Удмурт мисс Марпл

Удмурт Дунне
By Удмурт Дунне 11 июля, 2012 13:07

Удмурт мисс Марпл

Любовь Фёдорова.

Кылем даурлэн пумаз Россиысь литератураын зол пушйиз детектив жанр. Солэн мугъёсыз огъя улонлэн тугаськеменыз герӟаськемын вал. Удмурт литература та ӧрлэсь палэнэ кылиз.

Б. Акунин, Ф. Незнанский, Э. Тополь, А. Константинов — 1990-тӥ аръёслэн пумазы лыдӟисьёс пӧлын та нимъёсты тодӥсьтэмез ӧй вал. Берло детектив гожъян борды басьтӥськизы нылкышноос: А. Маринина, Д. Донцова, Т. Ус­тинова, П. Дашкова, Т. По­лякова, Т. Степанова… Удмурт писательёс соос сьӧры ӧз кыстӥське. Малы? Асьмелэн ӧвӧл детектив гожтон, печатлан, кылысь кылэ берыктон культурамы.

2000-тӥ аръёслэн кутсконазы сыӵе литературалы сюрес усьтыны вырон вал. В. Ар-Серги гожтӥз «Уй вадьсын — бубылиос» роман, Р. Игнатьева — «Кион котьку сютэм» повесть (печатламын 2005-тӥ арын «Удмурт дуннеын», нимаз книгаен потӥз 2011-тӥ арын).

В. Ар-Серги произведенияз огазе суралтэм мистикаез, фантастикаез но детективез. Нош Р. Игнатьева повестяз детектив жанрлэсь кабъёссэ уг тӥя. Нырысь ик, лыдӟись пумозяз тодыны выре, йырзэ тӥя, кин лэсьтӥз йыружез — детективлэн та валтӥсь куронэз. Кыкетӥез, отын ичизэ 4 герой луыны кулэ: йыртэмась, солэн киулаз шедем мурт, учырез сэрттӥсь мурт (сыщик), учырез мадись мурт (повествователь). Произведениын валтӥсь инты басьтэ сыщик. Дуннеысь литератураын соос 3 пӧртэм:

1. Милициын, полициын ужась, зэмос профессионал. Со туж тодӥсь-быгатӥсь яке туж огшоры. Кыкетӥ учыре визь-кенеш ялан курылэ мукет адямилэсь. Татын тодэ лыкто Анастасия Каменская (А. Марининалэн), Ханна Вильгельмсен (А. Холтлэн).

2. Ас понназ ужась детектив — полициын уг тыршы яке уг тыршы ни. Визьмо, шаплы, амало. Солэсь быгатонлыкъёссэ эшшо но юнгес возьматон понна действие ӵемысь пыртэмын луэ полициысь сыщик — таиз вамышлы быдэ янгыша, йыртэмасьлэн четлыказ шеде. Герой ваче пумит пуктэмын чиновникъёслэн, полицилэн системазылы. Сыӵе югдуре шедемын Эркюль Пуаро (А. Кристилэн), Шерлок Холмс (А. Конан-Дойльлэн).

3. Йыружъёсты вакытэн-вакытэн, ваньмон дыръя сямен сэрттылӥсь. Яке ассэ (тодмозэ) шонере поттон понна шӧдтэк шорысь сыщик луэм мурт. Таӵеос пӧлысь Евлампия Романова (Д. Донцовалэн), мисс Марпл (А. Кристилэн).

Р. Игнатьевалэн «Кион котьку сютэм» повестезлэн вакчияк пуштросэз таӵе. Чорыгова Мальвина Павловна ужа соцработник луыса инвалидъёслэн интернатазы. Интернатын улӥсь Ксенофонтов Митрофан Дормидонтович ӝожтӥське солы: налоговой инспекциысь гожтэт вуиз, ваньбурдылы выт тырымтэ шуыса. Дормидонтовичлэн куштӥськем сэрегез ке но луысал ке! Чорыгова басьтӥське юрттӥськыны пересь адямилы но тодэ: Ксенофонтовлы зэм но наследствое кельтэмын корка, но сое таланы выро «сьӧд» риэлторъёс — «Недвижимость» газетын ужасьёс. Редактор Андрей Кузнецов, эшез но кивалтӥсез Рашит Гайнуллин, косонъёссэс быдэсъясь Плешивый пересьёсты быдтылӥзы, нош квартираоссэс асьсэлы карылӥзы. Ваньмыныз кивалтӥз кытын ке вылӥын пукись Синусов. Чорыгова вазиськыса, милиция ваньзэ тае шарая, зэм, кырме Плешивыез гинэ. Ксенофонтов корказэ кузьма пересьёслэн юртсылы.

Повестьлэн пумыз, шуом, А. Кристилэн произведениосаз кадь шӧдтэк шорысь но паймымон ӧвӧл, йыртэмасьёс сярысь асьмеос валатскиськом пумен лыдӟеммыя. Нош повестьлэн фабулаез тупа детективлэн куронъёсызлы. Мальвина Чорыгова — сыщик. Со профессионал ӧвӧл, со понна ӟеч психолог, солы котыр ласянь удалтэ. «Амало куды… Зэмзэ ик, со котькыӵе учырысь ӟечен, калык шуэмъя, кӧсын потыны пишмытэ».

Автор геройзэ лыдӟисьлы матын каре, солэн улонэз сярысь мадьыса: картэн ӧз удалты, пиез кулӥз… Чорыгова — огшоры адями. Соин лыдӟись малпаны ӧдъя: мон но со кадь ик быгатысал йыружез сэрттыны. Таӵе амал кутӥське серем пыр гожтэм (иронической) детективын. Та малпанэз юнмато геройёслэн нимъёссы но. Чорыгова фамилия вера геройлэн удмурт луэмез сярысь, со валэктэ куд-ог сямъёссэ. Серемес кылӥське МВД-ысь министрлэн воштӥсезлэн фамилиез но — Вячеслав Страшилов, йыртэмасьёсты нимтулыныз ик кышкатэ, вылды. Таиз герой учырез эскерон борды басьтӥське Чорыговалэн эшез вазиськем бӧрсьы. Озьы Р. Игнатьевалэн повестяз героиня эскеронзэ ачиз пумозяз уг вутты.

Детективын сыщик бере валтӥсь герой — йыруж лэсьтӥсь. Классической детективын вань геройёсын асьмеос тодматскиськом огдыре, сыщик янгыш муртэ утча, соослэсь учыръёссэс, верамъёссэс ӵошатыса. Йыруж лэсьтэм герой тодмо луэ пумаз гинэ, сое шараян ортче ӝог, син азе яркыт пуксе, вунонтэм кыле. Нош Р. Игнатьева геройёссэ одӥген-одӥген пыртэ но котькудӥзлэсь макем янгыш луэмзэ ачиз валэктэ.

«Сьӧд» риэлторъёсты геройёс карыса, автор возьматэ 1990-тӥ аръёсысь югдурез — соку трос гожъязы квартира понна адями виылӥсьёс сярысь. Йыр вандӥсьёсты автор ӵошатэ кионэн: сыӵе ик кӧттырмостэмесь, лекесь. Сямзы гинэ ӧвӧл, туссы но огкадь. Кузнецов но Гайнуллин сярысь тазьы шуэмын: «Ма, шонерзэ верано ке, та пиосмуртъёс, агай-вынъёс кадь, ог-огзэс валаса, ог-огзылы юрттыса уло. Куддыръя тодмооссы соосты сурало но. Тусбуйын воргоронъёс туж пӧртэмесь ке но. Арлыдын, ӝуждалаен но кыӵе ке сям-йылолъёсын ке шат тупало». Валамон луэ, соос Ижын уло шуыса: поттылэмын Буммаш но Строительёслэн микрорайонъёссы, «Родина» магазин» остановка, 373-373 такси сярысь…

Детективез йылысеныз пумозяз тунсыкен лыдӟон понна, со медаз жадьыты шуыса, быгатоно геройёслэсь учыръёссэс дырыз-дыръя сётыны. Таиз ласянь повестьын куд-ог тырмымтэос вань. Кылсярысь, Митрофан Лошкарёвлэн пиез луэ шуыса, лыдӟись вала ини Лошкарёв сярысь главаын. Соин ик Чорыговалэн отӥ-татӥ утчаськемез мултэс, осконтэм потэ, лыдӟись акыльтыны кутске. Со сяна, классической детективын туж ик бадӟым инты уг висъяськы геройлэн пушказ копаськемезлы, сюлмаськонъёсызлы.

«Кион котьку сютэм» повестьын кыкетӥ планысь геройлэн — Наташалэн — улоназ кылдэм шуг-секытъёс сярысь трос верамын, соос йыружен герӟаськемын ӧвӧл ке но. Ксенофонтовлэн ас понназ вераськонъёсыз-малпаськонъёсыз мултэс кузь гожтэмын. Таӵе кожанъёс палэнэ нуо йыруж сэрттонлэсь, лыдӟись ганяк кариське, саклыксэ ыштэ. Таин валче детектив тупаны кутске нылкышно романлы, кытын нырысетӥ интые пото психологизм, чыры-пыры учыръёс, малпанъёс борды дэмӟон.

Ваньзэ тае лыдэ басьтыса, вераны быгатӥськомы: Римма Игнатьева удмурт литератураын нырысьсэ гожтӥз нылкышно детектив.

Любовь Фёдорова.

Удмурт Дунне
By Удмурт Дунне 11 июля, 2012 13:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<