Малы сисьме скал гижы?

Удмурт Дунне
By Удмурт Дунне Август 14, 2012 17:15

Берло дыре ӵемгес но ӵемгес шараяськыны кутскиз сюро пудоос пӧлын кышкыт висён — некробактериоз: гижызы, отӥяз пыдзы но сисьмыны кутске.  Номыр ӧд кары ке, пудо кулоз.
Скал гижы я пыд сисьмон учыръёс ӵемысь пумисько ляб хозяйствоосын. Но сюро пудоез ас гидазы вордӥсьёс но та черлэсь утемын ӧвӧл.
Пудо ноку но юнме висьыны уг кутскы. Солы маке уг тырмы. Кылсярысь, клетчатка. Шуом, адями туннэ сюроезлы жалем сиён но сенаж сётэ. Вунэтэ, лэся: скал — сыскиськись живот. Солы ӵемгес тырылоно чурыт сиён — куро. Но тазэ адями пудолэн пыд улаз гинэ вале: шуныт но небыт медло, пе. Пудолэн тае ныр шӧдэ но ачиз дораз кыстӥське — йыръе. Зэм, мугораз клетчатка тырмыт уг вуы. Нош жалем сиён но сенаж сюлзэ урод ужато —  кислотностьсы трос уго. Некробактериозлэн кутсконэзлы та огез бадӟым муг луэ. Ӝуш умой уг ужа бере, вире но витаминъёс  урод вуо.
Скаллэн ӝушез умой мед бергалоз шуыса, куро ӵемгес тыроно. Весь одӥг пумо медаз сиськы, тусяз пононо патока, куасьтэм гордкушман. Скал 15 килограммлэсь тросгес йӧл сётэ ке, та пумысен уката ик сюлмаськоно. Пӧзьтэм картошка, сылал сярысь но вунэтоно ӧвӧл.
Некробактериоз кылдэ, пудолы ӧжыт минералъёс сётъяку. Тужгес кулэ кальций, цинк но медь. Ӵапак таос тырмымтэ дыръя сюролэн быгытъёсыз лябӟо, вирсэръёсыз шальтрало, иммунитетэз куашка. Гижы дорысьтыз куэз пильылӥськыны кутске, вир потэ. Ӵапак со пилиськем интыосы олокыӵе но жуг-жаг сюре, инфекция пыре. Со ик пумен пыдзэ но гижызэ сисьтыны кутске.
Сисьмыны муг на — дыраз вандылымтэ гижы. Сое араз ӧжытсэ кык пол вакчиятоно. Со толэзьлы быдэ 6-8 миллиметрлы будэ. Пастухе лэзьяку, гижы сюрес вылын ачиз ик зыраськыса быре. Нош толалтэ, пудо огинтыяз сылыкузгес, гижы гань-гань будэ.  Пумен со тӥяське, вӧсь каре сӥльзэ но. Соин ик котьку чаклано, макем гань-гань вамышъя пудо. Чутэм каре ке, одӥг пыд вылазгес сылэ ке, йӧлыз кулэсмемын ке, озьыен, пыдыз вӧсь луэмын.
Тодэ: таза гижы чилясь луэ. Одно чаклалэ пыд пыдэссэ. Пильылӥськем интыоссэ йод растворен зырано — медаз азы. Гижы медаз куасьмы шуыса, пыд улаз дырын-дырын вальылоно пул пызь. Гидэз рос-прос сузяно.
Висись гижыез тупатыны туж шуг. Нимысьтыз ваннаос лэсьтоно. Отчы кисьтоно 10 процентъем сернокислой цинк. 5-10 нуналлы огпол отчы султытъяно скалэз. Кутыны яра 5-10 процентъем формалинэз яке 10 процентъем медной купоросэз. Сурет  микробъёсты вие. Выж вылэ кылем бактериос берен медаз лякиське шуыса, сое но сузяно 20 процентъем изваска суретэн.
Но таин гинэ буйгано ӧвӧл.  Пудо эмъясен кенешыса, пуктылоно пенициллин, тетрациклин, бициллин. Вунэтоно ӧвӧл: некробактериоз выльысь кутскыны быгатоз. Скал бордысь кунянлы но паласькыны шедёз. Нош антибиотик пуктылон одно шӧдӥськоз йӧллэн шӧмыз вылын. Сое  пудолы гинэ но сюдыны уг дэмлало. Соин ик та черен висись скаллэсь мозмытскыны капчигес. Сӥльыз солэн сиыны ярамон.
Екатерина Михеева.

Удмурт Дунне
By Удмурт Дунне Август 14, 2012 17:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<