Удалтэм удмуртъёс

Удмурт Дунне
By Удмурт Дунне 4 июля, 2012 10:33

Удалтэм  удмуртъёс

Т. Шайбакова.

Башкортостанысь удмуртъёс мӧзмонэз уг тодо: ог-огзы доры куное вуыло, бадӟым ужрадъёс ортчытъяло. Асьсэлэн улэм-вылэменызы тодматӥз Башкортостанысь удмуртъёслэн культурая центренызы кивалтӥсь Татьяна Шайбакова.

Туннэ нуналлы Башкортостанын кылдытэмын пӧртэм выжы калыкъёслэн 16 огазеяськонзы. Соос пӧлын йӧно адско удмуртъёс. Та дырлы аспал эшъёсмылэн лыдзы отын 22 сюрслэсь ортче. Тужгес трос удмуртъёс 8 ёросын: Янаул, Татышлы, Калтасы, Бурай, Балтась но мукетъёсаз. Ог-огенызы пумиськылэм сяна, соос удмуртлыкмес утён сярысь но сюлмасько.

— Арлы быдэ пӧртэм ужрадъёс ортчытъяськомы, — шуэ Татьяна Шайбакова. — Егит нылъёс пӧлын куинетӥ арзэ «Чеберина» конкурс радъямы, нош школаын дышетскисьёс быгатонлыкъёссэс эскеризы «Ӝужась кизилиос» фестивальын. Ужась калыкез но палэнэ ум кельтӥське, сӥлы кариськомы пӧртэм удысын вормон басьтӥсьёсты.

Башкириысь удмуртъёс чакласа возё вашкала йылол-сямъёсты. Кемалась ик ӧвӧл «Мӧр вӧсь» ортчытӥзы, нош кылем арня пумын «Элен вӧсь». Берлоез сярысь ке верано, сое куинь интыын гинэ радъяло: Бурай ёросысь Алтау, Янаул ёросысь Вуж Вараш гуртъёсын но Пермь улосысь Куеда ёросын. Туэ со Варашын вал.

Шаермылэн палэназ улӥсьёс, дыр шедьтыкузы, одно ик Удмуртие вуылыны тыршо. Тужгес витё Гербер шулдыръяськонэз. Таяз учыре та бадӟым ужрадэ вуылӥзы арлыдо артистъёссы, нош «Воршуд» фестивале — егитъёссы.

— Ӧтемзэс гинэ возьмаськомы: егитъёс но, арлыдоос но кузь сюрес вылэ потыны дасесь, — веранзэ азьланьтэ Татьяна Николаевна. — Кемалась ик ӧвӧл песянайёсмы вуылӥзы Камсьӧр удмуртъёслэн Ижын ортчем ӝытазы. Сюрессы кузь вал ке но, одӥгзы но ӧз ӝожтӥське. Брангуртысь песяйёсты сямен ик, милесьтым но арлыдо артистъёсмес пӧртэм интыосы куное ӧтчало. Бусы ужъёс огшаплы чусомизы ке, потыны дасяськиськом Марий Эл Республикае, Удмуртиысь Пичи Пурга ёросэ.

Мукетыз но шумпоттэ: Башкортостанысь вань удмурт школаосын анай кылъя урокъёс нуисько. Классын 2 пинал гинэ ке но луиз, одно ик удмурт кылъя дышетӥсез шедьтозы. Озьы татысь тросэз нылпиос куинь кылэз тодыса будо. Нош кемалась ик ӧвӧл Балтась ёросын удмурт гимназия усьтӥллям. Озьы тӥни Башкортостанысь удмуртъёс мукетъёслы адӟем карымон луо.

 

 

Марий Эл

Ӧтчаськись шаер

М. Главатских.

Марий Эл Республикаын улӥсь удмуртъёс 2 сюрс пала люкасько. Соосты сьӧраз быгатыса валтэ Мари-Турек ёросысь Ӟаны починка гуртысь удмурт культурая центрен кивалтӥсь Мария Главатских.

Анай кылмес та шаерын Карлыган школаын гинэ дышето ке но, удмурт кылын кырӟась-верась коллективъёссы лачак. Жингрес куараенызы паймыто «Ӟардон» коллективе ветлӥсьёссы. Таослэсь бере уг кылё нылпиослэн «Уӵыпиос» ансамбльзы но «Кузьыли» драмкружоксы.

Кылем арнянуналэ татысь удмуртъёс ас доразы Гырон быдтон шулдыръяськон ортчытӥзы, нош солэсь азьвыл «Ӟардонысь» 24 мурт Удмуртие Гербере вуылӥз. Туж потэ вылэм вань артистъёссэс та шулдыръяськонэ ваемзы. Но 32 мурт пӧлысь автобусын 24-езлы гинэ инты шедем. Марий Элысь удмуртъёс август толэзе ас доразы нырысьсэ люканы медо Ватка сьӧрысь удмуртъёсты. Ортчытыны малпало шошма удмуртъёслэсь нырысетӥ фольклор фестивальзэс.

 

 

Татарстан

Мӧзмись «инвожоос»

Н. Колесникова.

Елабуга городысь удмуртъёс улонын пумиськись шуг-секытъёс шоры киынызы гинэ шонто.

Ас вакытаз Елабугаысь школаын но удмурт кылэз дышетӥллям. Берло дыре анай кылмес дышетыны мылкыд карисьёслэн лыдзы ичиомемен но дышетӥсьёс шедьымтэен, удмурт кылъя урокъёс уг ни нуисько. Озьы ке но бадӟым концертъёсын удмурт кыл чузъяське. Елабугаын улӥсьёс анай кылмылэсь мӧзмыны кутско ке, ог-огзылы жингырто но пумиськон сярысь кенешо. Огазе люкаськыса, вань сюлмаськонъёссэс кырӟанъёс пыр кисьто.

— Городысь удмуртъёсты люканы туж шуг, — шуэ Елабугаысь «Инвожо» ансамбле ветлӥсь Нина Колесникова. — Коллективмылы 5 ар тырмиз ни, нырысь аръёсаз дорамы 40 адями ветлӥз, нош та вакытэ 8 кузя гинэ люкаськылӥськомы. Берло дыре огазеяськыны луонлыкъёсмы но шергес кылдо. Ужась адямиос коньдон поттон сярысьгес сюлмасько, куд-огзэ ужысьтызы лэземзы уг поты, нош куд-огез азьтэмске ни. Телевизор азьын пукысалзы, дорысьтызы но мултэссэ ӧй потасалзы. Ярано коть, концерт учкыны калык люкаське ик.

«Инвожо» ансамбле ветлӥсьёс ваньзы сямен Удмуртиын вордскемъёс луо. Ошмесо шаерзылэсь мӧзмыны кутско ке, дор палъёсазы ширто. Асьсэос ик автобус утчало, бензинлы коньдон бичало. Коллективен кивалтӥсьсы ӟуч ке но, удмурт кырӟасьёс доры, вань ужзэ куштыса, лыктэ. Матысь дыре соос Сарапул городэ этнофутуризмъя симпозиуме лыктыны дасясько.

 

Свердловск

Пайдаё синмаськон

Удмуртиысь брангурт песянайёс дано луэм бере Свердловск улосысь эктонъя но кырӟанъя «Азвесь гур» ансамбль шоры но калык мукет синмын учкыны кутскиз.

Удмуртиысь песяйёсын ми вазенгес ик ӟеч кусыпъёс возиськомы ини. Тодматскимы 2007-тӥ арын, Екатеринбургысь одӥгаз лицейын, Вылӥ Пышмаысь удмурт школаын концерт пуктыкузы.

Концерт бере залын юн кичабонъёс шуккиськизы. Песянайёслэн капчи но задор мылкыдзы милемлы но пыӵаз. Синмаськимы чебер куараоссылы, шундыё мылкыдзылы, пиналъёсын огкыл шедьтыны быгатэмзылы. Озьы ми но удмурт кылэз тодӥсь пиналъёсты огазеяны малпамы — «Чингыли» ансамбль кылдытӥмы.

Глазов

Кепыраны уг валало

Т. Ельцова но Н. Булдакова.

Глазов ёросын кырӟась-верась коллективъёс котькуд муниципал кылдытэтын вань. Соос пӧлын тужгес арлыдоез — «Ӟардон» калык ансамбль.

Отын кырӟасьёс Надежда Булдакова но Тамара Ельцова трос аръёс ӵоже ини птицефабрикаын тыршо, нош ваньмон дыр шедьто ке, «Ӟардоназы» дырто. Кивалтӥсьсы Михаил Копылов котькуд артистэз дунъяны быгатэ. Со сюлмаськемен, пе, репертуаразы пӧртэм гуръёс чузъясько, быгатонлыкъёссэс Удмуртилэн палэназ но возьматыны уг кепырало. Туэ, кылсярысь, бадӟым вормонэн бертӥллям Кировын ортчем «Ватка пужыос» конкурсысь. Та вакытэ «ӟардонъёс» дасясько Ижын ортчоно концертлы.

 

Дэри

«Инбаме укно»

Июнь толэзь шорын Дэри ёросын улӥсь удмуртъёс ӝыны ар ужамзылы йылпумъянъёс лэсьтӥзы, асьсэлэн тыршемзы сярысь мадизы «Мӧзмон» клубе ветлӥсьёс но.

«Удмурт кенеш» огазеяськонлэн ёросысь ёзаз пырисьёс кенешизы ёроссылэсь юбилейзэ ортчытон сярысь. 1-тӥ июне ёрослы 75 ар тырмиз ке но, тае пусъёзы 5-тӥ июле, Гурт шудонъёс усьтӥськон нуналэ. Кызьы вераз ёросысь удмуртъёслэн азьветлӥсьсы Лидия Биянова, солы сӥзьыса, «Инбаме укно» фестиваль ортчоз.

Дэриослэн тужгес бадӟым сюлмаськонзы — сентябрь толэзь. Ӵапак соку ёросысь удмуртлык понна бадӟым уж лэсьтӥсьёс пӧлысь одӥгезлы сётэмын луоз Эрик Батуевлэн премиез. Со ёросын висъяське ни 2005-тӥ арысен.

 

 

Кизнер

Шудоос — Балдейкаын

Кизнер ёросысь кибашлыос ас ужъёссэс ёросазы улӥсьёслы но возьмато, бускельёссы доры но потало.

Нош кылем арын шунытэсь кусыпъёс тупатӥзы киясаосын — таос киужъёссэс Кизнере нуллӥзы. Туэ кизнеръёс кузь сюрес вылэ потӥзы. Нош ёросысь киужъёсъя центразы мӧзмыт медаз кыльы шуыса, Пичи Пурга ёросысь Владимир Рыбаковлэсь «Воршуд» адӟытонзэ радъязы.

Со сяна, та нуналъёсы Балдейка школаын аспӧртэмлыко лагерь усьтӥськиз. Со радъямын 13-15 аресъем пиналъёс понна. Отчы шедизы дышетсконын бадӟым вормон басьтэмъёс но шаертодонэн тунсыкъяськисьёс. Кызьы вераз «Удмурт кенеш» огазеяськонлэн ёросысь ёзэныз кивалтӥсь Валентина Рассомахина, шудо пиналъёсты удмурт культураен тодматозы но куролэсь мунёос лэсьтыны дышетозы.

Дасяз Валентина Емельянова.

Удмурт Дунне
By Удмурт Дунне 4 июля, 2012 10:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<