Котькуд минутсэс лыдъялозы часъёс

Удмурт Дунне
By Удмурт Дунне Август 10, 2012 09:19

Котькуд минутсэс лыдъялозы часъёс

Выль школалы шумпото пиналъёс но, анай-атайёс но, кивалтӥсьёс но.

Туэ республикаямы нылпиосты пумиталоз 6 выль школа.
Нырысетӥез юрт вуттэмын ни Пичи Пурга ёросысь Яган посёлокын. Одӥг этажъем кирпич юртын компьютер классэз, столовоез, спортзалэз, медпунктэз вань, кабинетъёсыз но тырмыт.
50 арлэсь кема сылӥз татын пу школазы. Пичигес спортзалын бызьылыны интыез ик ӧз тырмылы. Столовой но нимаз юртын вал — нылпиос отчы тол но, сӥзьыл но рос-прос дӥсяськытэк бызьылӥзы.
Кылем арын Пугачёвоын пуштылонъёс зуркатӥзы Яганысь школаез но. Июне татчы вуылӥз Президент Александр Волков. Татын ик кивалтӥсьёс кенешизы выль школа ӝутон пумысен. Озьы ар куспын вуиз 120 пиналъёслы тэрымон юрт.
—  Выль школа — со быдэс гурт понна коркатуй. Уго соку огкадь шумпото пиналъёс но, анай-атайёс но, лэсьтӥськисьёс но, кивалтӥсьёс но. Со понна ик вань асьмелэн бадӟым кунмы, со сюлмаське адямиослэсь улон-вылонзэс капчиятон пумысен, — вераз школаез усьтонэ вуэм Александр Волков.
Таиз школа висъяське азьвыл аръёсы ӝутылэм юртъёслэсь. Нырысь ик, школа одӥг этажъем. Лэсьтӥськисьёс верамъя, соку, пе, юртын ичигес коридоръёсыз, вань интыос тыро-пыдо кутӥсько. Нош кыкетӥ этаж, тубатъёс лэсьтыса, уксё тросгес быре. Яганын ваньмыз рос-прос, визьмын ужамын.
Президентлэн проектэз лэсьтӥсьёслы юанъёсыз кылдӥзы ик. Кылсярысь, спортзалэ пырон ӧс кортлэсь, со туж секыт. Таӵе ик ӧс пуктэмын столовойын.
— Малы коньдондэс ӧд шыръялэ? Трос луиз-а? — юа Александр Волков.
— Тылпулэсь утиськон куронъёс сыӵеесь, одно пуктоно, — валэкто проект понна кыл кутӥсьёс.
Озьы ик Президентлэн юанъёсыз кылдӥзы спортзал пумысен. Заллэн огпал пумаз — сцена. Озьыен, татын ик актовой зал но луоз. Соин валлин лэсьтӥськисьёс мудронгес малпаллям спортзалэз. Волейболэн шудӥсьёслы туж зол люкетоз баскетбол кульчолэн пыкъетэз. Тазэ воштоно, мукет амал утчано, шуиз кивалтӥсь.
Нош спортзалын, нылпиослы  сяна, инты шедёз ваньмызлы гуртоослы. Зал вӧзын ик интыяськемын тренажёръёс. Ӝытазе татын секциос ужазы ке, калыклы юри чакламын кыкетӥ ӧс. Соку пырась-потасьёс школа коридоръёсты уз лёгалэ. Нимысьтыз юртын вань мастерскойёс но кружокъёслы чаклам кабинетъёс. Интыез вӧл-вӧл. Таосыз но буш уз улэ — нылпиос, гуртоос мыло-кыдо лыктозы, оскытэ школалэн директорез Андрей Нурмурадов.
Уката шумпото нырысетӥ классэ мынӥсьёс. Туэ 16 пинал понна чингыли куара нырысьсэ чузъяськоз. Оглом выль юртын тодон-валан люкалоз 124 пинал. Дышетӥсьёссы 23 кузя. Пӧлазы вань кык егит специалистъёс. Тани Артём Воронцов нырысетӥ ужан нуналъёссэ мытоз компьютер классын. Со яган пиналъёсты информатикалы дышетоз. Гуртэ кылемезлы, выль школаын ужаны ӧтемзылы со туж шумпотэ.
Математикалы дыше-тӥсь Ирина Карнаухова но ӵыжак-выль кабинетаз капчи мылкыдын пыроз.
— Дас арлэсь кема школаын ужасько ни. Туэ 1-тӥ сентябрез котькулэсь зол возьмасько, — шуэ Ирина Игоревна. — Милям татын ваньмыз паймымон, чылкыт. Сомында вылез: тренажёръёсын зал, спортзалысь душъёс, юрт пушкын ик сьќрос. Интернетлы ум паймиське ни кадь, но татын но выль: дунне вотэсэ табере котькуд сэргысен пырыны быгатомы — wi-fi пуктэмын.
Дышетӥсьёслэн син шоразы уката йӧтӥзы выль часъёс. Соос, пе, котькуд кабинетын сямен ошылэмын. Озьыен, выль школаын дырез но выль сямен радъяны, дунъяны дышозы.
Пичи Пурга ёросын пу школаос пӧлысь кылемын на огез — Аксакшурысез. Быдэс республикаын 15-ё пала таӵе юртъёс вань на. Матысь куинь ар ӵоже соос интые ӝутскозы выль тузӥ школаос, оскытӥз Александр Волков.
Елена Скворцова.

Удмурт Дунне
By Удмурт Дунне Август 10, 2012 09:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<