Йӧ ӟускиос уз люкетэ ни лыдӟиськыны

Удмурт Дунне
By Удмурт Дунне 10 августа, 2012 09:35

Йӧ ӟускиос уз люкетэ ни лыдӟиськыны

А. Волков проектэз эскере.

Шаерысьтымы Национальной библиотекаын тупатъян ужъёс мыно. Юртэз чакланы вуылӥз Президент Александр Волков.
Национальной библиотека ӧсъёссэ усьтӥз 1958-тӥ арын. Со дырысен тупатъян ужъёс отын одӥг пол но быдэстэмын ӧй вал. Озьы липетъёс пасяськизы, гулбечысь книгаос пурысьтаны ӧдъязы. Кивалтӥсьёс 1990-тӥ аръёсы та юртэз выльдон борды басьтӥськизы ик вал, но та уж ялан усьсэлы кыльылӥз.
Библиотекаын ужасьёс шуо: шекъёс, пе, гужем уг адско, тулыс пото. Липет вылэ люкаськем лымы шундыё нуналъёсы ӟизаса улэ. Борддоръёс котыре йӧ люкаське.
Проектировщикъёс бась-тӥськизы юртэз выльдон борды. Соослэн чакламзыя библиотекаез тупатон 1 миллиард 200 миллион манет тыр усёз. Александр Волков, тае кылыса, шуэрскиз:
— Собыдӟа коньдонэн выль юрт пуктыны луоз! Ма, одӥг гинэ ӧвӧл, трос выль школаос, нылпи садъёс усьтыны луэ. Кылсярысь, одӥг нылпи сад ӝутон 100 миллион манет пала усе.
Кивалтӥсь библиотекаез ас синмыныз эскероно кариськиз: залъёсы, книга возён интыосы пыраз, юртлэн сигаз но тубаз.
Комиссия юртэз эскеремез бере шараяз: лэсьтӥськон ужъёсты 400 миллион манет тыр быдэстоно. Александр Волков нырысь ик юртлэсь липетсэ тупатъяны куриз.

Валентина Емельянова.

Удмурт Дунне
By Удмурт Дунне 10 августа, 2012 09:35