Аляк

Удмурт Дунне
By Удмурт Дунне 21 августа, 2012 15:29

Аляк

Огазьын шулдыр.

Туала арын лавка сиёнтэк одӥг нунал но уд улы. Сумка тыр сиёнэн бертыкум, ӧс кусыпетӥ вамыштыкум ик, песянае вуӵыртыны кутске ини:
— Нош ик уксё быдтыны ветлӥд-а? Мар кожаськоды со лавка сиёнэз? Ческытсэ гинэ тыкыса улысалды, дыр, зарни ньылонъёс. Тани бакча сиён вуиз ини. Вазен улӥмы кызьы ке но, турын-куарен гусъяськылћмы. Огмы но сютэм ӧм кулэ. Инмарлы тау, укмыстон укмысам ветлӥсько ини.
Со вискын песянае гидкуазе потэ, мон корка пырисько. Отӥяз мар со зуле-вера, уг ни кылӥськы.
Со милям чурыт кибы. Нунал потэм копейказэ лыдъяса улэ, уксё пуйызэ валес улаз лач возе. Кӧня отын уксёез — тодӥсь ке луысал, янчиксэ ик исась-марась ӧвӧл. Песянай милесьтым пӧрам сиёнмес уг сиы, малы со кимиды (химиды) кулэ шуыса, киыныз гинэ шонтэ. Чай гинэ но газ вылын уг пӧсяты, электротылды но кулэ ик ӧвӧл, шуэ. Мылыз ведь потэ — нунал потэм тылскем вылын сиён пӧзьтэ. Соин, дыр, солэн пиньёсыз куамын куинез ик сяртчы кадь шарк-шарк интыязы пуко. Мугорыз веськрес, йырвизьмыз сайкыт. Вазь ӵукна султыса, пыд йылаз поръя ни. Нош ми ке изиськом, скалмы гинэ пастухе мынонлэсь бере медаз кыльы шуыса, будильникмес 6 но ӝынылы пуктӥськом. Нош песянай ке со дыр куспын скалмес но кыскыса вуттэ, убоос вылэ ву но киськаса ортче.
— Адямилэн адямиосыз ӧвӧл тћ, шайтан воштэмъёс, — сайкаку ик пель сьӧры кылӥське ини ӟазырес куара. — Атас чортэ ке, адямилы сайкано, нош тӥ ке со ӧвӧлтэм будильниктэс пуктӥськоды. Фу, лешак басьтонъёс.
Кузпалыным ми кыкнамы ик дышетӥсьёс бере, џукназэ школае 8 но ӝынылы гинэ мынӥськом ай. Ой, ми шоры учкыса, кӧтыз уг веська ук песянаймылэн. Кытысь, пе, адӟод ӵукна гань-гань чай юыса пукисьёсты, эшшо ке кампет-пряникен. Воксё вашкала адями со милям. Кимия сиёндэс эн сие шуыса, холодильникысь колбасаосты но, консерваосты но куя. Ай эмъюм но соин возьыны уг луы — чисто сэрпалля. Мынэ, пе, пыд улысь турын-куарез бичалэ, эмъюм но, чай но тћледлы со ик луоз. Ӧч карыса, лэся, парем чаймес но соку ик кисьтэ. Корка сигын мар ке мында пыштурын но куасьтэм сутэр куар, паре но юэ сое, огпӧртэм индылэ. Телевизор учкемлы пуштыса ик кошке. Кысэ со коробкадэс, изьыны но, шай но уг сёто со гольык шайтанъёсты, кесяське. Соосты учкытозь, Инмарлы вќсяське вал. Юаса-вераса уг улы, проводзэ ишкалтэ но валесаз выдэ.
Удалтӥз-а мыным песянаен, ӧз-а — мар вераны уг валаськы. Уж понна тылэ пыроз. Пичи дырысеныз шаплы будэмысьтыз эшъёсыз сое Аляк гинэ шуылӥллям. Егит дыръяз пиосмурт кадь провор вылэм. Кышномурт йырыныз юртъер ӝутэм. Со али ке но жон-жон сылэ. Самой отын ик ми но улӥськом. Одӥг пулэз но интыысьтыз вырӟемын ӧвӧл, сандык кадь чебер но ӝикыт лэсьтэмын. Песянаелэсь юбка-дэрем дӥсяллямзэ адӟылэме ик ӧвӧл. Кызьы сое песятае кышно басьтэм — паймисько. Мон соосты огзэс но — песятайме но, аслэсьтым анай-атайме но — уг тодӥськы ни, дунне вылэ вордскыкум, анае улонысь кошкем.
— Мугор но тыныд Инмар чиндыр-вандыр гинэ сётэм, — монэ тышкаське песянае. — Сӥлё-виро муртъёс тӥни улыно-вылыно корка пукто, нылпи будэто, нош тон, кор улын пачкаса будӥсь кыйбоды сямен, мар ке кузьда кыстӥськид. Кен но бон кызьы озьы ачид кадь ик сюрыны кулэ. Кыкнады но сукыресь, очкиен ветлӥськоды.
Песянай кензэ гольык пыд но йыртэмпол ветлыны уг лэзьы — со понна кышет но пыдвыл вань, шуэ. Дӥськут но милемыз басьтыны уг лэзьы — кинлы мултэссэ люкаськоды, марды вань, ветлэ, шуэ. Но ми дышетӥсьёс ук, кызьы нылпиос азьын весь одӥг дӥськутэн ветлод. Мебель сярысь веранэз ӧвӧл ни. Телевизор сяна, корка пушкамы вань арбериосмы вашкалаосыз сыло. Гуртамы кемалась газ пыртӥзы ини, нош песянай милям — адямилэсь пӧртэм адями, гуртын улыса вылысь гур но ӧд эсты ке, мар ужалод на та дунне вылын шуыса, газ пыртыны тып-тып пумит кариськиз.
Улэм-вылэмъя олокыӵе но техника кылдэ. Компьютер басьтӥмы. Кузпалы уен-нуналэн отын пукысал, дыр, уката ик аспирантураын дышетске. Но песянай солы воля уг сёты. Бакчаын сомында уж, картошты кибыосын но жуг-жаген басьтэмын, нош тӥ ке гань-гань коркан пукиськоды. Песянайлэн кылызлы ёрмыса, городэ улыны кошкыны медӥськом ни вал. Вормытъяськыны кутскиз: азьтэмдэс уд вормиське.
Адямилэн чиданэз чигымтэ шуыса, чидаськом ини, улонмес песянаймыя карыны тыршиськом. Нокызьы со уг вала улонлэсь воштӥськемзэ. Ялан пичи дырзэ но эшъёссэ вераса пуке. Ас вакытаз лек оже но со ветлэм, пленэ но сюрылэм. Ӵемысь уйвӧт адӟылэ, лэся, уйбыт кесяськыса потэ: «Германия, фриц, капут, Гитлер!» Куараез корка тыр шуккиське. Умме ке усе, вал кадь гырдалляса, соргетэ.
Одћг нуналэ кузпалы школаысь ноутбуксэ сьќраз вайиз. Бакчаысь льќмпу сад улэ пуксиз но ужаны кутскиз. Шутэтскон висказ удмурт кырњанъёсты лэзем, нош ачиз корка пырем. Песянай та паймымон арбери шоры нырысь писпу вайёс вискытћ учкыса сылэм, собере матэ кариськем. Со вискын экран вылэ Брангуртысь песянайёс потћллям. Соосты адњыса, сюлэмыз икак луэм. Ноутбукез кунултэм но, уриськон дораз вамыштэм. Бакчае потћмы но адњиськом: Брангурт песянайёс кырњало, нош милямез эх, эктэ. Шултыса лэзе, тэтча, кык киосыныз ик йыр бераз чабкылэ. Ми бакомим, мар карыны ум валаське ни. Милемыз адњыса, кыкнамес но чупа, њыгыръя, тау таџе кузьымдылы, кќня кулэ, али ик сомында уксёме сёто, шуэ. Та, пе, мыным чипы-курег утялтыкум но, бакча урыкум но, турынэз октыкум-калтыкум но, сьќрам нуллыны яралоз. Валес улысьтыз быдэс пачка уксёзэ милемлы мыче.
Песянаймылы табере номыр кулэ ќвќл ни. Чипы-курегзэ но уг ни утялты, сиён но уг ни пќра, кимиен сюдћськоды шуыса но уг ни љожтћськы, газ пыртэммес но ќз шќдылы — уен-нуналэн Интернет борды бурмемын. Солы али ваньмыз тунсыко. Паймымон соиз но: песянаймы Германиысь ачиз кадь ик арлыдъем воргоронэз шедьтэм. Немец кылын шалтыр гожъясько.
— «Евровидениысь» адњи мон Брангуртысь песянайёсты, — гожтэ Адольф. — Туж синмаськымонэсь но йќноесь кенакъёс. Соослэн ымнырысьтызы тынэсьтыд тустэ адњи.
Вот ведь мар каре туала техника адямиез! Песянаймы табере Германие мыныны дасяське, Адольфеныз пумиськыны вераське. Юнме шат, пе, мон вань улытозям уксёме люкаса вози. Юлтошеныз ӵош Гамбурге улон сэрег басьтыны малпаське. Вот тыныд, вашкала песянай, шу.

Любовь Тихонова.

Удмурт Дунне
By Удмурт Дунне 21 августа, 2012 15:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<