Спорт шоры учконзы асьсэлэн

Удмурт Дунне
By Удмурт Дунне 29 августа, 2012 11:13

Спорт шоры учконзы асьсэлэн

Олимпиадае ветлэм спортсменъёсын кенешон.

Толон Удмуртилэн Президентэз А. Волков пумиськиз Лондонын ортчем Олимпиадае пыриськем спортсменъёсын но тренеръёсын. Ньыль арлы одӥг пол радъяськись ӵошатсконэ шаерысьтымы 6 мурт ветлӥз.
Удмуртиысь спортсменъёс вордскем палъёсазы шер вуыло ке но, таяз учыре ваньзы сямен люкаськыны быгатӥзы, Давид Белявскиез вератэк. Та вакытэ со Екатеринбурге кошкемын. Ваньзы татын дыръя Александр Волков спортсменъёсын матысьгес тодматсконо кариськиз.
Асьме олимпиецъёс медаль басьтыны быгатысалзы ке, Президент дорын пумиськон чылкак мукет ӧретӥ радъяськысал, дыр. Но спортын удалтэ кужмоосызлы но шудоосызлы. Озьы ке но ваньзы сямен асьме спортсменъёс финалэ шедизы, нош медаль понна нюръяськонын 5-тӥ-8-тӥ интыос басьтылӥзы. Олимпиадае шедён гинэ но бадӟым шумпотон ни.
— Спортэз азинтонлы Удмуртиын бадӟым саклык висъяське, — шуиз Александр Волков. — Выль стадионъёс, школаос усьтӥсько, туала куронъёслы тупась спортзалъёс лэсьтӥсько.
Удмуртиысь спортэз азинтонлы туэ 4 миллиард манет висъяны чакламын. Тужгес бадӟым саклык висъяське куасэн бызьылонлы, биатлонлы, великен ворттылонлы, ыбылӥськонлы, капчи атлетикалы но уянлы. Матысь дыре усьтӥськоз липетэн шобыртэм йӧ дворец, вуоно аре ӧссэ усьтоз тир. «Чекерил» спорткомплексын мугорзэс кыдатыны луонлыкъёс кылдытӥсько инвалид спортсменъёслы.
Ваньмыз синмаськымон шуиськомы ке но, спортсменъёслэн но тренеръёссылэн югдур шоры асьсэлэн учконзы. Ӵем дыръя соос мугорзэс кыдатоно луо шаермылэн палэназ. Уясь Сергей Большаковлэн тренерез Елена Нургалеева ӝожтӥське, уясьёслы нуналаз 7-12 иськем ортчоно, нош 25 метръем бассейнын сомында уд уя. Вылаз ик, 1 метр 90 сантиметр ӝужда спортсменлы вулэн мурдалаез но уг тупа. Уякуз, пе, киыз я пыдыз ву пыдсы йӧтэ. Кулэ вылэм Ижевске бадӟым бассейн пуктыны.
Та пумиськон дыръя тренеръёс но спортсменъёс сюлмаськытӥсь ужпумъёссэс шара веразы. Президент Александр Волков куронъёссэс но дэмланъёссэс сак кылзӥз. Буйгатӥз: спортсменъёсты дасян понна республика лэсьтоз вань луонозэ. Кылсярысь, 50 метръем бассейн пуктэмын луоз, отын инты тырмоз пиналъёслы но, спортсменъёслы но. Ижын тупатъям бере ӝоген выльысь усьтӥськоз «Торпедо» стадион. Вавожын лэсьтӥсько бассейн но липетэн каток.
— Тӥ милемыз медальёсын шумпоттэ. Сьӧрады кыстӥськозы городъёсысь но гуртъёсысь нылпиос, — шуиз Президент.
Валентина Емельянова.

Удмурт Дунне
By Удмурт Дунне 29 августа, 2012 11:13