Кроликъёсы шӧдтэк шорысь куло…

Удмурт Дунне
By Удмурт Дунне Август 15, 2012 16:25

Кроликъёсы ноку номырин ӧз висьылэ татчыозь. Пи но ымгай (трос) вайизы. Куинь толэзь ӵоже чебертӥськизы ни вал. Ма, ческыт сюдэм сяна, пӧртэм витаминъёс сётъямысь уг дугдылӥськы соослы. Но берло дыре шӧдтэк шорысь кулылыны кутскизы. Ярам, сиськемысь дугдысалзы, шымырскыса пукысалзы ке. Ӝытаз сыӵе ик шумприч бызьыло-йырйисько. Нош ӵукна сюдыны доразы пыриськод но, кулэмын. Зэм, кӧня ке нунал ымдур котырзы котгес улэ ик. Куддыръя берпалзы но саптаськемын луэ. Но со гинэ кыӵе ке черлэн тодметэз луоз меда?
Василий Б.
Алнаш ёрос.
Тӥляд кроликъёсты эймериозэн (кокцидиозэн) черламын, шӧдске. Куддыръя со висён шуак погыртэ, куддыръя пелёос кӧня ке нунал ӵоже курадӟо на. Кӧтсы тордэ, ӟигарзы быре, син тӧдьызы ӵужалэс пиштэ, кыедазы вир пытьыос адӟиськыло.
Та висёнэз шедьтэм егит кроликъёсты ваньмыз сямен бырыны быгатозы. Кутске со 3-4 толэзьзэс тырмытымтэ кроликъёс котыре гинэ, таосты урод сюдэмен я карзэс умой сузямтэен.
Эймериоз через нулло бадӟым кроликъёс но. Асьсэлэн мугорзы юнмамын ни бере, инфекция соослы нокыӵе ик уг йӧты. Нош пиоссы таин нюръяськыны уг быгато. Нялтас вераса, мумыосты но пиоссэс артэ кема возьыны воксё но уг яра.
Зэм, анайёссэс гинэ янгыш карыны уг луы. Куддыръя адямиос но уг чакласько: карзэс сузяны пыро корт лопатаосын, тусьёссэс уг миськыло. Комак но шыр бызьылон интыосты уг ӵоксало.
Кроликъёслэн каразы омыр улласянь капчиен пырыны мед быгатоз шуыса, улзэ кечат-вамат пулэн шукконо. Утялтоно улзэс нуналлы быдэ. Уй-нунал куспын одӥг пол кормушкаоссэс пылатоно быректэм вуэн. Сиёнзэс шуак воштыны уг яра. Висись пелёослы сётъяно кӧс турын, гордкушман, ӵужкушман.
Огшоры ву гинэ весь люктамлэн но пайдаез ӧвӧл. Одӥг-ог сётъяно ӧжыт гинэ марганцовкаен сурам ву. 100 миллилитр вулы 2-3 шапык йод уськытӥды ке, номыр уродэз уз луы. Лябӟем кроликъёсты таӵе суретъёсын 3-4 нунал ӵоже люктано.
Ӟеч юрттозы таӵе эмъюмъёс: дитрим, фталазол, сульфадиметоксин, мономицин но мукетъёсыз. Таосты кроликъёслы люктано нуналаз 2 пол 5 нунал ӵоже. Собере 3 нунал вис кароно но йӧнатонэз азьланьтоно. Но нырысь ик кенеше пудо эмъясен!
Кроликъёс юнэсь мед будозы шуыса, вордскемзы бере 20 нунал ортчыса, сётъяно салиномицин, трихопол но С витамин.
Екатерина МИХЕЕВА,
пудо эмъян наукаосъя
кандидат        

Удмурт Дунне
By Удмурт Дунне Август 15, 2012 16:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<