥськемзэ.
Секыт ужаса, алигес кусказ йӧтэм. Врачъёс кылльыны косћллям. Пыдъёссэ мырдэм но кызьы кыскаса, нылкышно магазинэ вамыштэм. Отысен тодаз лыктэм: сиёнэн плитаез кысымтэ. Висёнзэ вунэтыса, дымбыр дораз бертэм. Со ик луиз, пе, йӧнаме, тӥледыз но тани пыд йылам пумитасько.
Бертон сюрес вылысен туспуктылӥсьмы Владимир Беломорских, пӧсям вузэ ӵушылыса, лулӟиз: жаль, колодчаысьтызы вузэс сьӧрамы ӧм кутэ, шӧмыз туж чекыт. Ми ке веръятэк ик кылим, эмезен йӧлын но чаен утялскыса. Выльысь куное кожатэк уз луы, соин ӵош лыдӟисьёсмес киужъёсыныз но тодматом.

Лия Малых.

Удмурт Дунне
By Удмурт Дунне Август 14, 2012 16:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<