Шумпоттэ «Гранта»

Удмурт Дунне
By Удмурт Дунне 27 июля, 2012 12:53

Шумпоттэ «Гранта»

Конвейерысь васькизы нырысетӥ «Лада-Грантаос».

Ижысь автозаводлэн («Огазеям автомобиль группа» огазеяськон) конвейерысьтыз толон васькизы нырысетӥ «Лада-Грантаос».

АвтоВАЗ-ысь кивал­тӥсьёс чакламъя туэ заводын бичалозы 50 сюрс машина, пӧлысьтыз ӝыныез — выль «Гранта».

Март толэзе гинэ кык корпусысь цехъёсын буш вал. Ужасьёсты отпуске лэзизы. Уго кылем ар пумын лэсьтӥзы берпуметӥ «ВАЗ-2107» машинаосты. Ӟеч сварщикъёсты, сборщикъёсты но мукет кулэ луись специальностен калыксэс медаз ыштэ шуыса, заводчиослы кӧня ке толэзь ӵоже коньдон тыризы. Нялтас вераса, шоро-куспо уждун татын 15 сюрс манет.

Бумага вылын решение кутэм дырысен выль производство кутскытозь, ортчиз 300 нунал гинэ. Та ӵоже пуктэмын сваркая выль линия. Татчы ваемын Россиын но кунгож сьӧрын поттэм ужан тӥрлык. Табере адямиосын ӵош машина бичало роботъёс.

— Сваркая линиын одӥг сменае ужа 175 адями. Татын соос машиналэсь шассизэ но кузовзэ лэсьто, та ужын юрттэ 24 робот, — вера АвтоВАЗ-лэн президентэз Игорь Комаров.

Час куспын та линиын дась луэ 25 кузов. Бӧрысь соосты буяло — туэ ар пумозь «Грантаосты» 3 пумо буялозы — азвесь, пеймыт-горд но сьӧд. Вуоно арын конвейерысь васькозы ни турлы буёло машинаос. Час ӵоже дась луэ 25 автомобиль.

Выль производствоез радъяны быдтэмын 1 миллиард 359 миллион манет. Коньдонлэсь бадӟым люкетсэ висъяз АвтоВАЗ, куд-ог ужъёслы уксё шедьтӥз ачиз «ИжАвто» но. Оглом автозаводэз улӟытонлы быдтэмын ни 10 миллиард инвестициос. Кылсярысь, кылем арын Удмуртиысь промышленносте та быдӟа коньдон вуиз быдэс ар ӵоже.

— Автозаводмылэн кылдӥз рос-прос анай-атаез. Табере чаклам проектъёс быдэсмо. Туннэ мон зэмзэ но шудо. Оскисько, азьланяз автозавод оградэ ӝутскоз мукет машина поттӥсь предприятиосын, — вераз Удмуртилэн Президентэз Александр Волков.

«Лада-Гранта» али потэ седан кузовен. «Стандарт» комплектациен дасям машина сылэ 259 сюрс манет. Но «Ладаен» вуз карись салонъёс ӵемысь выро та дун борды лякыны кыӵе ке опциос. АвтоВАЗ-лэн кивалтӥсез Игорь Комаров таӵе дилеръёслы эрказъяськыны уз сёты. Уго «Гранта» со понна ик кылдытэмын вал — калыклы вормымон дунын выль машина шуыса.

«Гранта» проектлэн кивалтӥсез Олег Груненков верамъя, Тольяттиын но Ижын бичам машинаос ӟечлыксыя ог-огзылэсь уг висъясько.

Зэм, Удмуртиысь басьтӥсьёс доры одно ик уз шеде асьме автозаводын лэсьтэм «Грантаос». Уго автомобиль вузанэн выре АвтоВАЗ. Соин Ижын поттэм машинаос кошкозы Тольяттие. Нош конвейерысь васькем нырысетӥ автомобиль кылёз Удмуртилэн шоркараз. Азвесен кисьтаськись машина сётэмын Устинов ёросысь калыклы улон-вылонын юрттонъя ёзлы.

2014-тӥ арысен «Лада-Гранта» потоз ни хэтчбек кузовен. Тазэ Ижын гинэ бичалозы. Кылсярысь, автозаводлэн огъя кужымез — араз 220 сюрс машина бичан. Соин азьланяз чаклало Ижын поттыны 140 сюрс «Гранта».

Елена Скворцова.

Удмурт Дунне
By Удмурт Дунне 27 июля, 2012 12:53