Кинэ гажа кивалтӥсь но мар сётэ вить минут?

Удмурт Дунне
By Удмурт Дунне Август 10, 2012 09:56

6-тӥ августэ Президент А. Волков дорын ортчем кенешын ивортон лэсьтӥзы кык удмурт министръёс: шаерысьтымы гурт удыс но сиён-юон понна кыл кутӥсь Алексей Стрелков но валтӥсь спасатель Пётр Фомин.  
Алексей Владимирович пыр-поч доклад лэсьтӥз удыслэн туэ ӝыны ар ӵоже азинскемез сярысь. Лыдпусъёс уг ӝожомыто. Туэ гуртоос 15,8 миллиард манет тыр вуз поттӥзы ни, кылем арынлэсь со 7 процентлы тросгес. Йӧл арысь аре тросгес кыскиськом. Министр чакламъя ар ӵоже йӧл 693 сюрс тонна люкаськыны кулэ. Татын Президент вераськисез уретӥз: 700 сюрс! Вискыз трос ӧвӧл, вуттоно. Скаллы быдэ выжтыса, со 5 сюрс килограмм луыны кулэ (чакламын вал 4 сюрс 720), вот соку луоз… круто.
Пудо уллёлэн лыдыз каллен йылыны кутскиз, но сӥль вылын со уг шӧдӥськы на — кылем арынлэсь ӧжыт поттэмын.
Туэ элькун бюджетысь удысэз азинтонлы висъямын 783,3 миллион манет, Россиысь — 499,9 миллион манет. Со пӧлысь данакез коньдон кошкиз йӧл понна субсидилы но ӟеч кидыс басьтонлы. Капчиятэм дунъёсъя хозяйствоосы вуоз техника.  Юрттэт куриз 167 огазеяськон, но висъяськоз со 122-езлы гинэ — гуртоос тодо Александр Александровичлэсь та пумысен учконзэ: пудо уллёзэс, гыроно-кизёно бусыоссэс кулэстэмъёсты со туж уг гажа. Нош берло дыре тросаз ёросъёсын бусыос аналмизы. Ар ӵоже 600 сюрс тонна ю тысь поттон Удмуртия понна чик трос ӧвӧл, шуиз йыр. Вазенгес вакытъёсы, миллион поттыса но, ум ушъяськиське вал. Соин ик малпаське, министр эш, вазиськиз со А. Стрелковлы.
Пётр Фомин трибуна сьӧрын вераськыку, мукетыз сярысь малпаськыса пукыны уг луы — куаӵ-куаӵ пуктэм куараеныз но зэмос ожгарчи выросъёсыныз со ваньмызлэсь саклыксэс ас вылаз басьтыны быгатэ. Генерал мадиз шаерамы огъя оперативной службаез радъян сярысь. Али 112 номеръя ӧтьыны луэ тылпу кысӥсьёсты, полициез, эмчиосты, газэн вырисьёсты, «антитеррорез». Малы со кулэ, вань ук нимаз 01, 02, 03… Адямиослы ӝоггес юрттон вылысь. Кылсярысь, куд-ог учыръёсы огдыре кулэ луо пожарнойёс но, эмчиос но, полиция но. Огъя службалэсь пайдазэ возьмато лыдпусъёс: 2008-тӥ арын одӥг ӧтемлы вазиськыны быре ке вал 35 минут, миым спасательёс вуттӥськизы 30 минут ӵоже. Нырысь учкыса, мар сётэ кадь вить минут? 500 утем улон, валэктӥз министр.
Адямиос ӵемгес жингырто, «Скороез» ӧтьыса — 25 процент, быдэн 10 процент усе полицилы но тылпу кысӥсьёслы.
Али огъя служба рос-прос радъямын ай Глазовын гинэ. Йылаз-пумаз радъямтэ со шоркарамы гинэ но, нош азьланяз сыӵе центръёс луыны кулэ котькуд ёросын.   Татын Пётр Матвеевич тодэ вайытӥз Крымскез — кайгу пичигес луыны быгатысал, калыклэн улонэз понна кыл кутӥсь службаос йӧскадь, огкылысь ужасалзы ке, нош отын город администрациын охранниксы вылэм… песятай. Сторожъёс вашкала вакытэ кылизы ни, туала арын кулэ ужзэс ӟеч тодӥсь, шаплы, кыл кутыны быгатӥсь  пиосъёс. Нялтас вераса, умой луысал, диспетчеръёс ньыль кылын вераськысалзы ке: ӟуч, удмурт, бигер, англи…
— Зол! — спасательлэн куронъёсызлы паймыса но  оскытэкгес йырзэс сэзъязы залын пукись  кивалтӥсьёс. Зол-а, ӧвӧл-а, но со улонлэн куронэз.
Президент П. Фоминлэн службаезлэсь ужамзэ умой дунъяз, 112 системаез паськытатыны юрттэт сӥзиз.

Зинаида Кириллова.

Удмурт Дунне
By Удмурт Дунне Август 10, 2012 09:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<