Бырон азьын сюлмаськон?

Удмурт Дунне
By Удмурт Дунне 21 августа, 2012 16:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Бырон азьын сюлмаськон?

Гуртлэн ужпумъёсызлы сӥзем конференциын.

Эгра ёросысь Сэп гуртын куинь нунал ӵоже ужаз «Россиысь гуртъёс: азьло но туала вакыт» 13-тӥ конференция. Кызьы пусйиз сое радъясьёс пӧлысь одӥгез — Россиысь Наукаосъя академилэн Россилэн историезъя институтысьтыз история наукаосъя доктор Константин Аверьянов, азьлозэ тодытэк, туннэ улонэз рос-прос эскерытэк, ӵуказе нуналэз радъяны уз луы. Тужгес но лэчыт ужпумъёс сыло гурт азьын. Соин ик та ужрадэ люкаськыло пӧртэм удысъёсысь тодосчиос: историез, кылэз, культураез, калык йылолъёсты но сямъёсты, экономикаез, гурт ужез эскерисьёс.

Лек пытьы
Асьме шаермы вылын Россиысь гуртъёслэн бырон мугъёссы сярысь мадиз история наукаосъя доктор Г. Никитина.
Берло кызь арзэ гуртъёс азинскемысь дугдӥзы. Нырысь ик со герӟаськемын ужан интыос ичиёмемен но аслыд ярамон уж шедьтымтэен, ичи уждунэн, улон инты сярысь сюлмаськонэн. Учёнойёс верало: гурт улонлы тырмыт саклык ӧз висъяськы ке, 15-20 ар ортчыса, пичиесь гуртъёс бырозы, тужгес но Нечерноземьеын.
Гуртъёслэн быронзы Россия понна выль ӧвӧл ни. Кутскон солы сётэмын вал 1949-тӥ-1950-тӥ аръёсы, соку колхозъёсты бадӟыматъяны кутскизы.
— Мон та югдурез нырысьсэ шӧдӥ, «Добрый след на Чутырской земле» книгаез дасякум, — пусъе Галина Никитина. — Со сӥземын Удмуртиысь огез кужмоезлы хозяйстволы — Эгра ёросысь «Чутырский» СПК-лы. Чутыр котырын гинэ Октябрь революция бӧрсьы 29 гуртъёс вылэм, ваньмыз сямен — пичи колхозъёс. Котькудӥзлэн гидроэлектростанциез, тылобурдо, ыж, парсь вордон гидъёсыз, ыж гон тугон тӥрлыкез, кебитэз но мукет. Колхозъёсты дыр ортчемъя ялан бадӟыматъязы. 1960-тӥ арлы «неперспективной гуртъёс» шуон политика кутскемлэсь азьвылгес Чутыр котырын 6 бадӟым хозяйство кылиз на, соос огазеязы ни 23 гуртэз. 1960-тӥ арын та колхозъёсты огазеязы одӥг «Чутырский» совхозэ, озьы эшшо кӧня ке гурт быриз на.
1971-тӥ-1988-тӥ аръёсы Удмуртиын 1 сюрс 35 гурт быриз. Тросэз соос удмурт гуртъёс вал. 1988-тӥ арын УАССР-ын 2 сюрс 155 гурт пусъемын. Со пӧлысь 89-аз одӥг но улӥсез вылымтэ ни.
2010-тӥ арын Россиысь калыкез лыдъян-чотан дыръя асьме шаерын пусъемын буш кылем 119 гуртъёс. Удмуртиысь статистикая кун службалэн лыдпусъёсызъя туэ нырысетӥ январьлы 192 гуртын 5 но солэсь ичи улӥсез.
Уйпал ёросъёсысь гуртъёслэсь быремзэс герӟаны луэ начар музъемен, куазьлэн кезьытэныз. Но быро гуртъёс лымшор ёросъёсын но. Сое дугдытыны туж секыт. Кылсярысь, берло дас арзэ Шаркан черкогурт 1 сюрс 500 адямилы йылӥз — отчы тросгес лыктӥзы пичи гуртъёсын улӥсьёс.
Н. Шулакова эскере гуртын будэм егитъёслэсь городэ улыны кошкон мугъёссэс. Уноез соос, институтэз яке училищеез йылпумъяса, олокыӵе но мугъёс шедьтыса, городэ кылё. Татын ини егит адямилэн улон шоры учконэз воштӥське.
2002-тӥ арысен 2010-тӥ арозь удмуртъёслэн лыдзы синӥз 13,3 процентлы. Валамон ни, озьы луэ егитъёслэн асьсэ кылзы, культуразы шоры чиньы пыр учкеменызы сэрен но.  Но талэн вань умой палыз но: берло аръёсы гуртысь  городэ вуэм егитъёс шаплыгес дышо вылезлы. Соослэн  быгатонлыкъёссэс шараяны тросгес луонлыкъёссы кылдо. 5 ар но солэсь ятыр городын улэмъёс асьсэлэсь ужзэс усьто, культура улонэ мургес пыро.

Кин кылёз улэп?
Россиысь Наукаосъя академилэн Урал ёзысьтыз философияя но правоя институтлэн Удмуртиысь филиалэз утча туала удмурт гуртлэсь модельзэ. Нырысь ик эскеронъёс мыно пичи но шоро-куспо гуртъёс вылын. Наукая валтӥсь ужасьлэн А. Пономарёвлэн валэктэмезъя туала гуртын туж секытэн ортчо воштӥськонъёс. Со али но улэ на кадь 70-тӥ аръёсы Нечерноземьеез ӝутонъя программая: калык дышемын бадӟым хозяйствоын (колхозын, совхозын) но ас дораз ужаны.
Нош хозяйство банкрот луэ ке? Улон возьматэ: эштос люкиське крестьян-фермер хозяйствоослы яке пыре эшшо бадӟымгес огазеяськонэ.
Но фермеръёс улыны быгато кун ласянь юрттэмъя гинэ. Юнме шат 90-тӥ аръёсы кылдэм хозяйствоос пӧлысь улэп кылизы но пыд вылазы султӥзы юрттэт басьтэмъёсыз гинэ. Али сыӵе юрттэтлы оскон ичи. Соин ик фермер кариськись туж мур малпаськоно луэ. Озьы-а, тазьы-а, но огъя сиён-юон поттонын пичи хозяйствоослэн люкетсы 10 процентлэсь трос уз люкаськы. Соин ик СПК-осты «сиёзы» агрохолдингъёс. Калык ачиз ик куриськоз бадӟым предприятиын ужаны.
Но агрохолдингъёс кылдыса, гуртын тросгес луозы мултэс адямиос. Заводъёсын сямен трос ужез быдэсъялоз техника. Гуртоос палэнысь уж утчано луозы. Таӵе тодметъёс асьме шаерын но вань ни. Озьыен, гуртэз азьпалан но сюлмаськонъёс возьмало. Соин али тыршоно гуртлэсь тусбуйзэ но, йылолъёссэ но культуразэ утьыны.
— Конференциын эскерем ужпумъёс Удмуртиысь гурт улонэн герӟаськемын ке но, тупало вань улосъёслы, — шуиз история наукаосъя доктор К. Аверьянов. — Ми та выллем ужрадъёс 20 ар пала радъяськомы ни. Ортчыло соос кык арлы одӥг пол. Та аръёс ӵоже вуылӥмы пӧртэм интыосы. Но 90-тӥ аръёсы пумиськылӥм бадӟым городъёсын — Москваын, Нижний Новгородын, Тверьын, Белгородын.
Выльдӥськон аръёс бере гинэ ини вуим огкылэ: гурт улонэз эскероно гуртын, отысь улонэз адӟыса. Вуылӥм Коми Республикаысь Печора шур дуре интыяськем Усть-Цильма вашкала черкогуртэ. Нош кык ар талэсь азьло кенешонмес ортчытӥм Карелиысь Ладога ты дорысь паркын. Тодматским со палан гуртъёсын улӥсьёслэн улэм-вылэменызы. Туэ тани тӥ дорын. Сэп — туж чебер, шулдыр, чылкыт гурт. Соку ик шӧдӥськод: татын азинске гурт хозяйство но, культура но.
Куд-ог улосъёсын чик уг оско ни ӵуказе нуналлы, мӧзмыт уло, нош татын ужась, шулдыръяськыны быгатӥсь, капчи мылкыдо, пальпотӥсь калык. Соос понна шумпотоно.               Сэп гуртлэн ӵуказе нуналэз одно ик луоз.

Крестьян — со ужась адями!
Москваысь Гурт хозяйствоя академиысь тодосчи А. Варламов эскере Россиысь гурт предприятиослэсь пӧртэмлыксэс.
— Гурт предприятиос пӧлысь 25 процентэз гинэ, вань луонлыкъёсты уже кутыса, тыршо, — шуэ Александр Васильевич. — Мукетъёсыз уг азинско. Мон сямен, со нырысь ик герӟаськемын гурт уж сюбегамен. Ӟеч кусыпъёс радъямын ӧвӧл сиён-юон будэтӥсьёс но сое поттӥсьёс куспын. Мукет кунъёсын ӵошатыса, асьмелэн гуртлы трослы ӧжытес кун ласянь юрттэт сётӥське.
Гуртын мед луозы ужбергатӥсьёс но, кооперативъёс но, ас хозяйствозэс нуисьёс но. Соослы юрттоно техникаен, тӥрлыкен, будэтэм сиён-юонзэс вузанэн. Музъем бордын ужась мед шӧдоз, со крестьян шуыса. Ас хозяйствозэ нуисез лыдъяно ӧвӧл ужтэк улӥсен — трудовой книжкаяз озьы ик гожтоно — «Крестьянин». Ужась адями мед быгатоз будэтыны сое, ма солы матынгес. Соку гуртысь калык уз пегӟы ни, производство но ӝутскоз.
Ортчем конференцилы дунъет сётӥз история наукаосъя доктор Г. Никитина:
— Мыным туж кельшиз та ужрад эскероно ужпумъёслэн паськыт луэменызы. Кыӵе гинэ юанъёс ӝутэмын ӧй вал. Огез тодосчи мадёнзэ сӥзиз гурт архитектуралы, мукетыз уйпал улосъёсысь гуртъёслэн улон-вылонзылы. Ваньмыз со тунсыко. Конференция Сэпын ортчиз бере, туж умоен пумитамын та гурт но Эгра ёрос сярысь докладъёс. Нош кыӵе мыло-кыдо пыриськиз та конференцилэн ужаз гурт калык. Уно юанъёслы валэктонъёс шедизы.

Иван Аркашев.

Удмурт Дунне
By Удмурт Дунне 21 августа, 2012 16:13
Write a comment

1 Comment

View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<