Атасэз но иземе кельтоз

Удмурт Дунне
By Удмурт Дунне 15 августа, 2012 16:42

Атасэз но иземе кельтоз

Азбарын кокчасько куреген атас.

Кылемаз «Берекет» номерын «Уболы быдэ — возьмаськись» материалын лыдӟисьёсты тодматӥм Ижысь Клавдия Вахрушеваен. Синмаськымон бакча сиён будэтэм сяна, та нылкышно котыр ласянь кибашлы — куд-ог воргоронъёслы кытын ай сьӧраз уйиськыны.
Клавдия Александровна кияз тӥр но, пила но, лобзик но кутоз. Укно наличникъёс  ачиз ик чебермаса лэсьтэ. Нош кузпалыз Николай Григорьевич нылкышнолы чеберлыко киужъёс лэсьтонын юрттӥське. Ижысь Индустриальной ёросысь Калыклы юрттэт сётонъя центрын  ӵошен шутэтскемзы бере бакчаязы пушъет лэзизы изолонлэсь чеберлыко киужъёс.
— Ӵошен капчигес но ӝоггес пӧрме, — шуэ Клавдия Александровна. — Качыен та материал вольыт уг вандӥськы, Коля сое вылысьтыз вылаз каре но резакен ортче. Ки улысьтыз мынам куремея пото ини лента выллем кузь юдэсъёс — кудӥз ке пинё-пинё, кудӥз котыресгес. Кудзэ ачим вандылӥсько. Азьло ик дасям форма вылэ сое лякылонэз гинэ кыле на. Туала дыре вань материалэз но ужан тӥрлыкез магазинъёсысь шедьтыны луэ, эн гинэ азьтэмъяськы.
Таӵе ужъёс лэсьтыны мылкыд вӧзы кулэ на чеберлыкез шӧдыны-валаны быгатон. Пӧйшур я тылобурдо суредэз син азяз пуктыса, нылкышнолэн ки улаз нош выльёсыз киужъёс вордӥсько. Лыдӟисьёслы но  ас быгатэмзэ усьтӥз.
— Киужъёслы пӧртэм буёло изолон мынэ. Одно ик кулэ луоз клеез лякись пӧсь пистолет. Кинлэсь ке тусбуйзэ пуктон азьын нырысь плащёвка материаллэсь чехол вуроно — со луоз мугор. Пушказ тулъяно векчи юдэм изолон — киуж зор улын уродмыны медаз шедьы. Нош корка пушкын возёнооссэ тырмытыны луоз ӟустариен яке синтепонэн, чехоллы но пӧртэм басмаез кутыны луоз.
Кылсярысь, атасэз лэсьтон понна изолонлэсь лентаез тылы пиньёс выллем вандоно. Улӥысен кутскыса, мон сое пӧсь клеен мугор борды лякисько. Ужано туж ӝог, клей шунаса медаз вия. Изолонэз тылыен-тылыен но вандылыны луоз. Одӥген лякылыса, киуж чебергес пӧрме, но ужез туж ӝегыт.
Макеслы пенопластэз кутӥ, со борды юнматӥ вогыриё (гофрированной) гумыез. Макес котырыз озьы ик изолонлэсь тылыен лякемын. Нош пыдъёслы но пыдчиньыослы вогыриё гумыез кӧня ке интыетӥ вандылӥ но куасалляй. Ӟускиез, тушез, бурдъёсыз, быжыз — пӧртэм пумо изолонлэсь. Синъёс но, ныр но магазинын вузасько, но соосты аслыд но лэсьтыны луоз. Синъёс вуроно бирдылэсь,  нош нырлы кетчуп бутылкаез вандоно.
Ӵушъял но та амалэн ик быдэстэмын. Нош юсь лэсьтэмын чехолтэк, изолонэз куасалляса вуремын. Пушкыз номырин тырмытымтэ бере, со ву вылтӥ туж капчи уя. Тӧлын медаз нуы шуыса, бордаз лескаен секытгес арбери юнматэмын.
Юсьлэн чыртыез пенопласт гумылэсь, пушказ ез куасалтэмын. Гумылэсь йылзэ выллапалтӥз вандыса, ныр пӧрмиз. Кыместӥз сьӧд буёлэн зырамын, нырыз — гордэн. Бурдъёслы юдэс изолонэз чебертыса вандылӥ.
Клавдия Александровналэн яблокпуаз ванемъёслы (аист) кар дасямын, лэсьтэмын со куролэсь. Отын пуко изолонлэсь бурдоос. Таосызлэн но чыртыоссы пенопласт гумылэсь, но вылтӥз кыскемын нылпи колготки — йырлы ныраз чуртнамын синтепон.
Садысь колодча но, гур но огшорыесь ӧвӧл — суредаса, чебертыса лэсьтэмын. Ма, нуналаз куинь час гинэ кӧлыса, бакчаед зэмзэ но выжыкыллы пӧрмоз: помидоръёсыд но йыр быдӟаесь будозы, дыняед но ымын сылмоз. Егитысен куинь часлэсь кема кӧлэме уг луы, шуэ Клавдия Александровна. Уйшоре выдыса но атасъёслэсь вазь султыса, изён солы тырме: йырыз но киосыз сэзесь, мылкыдыз задор.
Лия Малых.

Удмурт Дунне
By Удмурт Дунне 15 августа, 2012 16:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<