Сю аръем школаысь — 21-тӥ даурысь юртэ!

Удмурт Дунне
By Удмурт Дунне Август 28, 2012 17:17

Сю аръем школаысь —  21-тӥ даурысь юртэ!

Шаркан ёросысь Вортчаын усьтӥськиз выль школа.

Туэ 1-тӥ сентябрь азьын шаерамы усьтӥськоз куать школа но нылпи сад. Корка пыронъёс мытэмын — та нуналъёсы Президент А. Волков вуылӥз Шаркан но Красногорск палъёсы.
Шаркан ёросысь Вортчаын школа-садэз ӝутон кутскемын вал кылем арын декабрь толэзе гинэ. Нош туннэ со нылпиосты пумитаны дась ини. 1-тӥ сентябре 104 пинал вамыштоз отчы. Выль арысен усьтӥськоз ш кола бордысь нылпи сад но.
— Таӵе юртлы кемалась вожъяськиськом ни вал,  — вера школалэн директорез Лидия Кощеева. — Школа паймымон чебер пӧрмиз, отын туала куронъёслы тупась кабинетъёс, спортъя залэз бадӟым, вань стадион, нылъёслы ужъя кабинетын пуктылэмын вуриськон машинаос, пиослэназ — станокъёс.
Школаез усьтонэ, оло, быдэс гурт люкаськиз: нылпиосын ӵош — анай-атайёс, песянай-песятайёс…
— Школае мыноз Валентин пие, — шуэ Вортчалан улӥсь Галина Наговицына. — Со верантэм шумпотэмын. Ма, ачим но соин ӵош бурдъяськемын. Верало, спортзалын но стадионын нылпиос гинэ ёзвиоссэс уз кыдатэ, мӧйыос но отчы ветлыны быгатозы.
Шаркан ёрослэн йырыз Александр Прохоров, гуртоосты ӟечкылакуз, нимысьтыз пусйиз: Вортчалан нылпиос ӧжыт уг вордско, озьыен, вань кин понна школа но нылпи сад усьтыны.
— Туннэ тӥледын ӵош быдэс республика шумпотэ, — вазиськиз вортчаослы Александр Волков. — Учкелэ, кыӵе пальышало пиналъёс. Татчыозь соос дышетскизы сю аръем школаын, нош туэ вамыштозы 21-тӥ даурысь юртэ. Шаерамы 2000-тӥ арысен кутскыса, таӵе 100 корка пырон лэсьтӥм ни.
* * *
Красногорск черкогурт но шумпотонэн пачылмемын: пулэсь лэсьтэм вашкала нылпи сад интые табере усьтӥськиз йыг-йыг кык этажъем юрт!
— Татын ваньмыз сюлэмыя, — вера нылпи садэн кивалтӥсь Наталья Чернышова. — Уката но бордаз кыске солэн азбарез. Нылпиослы поръян интыын велосипедэн ворттылон сюресъёс но, эсьма, лэсьтэмын. Туж шумпотӥськомы крезьгуръя но физкультурая нимысьтыз залъёслы. Вань физиокабинет. Оскиськом, пиналъёсмылэн тазалыксы юнмалоз гинэ.
— Кылемаз нылпи садэ 150 пинал ветлэ ке вал, таиз 170 интылы чакламын, — пусйиз Александр Волков. — Озьыен, черод кӧнялы ке нош вакчиялоз. Оскиськом, матысь аръёсы со воксё но уз кыльы ни. Берло вить ар куспын гинэ республикаямы нылпи садъёсын ватсаса 7 сюрс инты усьтэмын, туэ та лыдпусэз 1 сюрс 700-озь вуттом. Улон-вылонмы радъяське, нылпиос арысь аре тросгес вордско. Соин пуктоно луоз выль но выль нылпи садъёс. Пуктом!
Красногорск черкогуртэ вуылыкуз, Президент нялтас кожылӥз на Кокман но Валамаз черкогуртъёсы. Шуиз: Кокманын пуктэмын луоз бадӟым юрт, солэн липет улаз пырозы школа, нылпи сад, фельдшер-акушер пункт, культурая юрт но спортзал. Валамазын выльдэмын луоз шор ёзо школалэн юртэз.
Мар эшшо возьма на Красногорск палъёсты — та сярысь вераськонзэ Президент азьланьтӥз ёросысь паськытатэм кенешонын. Малпанъёс-планъёс ӧжыт ӧвӧл. Шуом, ёрос центрын выль нылпи сад усьтӥськемен ӵош выльдон ужъёс радъямын эшшо мукетаз нылпи садын — республикамылэн бюджетысьтыз талы 4 миллион манет висъямын. Багырын кутскемын бадӟым юрт пуктыны — отын луоз школа-сад, ФАП, спортзал. Нош тужгес пусйымонэз: ёросын ву гумыосты вошъян борды басьтӥськизы — талы ог 60 миллион манет чакламын. Озьы ик коньдон висъяськоз на ёросысь куд-ог сюресъёсты волятонлы но Убыть шур вамен выж лэсьтонлы.
Элина Васильева.

Удмурт Дунне
By Удмурт Дунне Август 28, 2012 17:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<