Возъямтэ укно

Удмурт Дунне
By Удмурт Дунне 8 августа, 2012 16:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дневникысь чуръёс

Адямиез котьку кыске тодмотэмез. Котьмаин тунсыкъяськон кидыс солэн сюлэм муаз кылле, луд-бусыын кизем ю сямен. Шунды тылсиос шунтыны кутско гинэ — со сайка, назьыльске, куар киоссэ выллань — шунды доры — ӝутэ. «Кут, кут, — шуэ кадь Шунды анайлы, — ӝоггес потты монэ пеймытысь югытэ. Мынам син  сузёнтэм дуннеез адӟеме, тодэме потэ!..»
Лыдӟись эше, пичи будослэн мылкыдысьтыз аслэсьтыд лул-сюлэм дарттэ уд шӧдӥськы меда? Со но ук, кизем ю сямен, югытэ кыстӥське, вань кужмысьтыз тодмотэмзэ тодэмез потэ. Та мылкыд ураметӥ ортчон сямен но ассэ шарая. Кызьы-а? Шуом, ӝыт юртъёсын тыл ӝуатэмын. Укноысь штораос возъямын ӧвӧл на. Корка пуш кипыдэсын кадь адӟиське. Асьмеос, отчы мыр-мыр мертчиськыса, ортчиськом, уз адскы-а маке но тунсыкоез? Оло нош кыӵе ке чебер нылмурт ужысь бертӥз но дӥсьсэ воштэ. О! Соку кӧня адӟонъёс усьтӥсько! Ваньмыз вуюись буёлъёс пыр.
Тани мон но адӟи сыӵе суредэз! Сьӧдкысъем нылмурт кылиськем. Йырсиез лӧс-лӧс лэзиськем. Тани со шӧдтэк шорысь чильпырась ул дэремзэ йыр вылтӥз кыскиз. Таин гинэ ӧз тырмы, быдэс кылиськиз но, синучкон доры мыныса, мугорыныз мынчыръяськыны ӧдъяз. Малы бен мынчыръяськонтэмез? Инмар обидьымтэ: чебер, веськрес мугор сётэм.
Ӝоген ныллэн син шораз йӧтӥз, лэся, штораез возъямтэ шуыса, со пытсаськиз… Жаль, кино быриз. Нош кема кыстӥськысал ке, со акыльтысал, дыр. Сыӵе чебер но тунсыко ӧй ни потысал. Нош табере та веранме дневник вылэ выжто. Шуо: мурт дневникез лыдӟыны уг яра. Но ведь лэзьымтэез котьку но золгес бордаз кыске. Соин ик мон но киям шӧдтэк шорысь сюрем дневникез лыдӟытэк ӧй чида. Озьы ик, кызьы ӧй чида учкытэк возъямтэ укное…
* * *
«Яратон, яратон, мар меда сыӵе тон?..» Та юан монэ пичиысен ик сюлэмшугъяськытыны кутскиз ини. Ну кыӵе пичиысен? Школае нырысетӥ классэ лыктэме бере. Тодӥсько на нырысетӥ куарусён азьын заводэ ветлэмме. Милям Пуро гуртамы Ижкарез озьы шуо. Мынӥм поездэн. Чугун сюрес буко кадь куасалскыку, сое вагон укнотӥ но адӟыны луэ. Муръётӥз ӵыныз бугыр-бугыр потэ. Малпалод, мисьтаськись озьы сьӧд дӥсез позыръяса пызьыръя… Нош ӵужектыны ӧдъям писпуос милемлы пумит кыӵе зол бызё! Пилемъёс тӧдьы юсьёслы кельшо. Соос но дырто. Кытчы? Лымшоре, дыр.
Тазьы, вагон укнотӥ инкуазез чакласа, Ижкаре вуэмме но ӧй шӧды. Тодӥсько на вагонысь васькыса трамвае пуксеммес, Сенной базаре вуэммес. Калык кузьыли карын мында. Вузаськисез басьяськисезлэсь тросгес. Вузъёслэсь син мальдэ. Нош милемлы бакча сиён но, лымшорысь виноград-арбуз но кулэ ӧвӧл. Анай шуиз: «Сиён-юон басьям ке, тыныд школа костюм но дышетскон котыр басьтыны уксёмы уз кыль ни. Бырйы ачид, мар кулэгес. Яке сиськод, яке 1-тӥ классэ адями сямен формаен, портфелен мынод…» Мон кыкетӥзэ бырйи.
Мон понна школае мынон нырысетӥ интыын. Туж но туж дышетскеме потэ. Анае дышетӥсь бере, ми школа коркан улӥськом. Пиналъёс син азям. Гырлы жингыртэ ке, люр-ляр поттыса, кыре пото. Ляпаен, ватскыса шудо. Куддыръя монэ но ас пӧлазы куто.
Соку мон шудолэсь но шудо. Аслым ачим дышетскись кадь потыны кутскисько. Гырлы жингыртэ но, соос школае пыро. Мон но сьӧразы. Пуксисько кудзы ке вӧзы парта сьӧры. Дышетӥсь пыре. Вань пиналъёс султо, мон но — соослэсь адӟем карыса. Дышетӥсь чырткемъяське но, нылпиос пуксё, урок кутске. Нош тани дышетӥсьлэн сак синъёсыз мултэс «ученикез» синйылто но, со монэ потыны куре. Тыныд, пе, кӧня ке будоно на… Мон, йырме ошыса, потӥсько. Ӧс сьӧрын нокин адӟымтэ дыръя кӧтӝоже кыре ӧръяське, синву тудвуэн кошкыны турттэ.
Нош табере тани сыӵе дыр вуиз. Мон вылын школьной костюм. Нырысетӥ мертамез ик вылам вурем кадь тупаз. Синучкон азьын асме учки но! Ой! Мон-а та? Оло, кин ке мукет пияш? Сыӵе чебер, тузӥ адӟиське! «Вот таӵе дӥсен школае пыри ке, монэ нокыӵе дышетӥсь но уз улля ни», — данъяськыса шуи мон аслым ачим.
Школа дӥсьме кыльыны нокыӵе мылкыды ӧй вал ни. Тазьы ик гуртэ бертыны дась. Мед ваньмыз адӟозы, мед тодозы, мон дышетскись ни шуыса. Но анай дӥсьме кыльыны косӥз, кытын ке но нашталод, пе.
* * *
Вуиз нырысетӥ куарусён но. Куазь шундыё, шулдыр тупаз. Инкуазь та нуналэ юон дыре кадь дӥсяськем. Ӵуж, горд, вож адӟиське. Писпуос пӧлын самой шоголез, дыр, бадяр.  Чебер ке, чебер ини со сӥзьыл! Юнме шат килы кельшись куаръёссэ нылпиос шумпотыса бичало но книга висказы тыро. Нырысетӥ классэ вуэм ог кызё нылпиос пӧлын ми Быж Мишаен гинэ школьной формаен вал. Малпасько, ёрмыса, куанер улэмысьтызы, дыр, куд-огез костюм ӧз басьтэ. Уго фашистъёсты вормем дырысен трос ик ӧз ортчы на. Ми война бер пиналъёс. Атайёсмы — ожысь бертэмъёс. Улонме чакласько ке, мыным, оло, ёзъёсылэсь каньылгес ик вал. Малы ке шуоно мон дышетӥсьлэн пиез. Колхозникъёс трудодень вылэ ке ужазы, мынам анаелы уждун уксёен сётъязы. Гуртамы школамы начальной вал. Классъёс бадӟымесь. Укноосыз кык-куинь мон ӝуждаесь луозы. Партаосмы кузесь. Ог вить адямилы пуксьымон. Вылаз пичиесь котырес гопъёс. Соос чернила поныны озьы гопчемын.
Дышетӥсьёс ӧжы­тысь­-а яке пиналъёс тырмымтэысь-а, одӥг висъетын кык класс дышетскылӥз. Нырысетӥ класс — куинетӥен, кыкетӥез — ньылетӥен. Дышетӥсь нырысь одӥг класслы урокез валэктэ но, уж сётыса, мукет классэ «выже». Нош пиналъёс, валамон, пӧртэмесь. Одӥгъёсыз олокытӥ-мартӥ темазэс но валало, ужзэс но лэсьто, мукетъёсыз уг валало но — аляктыны, берыкъяськыны кутско…
Мон ужме быдтӥсько но дышетӥсе шоры дол! гинэ учкыса улӥсько. Со уго сыӵе чебер, пичи ымныро, сьӧд синкашо. Сьӧд чилясь йырсиез, кык ваё пуныса, йырбераз котыртэмын. Вань дышетӥсьёслэн озьы. Кивалтӥсьёссы косо-а, мар-а. Нош учениклы синмаськыны яра-а меда дышетӥсьлы? Мон синмаськемын ни Васса Васильевналы. Мыным но со кадь чебер кышно сюрысал ке, кыӵе шудо луысал! Но отчыозь ай будоно но будоно!
Дышетӥсь урокез валэктэ, нош мон верамзэ уг кылӥськы, ас югдам улӥсько, малпан шурам уясько.
— Сидоров, Сидоров! — шӧдтэк шорысь кылӥськиз пель сьӧрам. — Вера ай, мар тон малпаськод?
— Мон-а?.. Мон… тӥ сярысь, Васса Васильевна.
— И мар тон малпаськод мон сярысь, Сидоров?
— Кыӵе тӥ чебер, коштан, веськрес… шуыса.
— Коштан? Кыӵе со сыӵе?
— Уг тодӥськы.
— Вот мар, Коштан, верамме уд ке кылзӥськы, мон тонэ дорад улляло. Валад-а?
— Валай…
«Яратэмме вераме бере дышетӥселэн мон шоры учконэз чылкак воштӥськиз. Со мыным туж чурытэсь куронъёс пуктыны кутскиз, котькуд шекме адӟыны ӧдъяз. Шӧдӥсько: «витьлы» быдэстэм ужме но «ньыльлы» яке «куиньлы» сяна ӧз дунъялля ни. Малы? Йырыз кур луиз яке кулэтэм малпанъёсме озьы тӧлӟытыны тыршиз? Соиз но, таиз но вал, дыр.
* * *
Мукет синмаськонэ мукет кайгуэн берыктӥськиз. Таиз кельшытэм лулы пислэг вал. Туж синмаськыса учкылӥ со шоры. Пичи комокын кӧня яркыт буёл! Ӵуж, вож, тӧдьы, сьӧд… Инкуазь — туж но туж кибашлы суредась. Солэн кылдытэм чеберезлы пумтэм вожъяськисько. Сьӧд вожъяськон ӧвӧл со — югыт но ӟеч. Соин ик амалтэк кутӥсько карандаш. Пислэгез бумага вылэ пуктыны тыршисько. Кӧня ке гож лэсьтӥсько но садэ потӥсько. Тылобурдо, мынэсьтым мылкыдме тодыса кадь, улмопу вай вылэ пуксиз, аслэсьтыз чеберзэ тапаласен но, сопаласен но возьматэ. «Уть, уть, кыӵе мон чебер!» — шуэ кадь. «Бен, бен, уд пӧяськы, шонер вераськод», — тылобурдоен соглаш луисько мон.
Выльысь пырисько корка — «улӟытыны» тыршисько пислэгез. Буёлъёсын но маяллясько. Курадӟеме юнме: инкуазь суредасез ортчеме уг луы.
Мар каром на? Бӧрдыса ужез уд тупаты. «Иське, — йырам чилектӥз, — кутыса киям коть возёно». Нальык лэсьтэмзэ бускель Очейлэсь адӟеме вань. Шуг ӧз поты йӧндырыны. Иське, мынам но пӧрмоз. Сокем кема ӧй курадӟы. Пуктӥ льӧмпу вай вылэ. Шораз — «кыл йылаз» — парсь кӧй юнматӥ. Возьмасько ини палэнысен, ку пислэг вуоз. Нош тылобурдоос шӧдӥзы кадь синпӧетэз: матэтӥ но уг лобало. Яке шӧдонзы вань, яке монэ — ватӥськем муртэ — адӟо. Возьмаса акыльтӥ но корка пыри. Кӧня ке улыса, кыре потӥсько но — нальыке ворсаськем. Учкисько но, пислэг пытсаськем.
Э, шузие, шузие, ас мылкыд каремедъя ук четлыке пырид, эрикедлэсь люкиськид. Жаль но потӥськод, чебере, киям но воземе потэ. Только кызьы ай тонэ кутод? Нальыкез ӝутӥ ке, соку ик лобӟыса тур! гинэ кошкод. Туж но туж чакласьконо. Каллен… каллен… хап! Тон мон киын! Матысен оло нош уката но чебер адӟиськиськод. Сьӧдкыркӧжы кадь синкӧльыед солань-талань бызьылэ.
Йырзэ бергатэ, мозмытскыны турттэ. Озьы гинэ мозмыны луонтэмзэ шӧдыса, киез кокчаны кутске. Вӧсь каре, ява. Эрик сётӥд ке, вир но поттоз… Пислэгелэн чеберез шоры учкыса кӧты тырем бере мон сое лэзьыны малпасько ни вал: мед эркын лобалоз, мед югыт дуннелы шумпотоз, монэ но, пичи бакчаысь садамы вуылыса, мед шулдыртоз. Собере йырам мукет малпан чилектӥз: «Но ведь эшъёсылэн но пислэгез, киязы кутыса, матысен адӟемзы потэ, дыр. Вай ай соослы но дуно тылобурдоме возьмато». Нош кытын ай мон сое ӵуказеозь кӧлтом? Нимысьтыз тылобурдо четлыке ӧвӧл. Нош нальыкам ик ке? Отчы омыр сюре, сиёнэз вань, коӵышъёслэсь кышканэз уз луы. Малпамын — лэсьтэмын.
Ӵуказеяз ӵукна, лобыса сямен, школае пислэгеным вуи.
Тани пиналъёс но оген-кыкен вуылыны кутскизы. Ӝоген быдэс класс люкаськиз. Котькудӥз паймыса, синмаськыса учке вожо-ӵужо лул комок шоры. Йырзэ киыныз маялтыны тырше. Пислэглы уг кельшы, лэся. Кокчалтыны выре. Мозмытскемез, лобӟемез потэ. Куаратэк сюлворыса кадь кыре куриське. «Я, я, кӧня ке гинэ чида на, ӝоген мон тонэ лэзё, лэзё, мусое» шуыса гинэ вуттӥ но — гырлы жингыртӥз, дышетӥсь пыриз. Пислэг мозмытскиз, лобӟыса укно йылэ кечырскиз. Собере быдэс урок ӵоже, солань-талань лобаса, ветлӥз, ураме потон пась утчаз. Олокӧня пол укно пияла шоры но донгиськылӥз. Урок урок кадь ӧй вал ни, пиналъёслэн пелязы дышетӥсьлэн верамез ӧз пыры ни. Солэн чиданэз чигиз, лэся, лек юаз: кин татчы тылобурдоез вуттӥз, кинлэн со ужез?..
— Мынам… Мон, Васса Васильевна, пислэгез вайи вал, — парта сьӧрысь султыса, йырме ошыса, нёжтӥ.
— Тон?!! — дышетӥсь йырыз курен синзэ чарка пасьта усьтӥз. — Ма, мар адями тон, Сидоров? Котькуд нунал сямен мар ке но юрӟымзэ лэсьтӥськод. Тынад мумид дышетӥсь ук! Верай ке, кыӵе солы возьыт луоз! Кепыраса му пыр виялоз! Нош тыныд пӧсь но, кезьыт но ӧвӧл кадь. Мукет пиналъёслы адӟем карымон луэм интые, тон соосты уродэзлы дышетӥськод… Вуоно урокын лобасед медаз ни луы классын.
Тӥни озьы яратоно дышетӥсе понна мон синазькыль, адӟемпотостэм адями луи. Дышетӥсьлэн мышкыз ышыса вуттӥз-а, ӧз-а — пиналъёс пислэгез уйылыны кутскизы. Ӵаш! вазе. Котькудӥзлэн пислэгез ас киыныз кутэмез потэ. Пиос парта йылэ тубо, выж вылэ тэтчо. Ог-огенызы донгасько. Киын кутыны луонтэмзэ шӧдыса, картузэнызы лэзьяны ӧдъязы. Пислэг кытчы кариськыны уг вала ни. Ярам ай, классын гур вань, солэн пельпум сьӧраз лулзэ кӧнялы ке лэзьыны быгатэ. Отысь но пиналъёс, кузь бодыен кышкатыса, потто. Солань-талань лобаса, пислэг, шӧдӥське,  жадиз ини. Ымзэ усьтӥз, туж ӵем шока, синъёсыз кышкам муртлэн кадь бадӟымазы, шулӟектӥзы. Но мискинь тылобурдо сьӧры бызьылӥсь нылпиос номыре уг адӟо, дугдыны уг валало. Шӧдо ук: тани-тани киязы луоз. Сыӵе шуд усиз Бальӟо Толиклы. Классамы со самой чырткемез, шаплыез. Толикез вань пиналъёс котыртӥзы. Мон, люкаськем эшъёсме палэнтыса, пислэге доры вуи. Толик киысь пислэгме басьтыкум, со кулэмын ни вал… Кызьы озьы? Малы пислэге кулэмын?! Али гинэ улэп вал ук, лопыръяськиз, лобаз! Нош табере… со гинэ ӧз! Быдэс дунне кысӥз мон понна! Бен, бен! Ы-ы-ы-ы-ы!.. Ой, мар мон дауртӥ?! Сыӵе чебер, сьӧлыктэм лулэз быдтӥ!.. От изьвер, от кӧтвеськантэм, от албасты! Мон ваньзэ чиданы дась, мед гинэ улӟысал на пислэге… Но со ӧз ни лобӟы омыре, ӧз ни вазь: «Пинь-пинь-пинь!..» Бам кузям синкылие шапыр вия, быдэс мугоры дырекъя. Выльысь учкисько пислэге шоры. Со табере уг ни пишты, уг ворекъя. Соку йырам чилектӥз: «Оло, малпан но, тылобурдо сямен, кыдёкысен гинэ чебер? Иське, малы сое одно ик киямы кутэммы потэ?» Син азям пуктӥ, кызьы мыным вить арес тырмон нуналам калейдоскоп шудон кузьмазы. Мон туж шумпотӥ солы. Пичи котырес пиялае синдэ лякиськод но — выжыкыл, пӧртмо дуннее вуиськод кадь. Адӟылымтэ турлы буёло сяськаосты синйылтӥськод. Шудонэз каллен берыкъямъя соослэн туссы вошъяське. Но со вошъяськон пумтэм ӧвӧл. Куке-соку выльысь вуиськод нырысетӥ адӟем сяськаед доры…
* * *
Таиз учыр куинетӥ классын дышетскыкум вал ини. Ми классамы шальк-шальк пиос гинэ вал, шуыны луоз. Пуро гуртмыя ке верано, тямыс пилы кык ныл! Нош ӟуч кырӟанын чылкак мукет статистика сётӥське… Малы ми дорын чылкак мукет югдур? Дышетӥсе бере синме чќлтӥ ӵош дышетскись ныл шоры. Маиз магнитаз сюлэмме бордаз? Уг тодӥськы. Нимыз солэн вал Тая, веськрес мугоро, лыз синмо, мертчан йырсиез кык ваё пунэмын, пумъёсаз — буёло чукъёс. Со классысьтымы нылъёс пӧлысь висъяськылӥз лякыт сямыныз, шыпыт луэменыз. Либытэз сюлэм котыре шуныт мамыкен биниськылӥз. Тая «ньыльлы» но «витьлы» дышетскиз. Монэ солэн тыршемез паймытъяз. Дышетӥсь мар косэ, ваньзэ быдэстылӥз. Мынам таиз ласянь чиданэ ӧз тырмылы. Ыльняньлэсь вал, дыр. Со нош — анданлэсь.
Ӟеч дышетскемезъя синмаськыны кулэ вал, дыр, Ванька Валялы. Со «вить» гинэ басьялляз. Йырсиез гордалэс, ымныраз шунды пырыос. Валялэн соос тол но, гужем но пиштӥзы. Котьма медло но, мон сое ӧй яраты, дышетӥсьлы укыр пыриськемез понна но гуртэ ужез списатьтыны сётымтэысьтыз. Со понна дышетӥсьмылэн Валя вал самой-самой яратоно дышетскисез: запасной аэродромез. Тужгес но открытой урок дыръя роноын ужасьёс вуыку. Соос азьын астэ пурысь ӟольгыриен возьматӥд ке, школаысь лобӟемдэ но уд вала. Иське, павлин тылобурдо кадь чильдолано. Дышетћсь озьы пиштэ, пиналъёс урокын мур тодэм-валамзэс возьмато ке. Юнме уг шуо ук: педагог артист луыны кулэ. Лыктэм куноос-учкисьёс азьын со быръем мунёоссэ чебер вераськытыны быгатэ. Но весь одӥгъёссэ юад ке, куноос кырыж учкыны кутскозы. Синпӧет понна дышетӥсь ӝутъя ляб дышетскисьёсты но. Зэм, юанэз капчигес луэ ни. Маин бен концерт ӧвӧл? Валтӥсь рольёсты шудо: Ванька Валя, Конглё Тая, Быж Миша но куд-ог мукетъёсыз.
Мон урокъёс бере школаысь бертыны табере сокем уг дыртӥськы ни: Таяез возьмасько. Нош со котьку сямен кыӵе ке муген ӝега: я солы концертлы дасяськоно, я бордгазет поттоно, я ляб дышетскисьлы юрттоно… Мон но, валамон, дол! сылыса уг улӥськы, быгатэмея юрттӥсько. Озьы ачим но ӧй шӧды общественной уже кыткиськемме. Кужмысь, косыса ӧвӧл — ас мылкыд каремея! Дышетӥсьлэсь гуртэ сётэм ужзэ но шумпотыса быдэсъясько. Умой отметка басьтӥськод, шуныт ушъям кылэз кылӥськод но, пельпум сьӧрын бурдъёс кылдо кадь…
* * *
Туннэ кино возьматозы, шуизы. Ӝытэз чидатэк возьмам. Нош возьмаку дыр, оло, юри дугдэ. Мон Таяез киное ӧтьыны куать часын ик вуи ини. Куинь чиньыме ымам поныса, шултӥ. Монэ озьы шуланы бадӟым пиос дышетӥзы. Оло серекъяса, оло шудыса веразы на: тод, пе, кин шуланы уг быгаты, сое нылъёс уг ярато. Тыршытэк ӧйлась.
Тая укное учкиз. Кӧня ке улыса, дорам вуиз ини. Ӝамдэлы кадь гинэ, вылаз пальтозэ куштыса, потэм. Синмыз ӝож, мертчан йырсиез тугаськемын. Бӧрдэм но, лэся.
— Малы бирдыяськытэк потӥд? Куазь кезьыт ук — висьыны усёд! — шуи мон.
— Монэ эн возьма, киное уг мыны, — шуиз со ӝожмыт куараен. — Мон уксё ӧй шедьты. Нэнэй трудодень вылэ колхозын ужа бере, векчи уксёез бырем…
— Мон ӧтисько тонэ киное… Мынам вань уксёе… Мын пыр но дӥсяськы чалякгес!
— Мон мурт чотын уг мыны! — ӵыжаськыны ӧдъяз Тая.
— Мар, мар? Мон тыныд мурт?! Кызьы озьы вераны ымыд пыре. Сомында ар ӵош шудӥськом, дышетскиськом ни но… мурт карыны кутскиз!
— Я, я, али ик дӥсясько но мыном…
Улон секыт ке но вал ай, ваньзы сямен эшъёсы вить копейка уксё шедьтӥллям. Калык киное трос люкаськиз. Уногес вал нылпиос ик. Вал на ай укное «лякиськемъёс» но. Соосты кино возьматӥсь жаляз — лэзиз пырыны уксётэк но.
Кино возьматӥзы дышетскон классамы ик. Партаос коридоре поттамын ни вал. Укно палан тӧдьы бӧз — экран, нош аппаратуразы ӧс палан тачыртӥз. Кино Чапаев сярысь. Вань нылпиослы кельшиз. Тросэз бӧрдӥзы но, Чапаевез жаляса. Сӧсырмыса пал киыныз ке но уяз, сыӵе герой уз быры, уз выйы кадь потӥз. Но озьы ӧз луы. Макем жаль. Мон вӧзын пукись Тая синкылизэ уг ваты. Ма, мынам но пушкы тыриз. Мынам, экран сьӧрысь «вуэ» пырыса, Чапаевез утеме потӥз. Мон уяны быгатӥсько ук, оло, юрттыны быгато… Экран сьӧры мынӥ но — отын нокыӵе шур но, ву но ӧвӧл…
Урамысен но, гуртамы бертыкумы, ми киноын улӥмы на, соин, омырен сямен, шокамы. Соин ик, вылды, уйшор кизилиосты но адӟытэк, шыпытак вамышъямы.
* * *
Со нунал мукетъёсызлэсь номырин но ӧз висъяськы. Жингыртӥз гырлы. Урок кутскиз. Таялэн ымныр тусаз шат, пальпотэмаз кӧня ке мӧзмылэсэз шӧдӥськиз. Но мон адӟемме соку ик вунэтӥ, урок сюлмаськонэ выйи. Дышетӥсьмы угось соку ик гуртэ сётэм ужез юаны кутскиз. Нош Таяез, доска доры ик поттыса, пыр-поч валэктыны косӥз. Тая, пичи но могатэк, ваньзэ рос-прос вераз. Васса Васильевна солы «вить» пуктӥз…
Классысьтымы нокин но ӧз малпа, Таямы бурмонтэм висе ни шуыса. Со температураен но, ньылоныз пыктыса, школае лыктэм. Черламзэ нокинлы но верамтэ, ортчоз кожам. Озьы ӧз луы. Куинетӥ урок бере Тая парта вылэ ланьырскиз… Дышетӥсь  Опоч Оляез першалэз ӧтьыны косӥз. Нылаш бызьыса кошкиз. Больницамы артысь коркан бере, фельдшермы Надяпай, сьӧдкысъем кышномурт, ӝог вуиз. Таялэн кунулаз градусник пуктӥз, ньылонзэ учкиз, вирзӥбетсэ эскериз но шуиз:
— Тае туннэ ик ёрос больницае нуоно!
Дышетӥсьмы милемыз дорамы лэзиз, нош ачиз транспорт утчаны кошкиз. Ми, шузиос, шумпотӥм: шудыны дыр сюриз. Нош утёд ке, та Таяен весяклы люкиськонмы вылэм. Кык нунал эмъяськонниын кылльыса, со кулэм, бурмытыны быгатӥллямтэ. Врачъёс висёнзэ тодмаллямтэ: ангина гинэ кожаллям. Нош зэмос висёнэз дифтерия вылэм. Кык мурт кулӥз, та кылез рос-прос тодытозь. Карантин ялӥзы, школаез огдырлы пытсаллязы.
Мукет дыръя, оло, таӵе каникуллы шумпотысал, нош али мыным шундыё инбам но пилемо вал. Эшъёсы Тётёй гурезез волятымон нискылазы ке, мон, кытчы пырыны инты шедьтытэк, кыретӥ-буретӥ поръяй, малпаськи, бӧрдӥ. Кулонэз каргай, малы со сыӵе жалясьтэм, аксым… Самой ӟеч адямиосты ик, сьӧлыктэм нылпиосты, кекатэ, быдтэ. Кулонэз мон кыӵе ке орангутанг обезьянэз кадь син азям пуктӥ: кӧшкемыт ымныро, ӝужыт мугоро, киосыз кузесь, лэчыт гижыосыныз адямилэн гульымаз кырмиське…
* * *
Инбамысь кысэм кизилилэн югытэз, пе, музъем вылэ аръёсын лыктэ. Монэ но Таялэн кысэм сюлэмызлэн шунытэз, малпасько, улытозям шунтоз…
Анатолий Перевозчиков.

Удмурт Дунне
By Удмурт Дунне 8 августа, 2012 16:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<