Россилэн кӧкыез

Удмурт Дунне
By Удмурт Дунне 21 августа, 2012 15:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россилэн кӧкыез

Россилы 1 сюрс ар тырмонлы сӥзем синпелет.

Мар пӧртэмлыкез Нижний но Великий Новгородъёс вискын? Нырысетӥез пель сьӧрын ӵемгес кылӥське, Удмуртилы но со матынгес интыяськемын. Но историез чаклано ке, мукетыз кар — Великий Новгород — ӟуч кунлэн вордӥськем интыез. Со 859 арын кылдэмын.

Таиз — Великий!
Туннэ Великий Новгородэз ӵемысь сурало Нижниеныз. «Великийёс» та пумысен туж ӝожомо. Но ма карод на: отын али 200 сюрс пала гинэ адями улэ, нош Нижний экономикая но промышленностья бадӟым центрозь будэмын — 1 миллионлэсь трос улӥсез.
Озьы ке но Россилэсь историзэ тодон понна солэн кӧкыяз — Великий Новгородэ — вуылоно. Милемлы сыӵе шуд усиз таяз гужеме. Великий Новгородын ортчиз журналистъёслэн «Вся Россия — 2012» фестивальзы. Нялтас вераса, та ужрад 16-тӥ ползэ радъяське ни. Но татчыозь ортчылӥз Сочиын. Валамон, журналистъёс лымшоре мыло-кыдо ветлӥзы, но шутэтскон, зарезьын жомбылляськон поннагес. Оло, соин но фестивальлэсь интызэ воштыны чакламын вал. Ужрадлэсь нимзэ но воштӥзы, журналистъёслэн вечезы (кенешсы) шуизы.
Вашкала музъем вылэ шедён понна кык нуналзэ поездын зуркано луиз. Нырысь Москваозь, собере мукет поездэн Новгородозь. Вуимы вазь ӵукна. Ваньмес, бадӟым автобусъёсы пуктыса, нуизы гостиницаосы. Кык уйзэ тыро-пыдо кыниськылымтэ синъёс мертчизы укно сьӧры: огшоры город… Чылкыт город… Но тани адӟиськизы черк мугоръёс, пыд уламы вӧлдӥськиз паськыт шур… «Ой, Волга!» — дышем сяменыз, лэся, кеськиз кин ке: Россилэн вордӥськем интыяз кыӵе шур луоз на! Келясьмы соку ик тупатӥз: шурлэн нимыз — Волхов. Городмес со кыклы люке. Софийской люкетаз вашкала Кремль интыяськемын, нош вуз кароно люкетаз — Ярославо Дворище. Ваньзэ, пе, ас синмыныды адӟоды ай.

Сяська яратӥсь батыр
Келязы карлэн пумаз, «Садко» гостиницае. Юрт азьын пумитаз ачиз Садко — вашкала ӟуч мадёсъёсысь герой пыж вылын сылэ, крезен шудэ. Кортлэсь кисьтыса лэсьтэмын ке но, туж мусо адӟиське. Гостиницалэн бур палаз трос этажъем юртъёс, лавкаос, гуж! вазё машинаос. Нош паллян палан шыпыт: вож-вож турынэн шобырскем вырйыл кузяна кыстӥське. Со, пе, тушмонъёслэсь утиськон понна эсьма 14 дауре, горд сюй нуллыса, ӝутэмын ай. Вашкала Новгородлэн котыраз улӥсьёс (окольный город) быдэсак вырйылэн котыртэмын вылэм. Валамон, туала кар со котыртэм сьӧры кемалась потӥз ни. Но Новгородын улӥсьёс историзэс гажало, выль юртъёс пуктыкузы, со вырйылъёсты исатэк кельто. Талэн эшшо одӥг мугез вань: Быдӟым ожъёс дыръя фашистъёс Новгородэ 1941-тӥ арын ик пыризы. Кык-куинь ар оккупация ӵоже уно адямиос вырйылъёс урдсысь гудӟиськемъёсын, сюй улын ватскыса, улӥзы..
Вашкала городэн матэгес тодматскон понна нырысь ӝытаз ик поръяны потӥм: огшоры ульча, китай дӥсен вуз карись сэрегъёс, сиён-юон дэмлась лавкаос, лопыръясь дыдыкъёс… Йырмес ӝутӥм но: огез корка кузя коӵышъёс пӧйшурало, дыдыкъёсты тани-тани сабозы! Но куалектэммы соку ик паймонэн берытскиз: тылобурдо но, коӵышъёс но туйлэсь (бронза) лэсьтэмын. Паймеммы тӧлӟыса ӧз вуы, кык-куинь вамыш ортчыса, ӝимим пуштыр-пуштыр хоста пӧлын будӥсь шальк-шальк сьӧд кубиста йыръёс шоры. Таосыз но скульптураос! Чиль-чиль сьӧд куаръёс вылын туйлэсь ик кисьтэм евроос, долларъёс. Ой, нош корка сэрег сьӧрысь, синъёссэ питыръяса ик, шорамы учке чорыгась. Таиз но — синпелет! Дораз матэктыса, валам: чик но шорамы уг учкы вылэм ай со, визнанзэ кыдёке  вуэ сэрпалтэм, отысь пинё-пинё кык бадӟым чорыгъёс адӟисько.
Та юртлэн азбараз ик — розаос, турлы-турлы адӟылымтэ сяськаос, писпуос, чагыр кызъёс, кирпич борддоръёс быдэс шобырскемын виноградэн… Поръяськом кыӵе ке заповедникетӥ кадь: ма, кызьы тае нокин уг лёга, уг ишка?! Озьы ветлон вискамы вазись луиз:
— Кельше-а?
Нылпи ӟечыран сьӧрысь шӧдтэк шорысь ӝутскиз батыр мугоро воргорон, ужан дӥсен, кияз — пурт… Куалектэммес адӟыса, пальпотӥз:
— Ваньзэ тае мон лэсьтӥ. Али тани лымшор палась ваем писпуосылы прививка лэсьтӥсько…
Йӧспӧртэм тодмомы — Александр Янчиков — азьвыл ожгарчи, разведчик. Ачиз сярысь гожеръяса гинэ вераз, но Путинэн ӵош, пе, дышетским вал ай. Александр Васильевич ик йӧспӧртэм скульптураослэсь кузёзэс шараяз. Соосты, пе, городлы кузьмаз Николай Сумароков — тодмо издатель, кылбурчи. Узыр муртъёс (нош соос Новгородын трос) Куршавельёстӥ шутэтскыса, пе, ветло, нош Сумароков — йӧспӧртэм адями. Со, тунсыко синпелетъёс малпаса, скульпторъёсты ужатэ, со понна аслэсьтыз коньдонзэ висъя. Озьы Великий Новгородын кылдӥллям калыкен тужгес яратоно синпелетъёс — Волхов шурлэн ярдураз суредаськыса пукись пияш но выж вылысь турист нылаш. Дорысьтызы калык ноку уг бырылы.
Ма, ачиз Янчиков но город азбарез ваньмон дыръяз аслаз уксёеныз чеберъя: лулы, пе, озьы шумпотэ. Солэн сюлмаськеменыз, та азбар кӧня ке ар ӵоже ни Новгородын тужгес чебереныз лыдъяське.  Тани чагыр кызлэн сю кидысэз пӧлысь одӥгез гинэ чагыр «нылзэ» сётэ, пе, нош Янчиковлэн вить пуштыр-пуштыр чагыр «дыдыосыз» будо. Озьы городысь трос этажъем огшоры юрт азьысь чеберинаослы синмаське Новгород администрация но.

Укно улын — черкъёслэсь тугоко
Великий Новгородысь тужгес чебер интыос Волхов шур кузя кыстӥсько. Ярославо Дворище пала матэктэмъя вамышлы быдэ 12-тӥ-16-тӥ дауръёсысь вашкала из черкъёс адӟисько.
Ярославо Дворищее, черкъёс сяна, Ганзей фонтан но тӧдь-тӧдь ӝужыт но кузь аркаос пыро. Вашкала мадёсъёсъя, ӵапак татын 11-тӥ даурлэн кутсконаз Ярослав князь пуктэм дворец. Сыӵе узырез но чеберез быдэс Европаын вылымтэ на. Бӧрысь та азбаре интыяськиллям кеносъёс но вуз карон лавкаос, тапала вуылӥллям зарезь сьӧрысь купечъёслэн корабльёссы. Ӵапак соин ик ярдурез тужгес тыршыса чеберъязы, черк вылэ черк пуктылӥзы. Тани, шуом, Никольской соборез 12-тӥ даурлэн кутсконаз ӝутӥллям Владимир Мономахлэсь Мстислав пизэ Св. Николалэн мудорез эмъям бере. Нош Параскева Пятницалэсь черксэ пуктӥллям зарезь сьӧрысь купечъёслэн коньдонэнызы, вуз карон азьланяз но пайдаё мед луоз шуыса. Тапалан ик тӧдь юсьёс кадь сыло на Богородицалэн Успениезлы сӥзем храм, Дун-чылкыт Кышноослэн-Мироносицаослэн, Дун-чылкыт Прокопий мучениклэн, Иоан Предтечалэн черкъёс. Вашкалаослы сыӵе бадӟым но ог-огзылы чик но кельшисьтэм храмъёс пуктыны кӧня кужым но коньдон кулэ луиз, вылды…
Тунсыко: поръяно сюрес кузя сылӥсь корт ӟусъёс борды чебермаса пусйылэмын сое пуктэм огазеяськонлэн яке адямилэн нимыз. Озьы туала вакытэ но коньдоноос городзылы пичи кузьымъёс лэсьтӥллям. Нош кыдёкысен пиштӥсь тӧдьы ӝужыт аркаос доры вуыса, бордысьтызы вальк-вальк гожтэмез адӟоды: тупатъяны юрттӥз Санкт-Петербурглэн губернаторез Валентина Матвиенко.

Новгородлэн сюлэмыз
Выжыкылысь кадь суред усьтӥське, Ярославо Дворищеысен Волховлэн мукет ярдураз учкыса: Кремль — Великий Новгородлэн сюлэмыз. Кӧня ке сю аръёс ӵоже со Новгород музъемлэн политикая, экономикая, осконъя но культурая шоркарез вал. Татын ортчылӥзы бадӟым кенешъёс, бырйылӥзы посадникъёсты (город йыръёсты быръё вал бояръёсты гинэ). Татысен ик шведъёсын ожмаськонэ мынӥзы Александр Невскийлэн дружинаосыз. Кремльын гожъязы летописьёс, книгаос. Солэн 3,5-6,5 метр пасьта но 8-15 метр ӝужда борддоръёсыз утизы Новгородысь владыколэсь резиденцизэ но Россиысь нырысетӥ православной черкез — Софийской соборез. Татын гожтэмын вал тужгес вашкалаез ӟуч книга. Нош 1030-тӥ арын Ярослав Мудрый князь усьтӥз нырысетӥ ӟуч школа. Кремль борддоръёс сьӧрын али но трос паймытӥсез. Пӧлазы — Россилэн кунлыкезлы 1 сюрс ар тырмонлы сӥзем тужгес чебер синпелет.
Нош Софийской соборын службаос али но ортчыло. Чаклам черкъёс пӧлысь малы ке ӵапак таиз сюлэмез тужгес вырӟытыса кельтӥз. Вазь ӵукна отчы лыктыса, паймимы: трос гинэ егитъёс, семьяенызы, пичи пиналъёсынызы вуэмъёс. Черкысь адӟыны луэ 11-тӥ-12-тӥ дауръёсы лэсьтэм суредъёсты. Татын ик утиське Ӟуч кунлэн туж бадӟым узырлыкез (реликвиез) — 12-тӥ даурысь «Знамения Божьей Матери» икона. Ӧйтӧд, оло уно дауръем омырез шӧдыса-а, оло туж лэймыт, буйгатӥсь черк кырӟанэз кылзыса-а, Софийской собор милемды бордаз думылӥз, татысь потыны кематэк ӧм ӵыдэ.
Но тужгес паймытӥз черке пырон ыргон капка. Со, пе, 12-тӥ дауре лэсьтэмын ни, вылаз Библиысь суредъёс возьматэмын, ваньмыз сыӵе пыр-поч — дун-чылкыт книгаез лыдӟиськод кадь. Та капкаез лэсьтӥллям Магдебургысь немец мастеръёс. Но кызьы со Новгородэ шедиз? 12-тӥ даурлэн кутсконаз Новгородысь ожгарчиос Швециысь огез бадӟым город вылэ урдскиллям, отысь ик та капкаез вайиллям. Кылем дауре ни, Быдӟым ож дыръя, асьме разведка шараям: фашистъёс дуно капкаез лушканы но Германие нуыны чаклало. Паймымон узырлыкез огдырлы Казахстанэ нуоно, отын ватыса возёно луиз. Нялтас вераса, немец туристъёс Великий Новгородэ вуылыны туж ярато. Гостиницаос кунсьӧрысь вуэмъёсын — немец, китай туристъёсын тырмемын. Россилэсь кӧкызэ соос пыр-поч эскерыса ветло.

Кокуй вӧзын кокаськон
Син шоры йӧтэ: Великий Новгородын вашкалаез туалаеныз туж быгатыса биниське. Ӝытъёсы калык яратэ дыртытэк поръяны Волхов шур кузя, паськыт выж вылтӥ, уя «Садко» теплоходэн, шутэтске Кремль борддоръёс доры ик вӧлдӥськем пляжын. Сур юыса пукисьёсты ӧм синйылтэ воксё. Тамак пурккетӥсьёс но вашкала борддоръёс котырын ӧй вал. Оло быдэс Россиысь журналистъёс доразы вуозы шуыса, городъёсты «визьмаллям», оло «великийёс» зэмзэ но таза улон сярысь сюлмасько.
Шурлэн ярдураз кӧня ке интыын волейболэн шудон площадкаос тупатэмын. Отын егитъёс бер ӝытозь туп лобатъяло. Нош вӧзтӥзы ик ортчись паськыт сюрес кузя, пырак Кремль борддоръёс вӧзтӥ, тур-пар ветло великен, роликен. Ма, Новгородын кык питранъёс вылын ворттылыны ярато. Ӵем гинэ адӟод пиналзэ бордаз пуктыса садике великен нуись анай-атаез. Город автобусын зуркасьёс но бен шедё, одӥг ветлэмзы 15 манет тыр усе.
Нош историе выйылыны мылкыд карисьёс вуыло Кремльысь Кокуй башня вӧзын ортчись представлениосы. Тани ӝыт тылскемъёс югдытэмъя Рюрик но Вадим князьёс вожвылъясько славян музъемъёсын кивалтон понна, нош Александр Невский калыкез ӝутъя немецъёслы пумит йӧ вылын ожмаськонэ. Историысь суредъёсты зэмос артистъёс туж яркыт возьмато. Пеймытын вашкала борддоръёс тылъёсын югак каро, ӵаш вазе, дружинникъёс ожмасько… Дырез-вакытэз сураса, кытӥяз юзырак луоно. Таӵе представлениосты адӟем ӧй вал на. Ӵапак тазьы егитъёслы усьтоно, вылды, вашкала эпосэз, историысь бугырес вакытъёсты, кунмылэсь кылдон сюрессэ. Жаль, Россиысь туристъёс татын трос ӧвӧл…

Кунлэн сюресэз — одӥг синпелетын
Россилэн кунлыкезлы 1 сюрс ар тырмонлы сӥзем синпелет сярысь нимысьтыз верано. Таизъя Россилэсь быдэс историзэ дышетыны луэ. Пуктӥллям синпелетэз 1862-тӥ арын, скульпторъёс пӧлын конкурс ортчытыса. Туж дано мастеръёсты азьпалтэм нокинлы тодмо луисьтэм Микешин — соку гинэ художествоя академиез йылпумъям егит мурт. Туйлэсь ӝутэм ӝужыт синпелет возьматэ Россилэн историысьтыз куать вакытэз. Татысь адӟыны луэ Русез пылатон, татаро-монголъёслэсь мозмытон но трос мукет суредъёсты, тодмо писательёсты, политикъёсты, эксэйёсты.
Россилы 1 сюрс ар тырмонлы сӥзем синпелет доры оркестр шудэмъя сяська тыризы «Вся Россия» фестивале вуэм журналистъёс но. Кунмес данъясь крезьгур чузъяськемъя пушкын бадӟым данъяськон бугырске вӧл-вӧл музъемъёсмы, чебер интыосмы но кибашлыосмы понна. Малпасько, солэсь но зол бурдъяськон вал 150 ар талэсь азьло, та паймымон синпелетэз усьтыку. Сӥё-дано ужрадэ эксэй быдэс семьяеныз, свитаеныз вуылэм, сьӧразы — 12 сюрс солдат. Соку Новгородын куинь нунал юмшаллям. Нош немец оккупация дыръя Россилэсь пуссэ сэрттыса Германие нуыны малпазы. Озьы, пе, ӟуч калыклэсь осконзэ, лул кужымзэ быдтом. Пужыятыса лэсьтэм туй кенерзэ нуыса вуттӥллям ик.
1944-тӥ арын Новгородэз асьме солдатъёс мозмытӥзы. Макем ӝожомизы соос: Россилэн пусэз быдэс куашкатэмын, юдэсэн-юдэсэн качамын. Но та аре ик,  фронтын гудыръям шоры учкытэк, синпелет улӟытэмын вал, со бордын скульпторъёслэн быдэс командазы ужаз, 1 сюрс 500 тырмисьтэм люкетъёсты выльысь лэсьтоно луиз.

Узырмыса бертон
Новгородын ортчем фестивальын журналистъёс сюлмаськытӥсь ужпумъёссэс но сэрттыны вуттӥзы, тодон-валанзэс но узырмытӥзы. Берло нуналъёссэ Сочи сярысь нокин тодаз ӧз вайылы ни. Нош зарезь дуре вуылыны кылдӥз ик. Новгород музъемлэн зарезез — Ильмень ты — йылыз-пумыз уг адӟиськы, чылкыт но кезьыт. Ильмень дуре васькан сямен син шорамы йӧтӥз куакъёс сьӧрысь бадӟым кырал. Лачмытак котыртэм интыын ог-огзылэсь палэнын кӧня ке из киросъёс сыло. Ма та? Келясьёсмы кезьытак валэкто: немец шайвыл, 30 cюрс немец ожгарчиос отчы война вакытэ ай ватэмын. Паймыса чакласьком: кыралэ пырон корт капка пась. Но вӧл-вӧл интыын турын чеберак ӵышкемын, одӥг силёез, янгышен усем куарез но ӧвӧл, лэся, киросъёс вальк-валькесь. Кин утялтыса возе? Германия, пе… Ильмень ты но шайвыл шоры писпуос сьӧрысен шып учке эшшо одӥг вашкала черклэн йырыз. Пырано кариським. Но кикыр-кокыр кенерзэ, алям жуг-жагез адӟыса, ӝожомим гинэ…
Мылкыдмес бурдъян понна одно ик вуылоно кариським на пу зодчествоя «Витославлицы» музее. Со пиосмуртъёслэн Свято-Юрьев монастырьзылэсь кыдёке ик ӧвӧл интыяськемын, Новгородысен автобусэн ӝыны час пала мынонэз. Татын — зэмос выжыкыл! Куаро писпуос пӧлын, арамаын сыло вашкала пу юртъёс, пужыятэм пу черкъёс, ӝужыт коркаос, доспешня (вашкала вакытысь сиськон инты). Тани одӥгысьтыз потоз кадь выжыкылысь нылаш — Алёнушка, нош тани та юртын уло, вылды, куинь батыръёс… Пыд улын турлы-турлы сяськаос, йыр вадьсын чирдо бурдоос. Таӵе интыын чебер фильмъёс гинэ пуктоно! Ма татчы, пе, вашкала улонэз возьматӥсь фильмъёсты, выжыкылъёсты лэсьтыкузы, съёмкаосы ӵемысь вуыло. Угось инбам улысь музейысь котькуд юрт, черк — зэмос, Новгород областьлэн пӧртэм сэрегъёсысьтыз ваемын. Паймыны гинэ кыле на: кызьы кӧня ке сю ар талэсь азьло одӥг кортӵогтэк но пуктэм пу юртъёс сокем ӟеч возисько?
Бен, Новгород милемыз паймытъямысь ӧз дугдылы, вашкалазэ валаны, соин данъяськыны дышетӥз. Со вакытэ ик сюлэмез портэмысь ӧз дугды: малы асьмеос сокем урод тодӥськом историмес, асьме кунмес? Зэм, журналистъёс котьку висъяськылӥзы шаплы, азинлыко луэменызы. Но Россилэн кӧкыяз вуылон соослэсь но синъёссэс выльысь усьтӥз…

Елена Миннигараева.

Удмурт Дунне
By Удмурт Дунне 21 августа, 2012 15:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<